Read Nguna Togoa Etafe North YEREMIAH 29 Bible Online

YEREMIAH 29 - Nguna Togoa Etafe North bible

YEREMIAH 29

¹Go tea maga waia eu pei navasaana maga ni tusi waina profeta Yeremiah e dip̃aki lua e pae Yerusalem paki namagovai ni tea matua maga ni tea viragi‐lua‐pavakotoana maga, go paki tea viri maga, go paki profeta maga, go paki narei mamau puti, waina Nebukadnessar e piragi lua pavakoto ara m̃elu dua ki Yerusalem paki Babelon pano:

²(Edaku ki ragi waina nawota Yekoniah, go p̃ilana nawota nagoroi, go atavau maga, go tea maraki maga ni Yudah go Yerusalem, go tea vei mataisau maga, go tea vei mataisau maga ni vatu, eu m̃elu dua ki Yerusalem pano;)

³Tusi wanogoe e pei tea tip̃akiluaana pae nam̃elearu ni Elasah natu ni Shafan, go ni Cemariah natu ni Hilkiah, (waina Sedekiah nawota ni Yudah e dip̃aki lua e pano paki Babelon punusi Nebukadnessar nawota ni Babelon,)

⁴e naga, Yehovah ki taua maga, Sup̃e ki Israel, e noa dapala nea paki tea viragi‐luapavakotoana maga mamau puti waina a mari ra eu pei tea viragi‐luapavakotoana m̃elu dua ki Yerusalem paki Babelon pano,

⁵e naga, Kuga tavagi nasum̃a maga, po doko ara doko; po lawo roara maga, po gani nawa kakada;

⁶Kuga tawiri nagoroi maga, po pesi piakiki naanoai maga go piakiki nagoroi maga; go kuga magi natumu naanoai maga puati nagoroi maga, po pitua ki natumu nagoroi maga euga laki, naga euga tape piakiki naanoai maga go piakiki nagoroi maga; go kuga vavakawora tokora wanogoe, po laapa.

⁷Go kuga laaga naga natam̃ateana ega toko natokoana waina a mari mu ku pei tea viragi‐luapavakotoana paki asa pano, po pavara ni Yehovah nalo kakana: nalakena doko natam̃ateana kakana, nimu ma kuga veani natam̃ateana asa.

⁸Nalakena Yehovah ki taua maga, Sup̃e ki Israel, e noa dapala nea, e naga, Kuga ta suasua ki profeta animu maga waina eu doko m̃aleoputo kakamu, go ki tea kikita animu maga mau, naga euga viragi sasap̃o ki mu, go kuga ta daki dorogo paki nap̃erea adeada maga mau waina eu p̃erea ki da.

⁹Nalakena eu do peanoasai nasorosoroana paki mu doko nagisagu: kinau a da dip̃aki lua ra mau, Yehovah e noa e.

¹⁰Nalakena Yehovah e noa dapala nea, e naga, Ragi waina natau rualima larua euga wo nopu doko Babelon, aga wo paloti punusi mu, po manimu pakavuro nasaiana aginau, po piragi liliua ki mu umai paki tokora waia.

¹¹Nalakena kinau a atae namidodoana maga waina a po manimu midoa ki p̃otae ra, Yehovah e noa e, namidodoana maga ni natam̃ateana, eu da pei tea ni tea sa mau, naga kuga veani naleogoroana naaleatia malaapa animu maga.

¹²Go kuga wo pioso paki nau, go kuga wo pano po dapasavasa paki nau, go aga wo daki dorogo paki mu.

¹³Go kuga wo laaga au, po pap̃ai au, ragi waina kuga wo leo laaga au ki nap̃op̃omu mamau.

¹⁴Go aga wo pei tea vap̃aiana animu, Yehovah e noa e, go aga wo piragi liliua ki naviragi‐lua‐pavakoto‐mu‐ana, go aga wo piragi saisai ki mu m̃elu dua ki nalauna maga mamau puti, go m̃elu dua ki tokora maga mamau puti waina a kopasi lua mu paki asa pano, Yehovah e noa e; go aga wo moro piragi liliua ki mu umai paki tokora waina a mari mu ku pea pei tea viragi‐lua‐pavakotoana m̃elu asa pano.

¹⁵Nalakena ku naga, Yehovah e manigida sike lawo ki profeta maga doko Babelon;

¹⁶Nalakena tea wanogoe Yehovah e noa dapala nea nalo ni nawota waina e dasake doko malo tasake ki David, go nalo ni narei mamau puti waina eu doko natokoana waia doko, taimu maga waina eu da sikoti mu ragi waina ku pei tea viragi‐luapavakotoana pano;

¹⁷Yehovah ki taua maga e noa dapala nea, e naga, Kuga leo, aga wo dip̃aki lua lova ega va parati ki da, go navitoloana, go nasasanaana sa, go aga wo mari ra euga wo dakiusi napuliva sa liu maga, waina eu mari sa pei tea kaniana mau, nalakena eu sa mau sa.

¹⁸Go aga wo kopalele ara ki lova, go ki navitoloana, go ki nasasanaana sa, po pituaki da euga vei tea duletuleakiana usuraki namarakiana maga mamau puti ni maramana, naga euga vei navasasakiana sikai, tea ni namagaana sikai, go tea ni nasaram̃asikaana sikai, go tea vasapinoaana sikai m̃aleoputo ni nalauna maga mamau puti waina a kopasi lua ra paki asa pano:

¹⁹Nalakena eu da dogo parati ki navasaana aginau maga mau, Yehovah e noa e, ma a dip̃aki lua tea suasua aginau profeta maga pa punusi ra pitip̃atip̃a; ma ku karai daki dorogo, Yehovah e noa e.

²⁰Nalakena tea wanogoe kuga rogo navasaana ki Yehovah, nimu tea mamau puti waina ku pei tea viragilua‐pavakotoana, waina a dip̃aki lua mu m̃elu dua ki Yerusalem paki Babelon pano.

²¹Yehovah ki taua maga, Sup̃e ki Israel, e noa dapala nea nalo ni Abah natu ni Kolaiah, go nalo ni Sedekiah natu ni Maaseiah, waina ero do manimu peanoasai nasorosoroana sikai doko nagisagu, e naga, Kuga leo, aga wo pitua ki da paki nam̃elearu ni Nebukadnessar nawota ni Babelon; go nae ega wo atugi ra kivea ki namatamu maga;

²²Go nalakena nara, tea viragi‐luapavakotoana maga ni Yudah waina eu doko Babelon, euga wo noa navasasakiana waia, euga wo naga, Yehovah ega mari ko p̃a takiusi Sedekiah go dakiusi Ahab, waina nawota ni Babelon e dap̃ara ki da nakapu:

²³Nalakena eu mari naveilalaana doko Israel, po maripele paki tea ni m̃aladigi ki da adagoroi maga, po noa navasaana maga ni nasorosoroana doko nagisagu, waina a da dip̃aki da asa mau; kinau a atae a, go a punusi a, Yehovah e noa e.

²⁴Go nalo ni Shemaiah ni Nehelam, p̃a noa ega tapala nea, p̃a naga, Yehovah ki taua maga,

²⁵Sup̃e ki Israel, e noa dapala nea, e naga, Nalakena ku dip̃aki lua tusi midiriana maga pae nagisam̃a paki narei mamau puti waina eu doko Yerusalem, go paki Sefaniah natu ni Maaseiah tea viri, go paki tea viri maga mamau puti,

²⁶doko do naga, Yehovah e mari ko ku pei tea viri du oli Yehoiada tea viri, naga p̃a vei tea tap̃au sikai nasum̃a ki Yehovah dap̃au sara naata sikasikai waina e pe toropa po dum̃ana mari a e pe vei profeta sikai, naga p̃a toropusi a paki nasum̃a ni navavaigoroana, go paki nakau alatisoki.

²⁷Nalakena tea wanogoe ekasana ku da pasa dip̃a Yeremiah ni Anathoth, waina e dum̃ana pasa dapui a naga e pei profeta anigo sikai?

²⁸Nalakena e dip̃aki lua umai paki gami waina au doko Babelon, po naga, Naviragilua‐pavakotoana e parau: kuga tum̃amu manimu davagi nasum̃a maga, po doko ara doko; go kuga lawo roara maga, po gani nawa kakada.

²⁹Go Sefaniah tea viri e peve tusi midiriana wanogoe nadaliga ni profeta Yeremiah.

³⁰Go navasaana ki Yehovah e umai paki Yeremiah, po naga,

³¹P̃a tip̃aki lua paki tea viragi‐lua‐pavakotoana maga mamau puti, po naga, Yehovah e noa dapala nea nalo ni Shemaiah naatam̃oli ni Nehelam, e naga, Nalakena Shemaiah e peanoasai paki mu, go kinau a da dip̃aki nia asa mau, go e mari mu ku pavatu nasorosoroana sikai;

³²Nalakena tea wanogoe Yehovah e noa dapala nea, e naga, Kuga leo, aga wo parati Shemaiah naatam̃oli ni Nehelam, nara ma naworaworana euga mamau; naatam̃oli aneana sikai waina ega wo doko m̃aleoputo ni narei waia ega wo dika, go ega wo da punusi tea wia mau waina aga wo mari a paki narei aginau, Yehovah e noa e: nalakena e pasa p̃auluulu dip̃a Yehovah.