Read Nguna Togoa Etafe North YEREMIAH 3 Bible Online

YEREMIAH 3 - Nguna Togoa Etafe North bible

YEREMIAH 3

¹E pei tea noaana, eu naga, Naatam̃oli sikai e pe toropusi anagoroi, go nae e pe m̃elu dua ki nia pano po pei nagoroi ki naatam̃oli p̃ota sikai, e pe wo moro pa punusi a, kite? Navanua wanogoe ega wo da pei tea mariana ega loa p̃arua asa, kite? Ma nigo ku maripele paki tea dodomiana maga laapa; go ku pe wo liliu umai punusi au, kite?

²Yehovah e noa e. P̃a sike namatam̃a maga paki tokora vakilagi maga, po leo punusi; seve tokora waina naatam̃oli maga eu da one sikoti ko asa mau? Doko nadigi ni napua maga ku doko natano doko raki da, dakiusi naka ni Arabia sikai doko masop̃alo; go ku mari navanua e loa ki namaripeleana anigo maga, go ki nasigisigileoana anigo.

³Nalakena tea wanogoe usa walapa maga eu pei tea mautiana, go usa mukumuku e dika; ma nigo naraem̃a e pei narae ni nagoroi masausara sikai, ku karai naga p̃a maliere.

⁴Go ku da pae asa pioso paki nau mau, po naga, Mama, ku pei tagu ri ni navei‐naatara‐ana aginau, kite?

⁵Ega wo mauti namaetoana aneana pa pa ega tu mau du, kite? Ega wo mauti a pa pa paki namatap̃ago edaku, kite? P̃a leo, ku pasa po mari naleo sa maga, go ku mari namasauana anigo.

⁶Go doko naaleatia maga ki nawota Yosiah, Yehovah e moro noa kinau, e naga, Nigo ku punusi tea waina Israel e mari a, naga e dowo kitaku, po sake paki sara tava vakilagi pano, po paki melu ni sara nakau mamalakesa, go tokora wanogoe e mari namaripeleana asa, kite?

⁷Go ragi waina e mari sua tea mamau puti wanogoe, a noa naga ega liliu umai punusi au; ma e da liliu umai punusi au mau: go taina malauweluki, Yudah nogo, e punusi a.

⁸E punusi naga a doropusi Israel waina e dowo kitaku, po dua e tusi ni natoropusiana sikai, nalakena namaripeleana maga mamau puti waina e mari ra; ma taina malauweluki Yudah e da mataku mau, ma nae ma e pano po mari namaripeleana.

⁹Go e pakilina nalakena e midoa ki nia naga namasausaraana e pei tea m̃oli paki nia, naga e mari navanua e loa, go e maripele paki vatu maga go paki nalakelake ni nakau maga.

¹⁰E mari tea mamau puti wanogoe, ma taina malauweluki Yudah e da liliu umai punusi au ki nap̃op̃ona mamau mau, ma ki namarisoreana, Yehovah e noa e.

¹¹Go Yehovah e noa kinau, e naga, Israel waina e dowo kitaku, e dum̃ana pisei ki nia naga e leana liu Yudah waina e mari malauweluki.

¹²P̃a vano po dogorogo ki navasaana maga waia paki taleva ni north, po naga, P̃a liliu umai, nigo Israel waina ku dowo kitaku, Yehovah e noa e; aga wo da leo paki‐go namaetoana mau: nalakena kinau a dodomi, Yehovah e noa e, aga wo da pavaigoro namaetoana pa pa po du mau du mau.

¹³Ma p̃a atae namarinaleotageleana anigo, naga ku mari p̃auluulu dip̃a Yehovah Sup̃e anigo, go ku sapura ki namariana anigo maga paki sup̃e p̃ota maga melu ni sara nakau mamalakesa, go ku da dogo parati ki nadaleogu mau, Yehovah e noa e.

¹⁴Kuga liliu, natugu maga O, waina ku dowo kitaku, Yehovah e noa e; nalakena kinau a pei amuwota: go aga wo piragi lua mu, sikai m̃elu natokoana sikai, go edua m̃elu naworawora sikai, sikasikai sarasara ra, go aga wo piragi lua mu umai paki Sion:

¹⁵Go aga wo dua mu tea leoparatiki maga waina eu dausi nap̃op̃ogu, waina euga wo pagani mu ki naataeana go ki namidoakiataeana.

¹⁶Go ega wo pakilina, ragi waina kuga wo pavakawora po laapa navanua, doko naaleatia maga wanogoe, Yehovah e noa e, euga wo da moro noa naga, Areka ni navasasokiana ki Yehovah; go ega wo da moro umai paki namidodoana mau: go euga wo da moro midoa ki nia mau; go euga wo da moro pa punusi a mau; go ega wo da moro pei tea mariana mau.

¹⁷Doko ragi wanogoe euga wo soso Yerusalem ki malo tasake ki Yehovah; go nalauna maga mamau puti euga wo pei tea viragi‐saisai‐kiana paki asa, paki nagisa ni Yehovah, paki Yerusalem: go euga wo da moro surata dausi namidoakip̃aiana sa ni nap̃op̃oda mau.

¹⁸Doko naaleatia maga wanogoe nasum̃a ni Yudah ega wo puluti nasum̃a ni Israel, go euga wo pulutaki m̃elu dua ki navanua ni north umai paki navanua waina a dua tamamu maga asa naga ega vei tea veanipiolikiana sikai.

¹⁹Ma kinau a noa naga, Ega tapale sava naga aga lawo ki‐go m̃aleoputo ni natugu maga, po dua ko navanua masauniana sikai, tea veanipiolikiana wia liu ni taua maga ni nalauna maga? Go a noa naga, Kuga wo soso au ki Mama; go kuga wo da maradoa m̃elu dua kinau pano mau.

²⁰Ma dapala waina nagoroi laki sikai e mari malauweluki po m̃elu dua ki anawota pano, dapala nogoe nigo ma ku mari malauweluki paki nau, nasum̃a ni Israel O, Yehovah e noa e.

²¹Nadaleo sikai e pei tea rogoana tokora vakilagi maga, natagiana go navavaraniana maga ki Israel natuna maga; nalakena eu dum̃ada p̃eluakidoa napua adeada, eu malio ki Yehovah Sup̃e adeada.

²²Kuga liliu, nimu natugu maga waina ku dowo kitaku, kinau aga wo maripauri mu m̃elu dua ki narowo‐kitakuana animu maga. P̃a leo, au po umai punusi ko; nalakena ku pei Yehovah Sup̃e aginami.

²³Lomau e pei nasaralomauana sorosoro sikai waina eu do leogoro namautipauriana pae tava sula maga, go pae nalaapaana ni tava warua maga: lomau namautipauriana ni Israel e doko Yehovah Sup̃e aginami.

²⁴Ma pae ragi ni naveinatureai‐ana aginami, naleo ni namaliereana wanogoe e dinomi tea mamau puti waina tamagami maga eu p̃osiwosi ki nia; navata ni shiip adeada maga go navata ni katel adeada maga, natuda naanoai maga go natuda nagoroi maga.

²⁵Tuga one natano namaliereana anigida, go nadododaoana anigida ega kovagoro gida: nalakena tu mari naleo sa dip̃a Yehovah Sup̃e anigida, nigida go tamagida maga, pae ragi ni navei‐natureai‐ana anigida, pa pa paki naaleatia waia: go tu da dogo parati ki nadaleo ni Yehovah Sup̃e anigida mau.