Read Nguna Togoa Etafe North YEREMIAH 30 Bible Online

YEREMIAH 30 - Nguna Togoa Etafe North bible

YEREMIAH 30

¹Navasaana waina e pae Yehovah umai paki Yeremiah, waina e naga,

²Yehovah Sup̃e ki Israel e noa dapala nea, e naga, P̃a midiri navasaana maga mamau puti waina a noa ki‐go asa euga toko tusi sikai.

³Nalakena p̃a leo, naaleatia maga euga wo umai, Yehovah e noa e, go aga wo piragi liliua ki naviragilua‐pavakotoana ni narei aginau Israel go Yudah, Yehovah e noa e: go aga wo mari ra euga liliu paki navanua waina a dua tamada maga asa, go euga wo peani pioli ki nia.

⁴Go tea maga waia eu pei navasaana maga waina Yehovah e noa e nalo ni Israel go nalo ni Yudah.

⁵Yehovah e noa dapala nea, e naga, A dogo nadaleo sikai ni naruruuruana, ni namatakuana, go e da pei tea ni natam̃ateana mau.

⁶Kuga vusuusu, po midoakiusiusi, mase naanoai sikai e pe mariatae dogo navitinuana ni navisoloana, kite? Go ekasana a punusi naga sara naatam̃oli nam̃elearuda ero doko natap̃oida dakiusi nagoroi sikai waina e dogo navitinuana ni navisoloana, go naga naraeda eu datare?

⁷Awi! Nalakena naaleatia wanogoe e p̃arua, tea waina e dakiusi a e dika: e pei ragi ni narogokitesaana ki Yakob; ma nae ega wo pei tea mautiana m̃elu dua ki nia.

⁸Go ega wo pakilina naaleatia wanogoe, Yehovah ki taua maga e noa e, naga aga wo mari kotovi nakau nanoa aneana m̃elu dua ki nanoada, go aga wo pua kotovi natali solisoki adeada maga; go tea ni nalauna p̃ota maga euga wo da moro mari ra euga vei tea suasua adeada maga mau:

⁹Ma euga wo magi Yehovah Sup̃e adeada suasua, go magi nawota adeada David, waina aga wo madeada sike lawo ki nia.

¹⁰Nalakena tea wanogoe, p̃a ta mataku mau, tea suasua aginau Yakob O, Yehovah e noa e; go p̃a ta m̃anaunau mau, Israel O: nalakena p̃a leo, aga wo pualua ko m̃elu dua ki uvea umai, go naworam̃a m̃elu dua ki navanua ni naviragi‐lua‐pavakotoana adeada: go Yakob ega wo liliu, go ega wo doko dam̃ate, po doko p̃ia doko, go te naata ega wo da mari a ega mataku mau.

¹¹Nalakena kinau a sikoti ko naga aga mauti ko, Yehovah e noa e: nalakena aga wo mari puoli ki nalauna maga mamau puti waina a daperavera ki‐go usuraki ara, ma aga wo da mari puoli ki‐go mau; ma aga wo parati ko navaratiana leana, go aga wo da noa naga sogi e puoli ki‐go mau.

¹²Nalakena Yehovah e noa dapala nea, e naga, Namari‐sa‐ki‐go‐ana ega wo da makoto mau, go wotu anigo e sa p̃arua liu.

¹³Tea waina ega vululu navululuana anigo e dika, naga p̃a vei tea vivisiana: tea ni namaripauri‐ko‐ana e dika.

¹⁴Tea dodomi ko maga mamau puti eu malio ki‐go; eu da moro midoa ki‐go mau: nalakena kinau a atugi ko ki naatugiana ni nakokonaana sikai, ki navaratiana ni tea dodotika sikai; nalakena namarinaleotageleana anigo e p̃arua, nalakena namarinaleosaana anigo maga eu laapa.

¹⁵Ekasana ku do kuapioso narogokitesaana anigo? Navitivitinuana anigo e mari sa nopu mau: nalakena namarinaleotageleana anigo e p̃arua, nalakena namarinaleosaana anigo maga eu laapa, e pei nalakena a mari ko ki tea mamau puti waia.

¹⁶Nalakena tea wanogoe tea maga mamau puti waina eu dinomi ko, euga wo pei tea dinomiana; go tea kokona ki‐go maga sara naata kakada, euga wo pei tea viragi‐lua‐pavakotoana; go tea maga waina eu puti lua pavakoto ako, euga wo pei tea vuti‐luapavakotoana sikai, go tea maga mamau puti waina eu dape pavakoto ako, aga wo pitua ki da euga vei tea tape‐pavakotoana.

¹⁷Nalakena aga wo mari ko p̃a moro p̃ia, go aga wo mari wotu anigo maga euga apu, Yehovah e noa e; nalakena eu soso ko ki tea kopasiluaana sikai, doko do naga, Tea waia e pei Sion, waina te naata e da midoa ki nia mau.

¹⁸Yehovah e noa dapala nea, e naga, Kuga leo, aga wo piragi liliua ki tap̃aup̃au maga ni Yakob waina eu pei tea viragi‐luapavakotokiana, po maritadodomi nasum̃atokoana aneana maga; go natokoana ega wo moro pei tea tavagiana doko tokora makaka kakana, go nasum̃a warua ega wo moro doko tokora waina e pea doko asa sala vea.

¹⁹Nalegaana maga ni nasamasamaana euga wo pei tea rogoana m̃elu ara, go nadaleo ni tea maga waina eu do laelaea: go aga wo mari ra euga vavakawora, go euga wo da pisa maau mau; go aga wo mari ra euga vei tea dodomadaganiana, euga wo da pei tea dododaoana mau.

²⁰Go natuda maga euga wo moro dapala sala vea, go nasaisaiana adeada ega wo pei tea lawosokiana doko naraegu, go aga wo parati tea maga mamau puti waina eu diesoki ra.

²¹Go tea maraki adeada ega wo pei naatam̃oli adeada sikai, to tea maramara adeada ega wo m̃elu m̃aleoputo kakada; go aga wo mari a ega wo disu paki m̃aladigi, go ega wo umai paki m̃aladigi kinau: nalakena sei e pe tum̃ana piviari naga e pe umai paki m̃aladigi kinau?

²²Yehovah e noa e. Go nimu kuga wo pei narei aginau, go kinau aga wo pei Sup̃e animu.

²³Kuga leo, suitaviro ki Yehovah, namaritausuana aneana nogo, e po dave pano, e pei suitaviro warua liu sikai: ega wo atugi nap̃au ni tea sigisigileo.

²⁴Namaetoana vivitinu ki Yehovah ega wo da liliu mau, pa pa nae ega wo pakavuro, go pa pa ega wo mari sua namidoakip̃otae‐ana maga ni nap̃op̃ona: doko naaleatia edaku maga, kuga wo midoaki atae tea wanogoe.