Read Nguna Togoa Etafe North YEREMIAH 31 Bible Online

YEREMIAH 31 - Nguna Togoa Etafe North bible

YEREMIAH 31

¹Ragi wanogoe, Yehovah e noa e, kinau aga wo pei Sup̃e ki naworawora maga mamau puti ni Israel, go nara euga wo pei narei aginau.

²Yehovah e noa dapala nea, e naga, Narei waina lova e doropusi ra eu doko, eu pap̃ai nasaup̃iaana masop̃alo; Israel nogo, ragi waina e laaga naga ega veani namaromaroana.

³Yehovah e pakilina ki nia pae uvea, po naga, Kinau a dodomi ko ki nadodomiana sikai waina e doko po doko mau doko: nalakena tea wanogoe naveilomauana aginau paki‐go e da makoto mau.

⁴Aga wo moro davagi ko, go p̃a wo pei tea tavagiana, nagoroi atara ni Israel O: p̃a wo moro dum̃am̃a dekei ki‐go ki timbrel anigo maga, po dave pano doko nasaleana maga ki tea mari katakata maga.

⁵P̃a wo moro lawo roara maga ni vaine tava maga ni Samaria: tea lalawo maga euga wo lalawo, po laelaea nawa kakada.

⁶Nalakena naaleatia sikai ega wo doko, ragi waina tea leleogoro maga waina eu doko tava maga ni Efraim euga wo pioso, po naga, Kuga tuleana, go tuga sake paki Sion pano punusi Yehovah Sup̃e anigida.

⁷Nalakena Yehovah e noa dapala nea, e naga, Kuga kola laelaea nalakena Yakob, po sike nararasaana nalakena nap̃au ni nalauna maga: kuga rogorogo ki nia, kuga samasamani a, po naga, Yehovah O, p̃a mautipauri narei anigo, namagovai ni Israel.

⁸Kuga leo, aga wo piragi lua ra m̃elu navanua ni north umai, po piragi saisai ki da m̃elu namatap̃ago maga ni maramana umai, nara ma tea kesa, go tea vei pito, go nagoroi vivilake go tea waina e dogo navitinuana ni navisoloana euga mamau: ega vei taua warua sikai waina ega wo liliu umai paki nea.

⁹Euga wo umai, euga wo umai, euga wo dagi, go aga wo maraki ra ki navasapakavakaleana maga: aga wo mari ra euga wo surata pisari nap̃ap̃a noaisara maga, doko napua leana sikai waina euga wo da dapilagona asa mau: nalakena kinau a pei tama ni Israel, go Efraim e pei natugu takalapa.

¹⁰Kuga rogo navasaana ki Yehovah, nimu nalauna maga O, po dogorogo ki nia naureure maga ni uvea, po naga, Nae waina e daperavera ki Israel, ega wo piragi saisai ki nia, po pavaigoro e, dapala waina tea leoparatiki sikai e do pavaigoro navata aneana.

¹¹Nalakena Yehovah e daulua Yakob, po pualua e m̃elu dua ki nam̃elearu ni tea waina e kasua liu sa.

¹²Go euga wo umai po lega lagi doko tokora vakilagi ni Sion, go euga wo mamau puti sara paki nawiaana ki Yehovah, paki korn, go paki waine, go paki naroro, go paki tea vusavusa maga ni navata ni shiip go ni navata ni katel: go naatada ega wo dakiusi roara puevueana sikai; go euga wo da moro dogokitesa mau.

¹³Ragi wanogoe nagoroi atara ega wo laelaea nasaleana, go natureai maga go namariki maga euga wo mamau puti mari katakata: nalakena aga wo doa nasusueana adeada ega vei nalaelaeaana, go aga wo pasa pakavakale ra, po dua ra nakola‐laelaeaana oli narogokitesaana adeada.

¹⁴Go aga wo mari naata ni tea viri maga ega wo puka ki tea m̃anopunopu, go narei aginau euga wo maro nawiaana aginau, Yehovah e noa e.

¹⁵Yehovah e noa dapala nea, e naga, Nadaleo sikai e pei tea rogoana doko Ramah, nalalagaarovaana, go natagiana warua, Rahel e do dagisi natuna maga; e karai naga ega vei tea vasapakavakaleana nalo ni natuna maga, nalakena eu puoli.

¹⁶Yehovah e noa dapala nea, e naga, P̃a soki nadaleom̃a m̃elu dua ki natagiana, go namatam̃a ki naririmata maga: nalakena aga wo lagati dua ko ega vataka ni nawosiana anigo, Yehovah e noa e; go euga wo pae navanua ki tea kokona ki da liliu umai.

¹⁷Go ragi edaku p̃a wo peani naleogoroana, Yehovah e noa e; go natum̃a maga euga wo moro liliu umai paki navanua adeada.

¹⁸A dogo Efraim waina e dum̃ana dagisi a dapala nea, e naga, Ku parati au, go a pei tea varatiana, dapala kau vusavusa sikai waina e da atae nakau ni nanoa mau: p̃a viragi au liliu, naga aga vei tea viragi‐liliua‐kiana, nalakena ku pei Yehovah Sup̃e aginau.

¹⁹Nalakena ragi waina a maradoa pano, a moro midoakidoa; go ragi waina a pei tea varatiana, a dum̃agu dapagi namaogu: a maliere, go a pinovinoi, nalakena a dapetape nadododaoana ni navei‐natureai‐ana aginau.

²⁰Efraim e pei natugu waina a dodomi a, e pei piakiki wia sikai; go ragi waina a do pasa dip̃a e, a do midoa ki parati ki nia: nalakena tea wanogoe nap̃op̃ogu e m̃aem̃ae nalo kakana; aga wo maritadodomi a, Yehovah e noa e.

²¹P̃a tum̃am̃a manigo lawo ki navaivaiana maga napua, p̃a tum̃am̃a manigo lawo ki tea lawodu ni namaraki‐pisei‐kiana maga: p̃a midoa ki parati ki m̃ata ki napua anigo waina ku pae asa pano: p̃a moro liliu, nagoroi atara ni Israel O, p̃a moro liliu umai paki natokoana anigo maga waia.

²²P̃a wo surata dagiagi pa pa paki seve ragi, nagoroi atara O, waina ku dowo kitaku? Nalakena Yehovah e dawona ki naleo vau sikai maramana, Nagoroi ega wo moro liliu paki naanoai.

²³Yehovah ki taua maga, Sup̃e ki Israel, e noa dapala nea, e naga, Euga wo moro noa navasaana maga waia navanua ni Yudah, go natokoana kakana maga, ragi waina aga wo moro piragi liliua ki da, euga wo naga, Yehovah ega vasap̃ia ki‐go, natokoana ni naleanaana O, tava tapu O.

²⁴Go tea wosiwosi natano maga, go tea leoparatiki shiip maga, euga wo mamau puti doko Yudah go natokoana kakana maga.

²⁵Nalakena aga wo pakamaromaro ki naata waina e mawosa, go sara naata waina eu manainai, aga wo paka mauri ki da.

²⁶Go ragi wanogoe a darapa, po moro leleo, go namaturuana aginau e mari p̃ia kinau.

²⁷Kuga leo, naaleatia maga euga wo umai, Yehovah e noa e, go aga wo sapura ki naworawora ni naatam̃oli, go naworawora ni nalo tuavati, doko nasum̃a ni Israel go doko nasum̃a ni Yudah.

²⁸Go ega wo pakilina, naga dapala waina a pavaigoro ra naga aga vaku dakati go naga aga rakai, go naga aga tap̃olosiwo ki go naga aga mari puoli ki, go naga aga riesoki; dapala nogoe aga wo moro pavaigoro ra naga aga tavagi go naga aga lalawo, Yehovah e noa e.

²⁹Doko naaleatia maga wanogoe euga wo da moro noa naga, Tamada maga eu gani nawa ni vaine malimali, go natuda maga napatida eu mate.

³⁰Ma euga wo mate, sara naata sikasikai dip̃a namarinaleotageleana adeada: sara naata waina e pe tum̃ana gani nawa ni vaine malimali, napatina maga eu pe wo mate.

³¹Kuga leo, naaleatia maga euga wo umai, Yehovah e noa e, go aga wo mari navasasokiana vau sikai paki nasum̃a ni Israel, go paki nasum̃a ni Yudah:

³²Ega wo da dakiusi navasasokiana waina a mari a paki tamada maga mau, naaleatia waina a puati nam̃elearuda naga aga viragi lua ra m̃elu dua ki navanua ni Ityipt umai; navasasokiana aginau wanogoe eu dapiri a, go kinau a pei adawota, Yehovah e noa e.

³³Ma tea waia e pei navasasokiana waina aga wo mari a paki nasum̃a ni Israel edaku ki naaleatia maga wanogoe, Yehovah e noa e; aga wo doropusi nawotaeana aginau ega toko nap̃alauda, go aga wo midiri a nap̃op̃oda; go kinau aga wo pei Sup̃e adeada, go nara euga wo pei narei aginau:

³⁴Go euga wo da moro dum̃ada pasa pisei ki da sara naata sikasikai paki tea ni m̃aladigi ki nia mau, go sara naata sikasikai paki taina, doko do naga, P̃a atae Yehovah: nalakena euga wo mamau puti atae au, ega vae tea vakitano kakada pa pa paki tea vakilagi kakada, Yehovah e noa e: nalakena aga wo madeada midoakikorokoro namarinaleotageleana adeada, go namarinaleosaana adeada, aga wo da moro midoa ki nia mau.

³⁵Yehovah waina e mari elo naga ega vei nasulu sikai ni aleati, go waina e mari natawonakiana maga ni atelagi go ni m̃asoe maga, naga euga vei nasulu sikai ni p̃ogi, waina e dap̃otae natasi waina napeao kakana maga eu do saruru; Yehovah ki taua maga e pei nagisana: nae e noa dapala nea, e naga,

³⁶Natawonakiana maga wanogoe eu pe m̃elu dua ki naraegu pano, Yehovah e noa e, naworawora ni Israel nara ma eu pe wo da moro pei nalauna sikai naraegu mau pa pa pa.

³⁷Yehovah e noa dapala nea, e naga, Nakoroatelagi ni elagi e pe mariatae pei tea rowogiana, go laketano maga ni maramana etano eu pe mariatae pei tea leousiusiatae‐ana, kinau ma a pe wo mari puoli ki naworawora ni Israel mamau puti nalakena tea mamau puti waina eu mari a, Yehovah e noa e.

³⁸Kuga leo, naaleatia maga euga wo umai, Yehovah e noa e, go natokoana ega wo moro magi Yehovah pei tea tavagiana, ega vae nasum̃a varau pakilagi ki Hananel pa pa liliu namata‐pua ni naweluki.

³⁹Go namea totowo ega wo dave po leana pano pa pa liliu tava Careb, go ega wo pei tea roaana tokora wanogoe po pano pa pa liliu Coah.

⁴⁰Go nap̃aloa mamau ni nap̃atoko mate maga, go ni natano‐apu maga, go vanua maga mamau puti pa pa liliu nap̃ap̃a noaisara Kidron, pa pa liliu naweluki ni namata‐pua ni horse paki taleva ni elo sake, ega wo pei tea tapu paki Yehovah; ega wo da moro pei tea vaku‐dakatiana, kite dap̃olosiwokiana mau pa pa pa.