Read Nguna Togoa Etafe North YEREMIAH 32 Bible Online

YEREMIAH 32 - Nguna Togoa Etafe North bible

YEREMIAH 32

¹Navasaana waina e pae Yehovah umai paki Yeremiah doko natau kerualima sikai ki Sedekiah nawota ni Yudah, waina e pei natau kerualima sikai tamate latolu ki Nebukadnessar.

²Go doko ragi wanogoe naatam̃oli maga ni navakalo ki nawota ni Babelon eu kelugoro Yerusalem: go profeta Yeremiah e pei tea kokoroana doko roara ki tea vavaigoro maga, waina e doko nasum̃a ki nawota ni Yudah.

³Nalakena Sedekiah nawota ni Yudah e kokoro e, doko do naga, Ekasana ku do peanoasai, doko do naga, Yehovah e noa dapala nea, e naga, Kuga leo, aga wo pitua ki natokoana waia paki nam̃elearu ni nawota ni Babelon, go nae ega wo dapepavakoto asa;

⁴Go Sedekiah nawota ni Yudah ega wo da pei tea mautiana m̃elu dua ki nam̃elearu ni naka ni Kaldea mau, ma ega wo pei tea vituakiana paki nam̃elearu ni nawota ni Babelon, go eroga wo dum̃ada pasa paki da, narae paki narae, go namata paki namata;

⁵Go nae ega wo piragi lua pavakoto Sedekiah paki Babelon pano, go ega wo doko tokora wanogoe doko pa pa aga wo pano po leo punusi a, Yehovah e noa e: ku pe marimari paki naka ni Kaldea, ma ku pe wo da marimatua ki da mau?

⁶Go Yeremiah e naga, Navasaana ki Yehovah e pakilina kinau, doko do naga,

⁷P̃a leo, Hanamel natu ni aloam̃a Shallum, ega wo pakilina ki‐go, go ega wo naga, P̃a tum̃am̃a manigo pakotovi vanua aginau waina e doko Anathoth: nalakena e leana ki‐go ki natauluaana naga p̃a vakotovi a.

⁸Dapala nogoe Hanamel natu ni aloagu e umai punusi au roara ni tea vavaigoro maga pataka ni navasaana ki Yehovah, po noa kinau, e naga, A pavara ni ko, p̃a vakotovi vanua aginau waina e doko Anathoth, waina e doko navanua ni Benyamin: nalakena e pei tea anigo naga p̃a veani pioli ki nia, go e leana ki‐go naga p̃a taulua e; p̃a tum̃am̃a manigo pakotovi a. Go kinau a atae naga tea wanogoe e pei navasaana ki Yehovah.

⁹Go a pakotovi vanua wanogoe waina e doko Anathoth paki Hanamel natu ni aloagu, po maneana dowogi m̃ane kakana, e pei shekel ni silver rualima sikai tamate larua.

¹⁰Go a midiri nagisagu tusi ni navakotoviana, po pulusoki a, po soso tea noasokisoki maga umai, po maneana dowogi m̃ane kakana lasa rowogi.

¹¹Go a dape tusi wanogoe ni navakotoviana ni natano, tea waina e pei tea vulusokiana, pataka ni nawotaeana go ni natomariana, nara ma tea waina e da pei tea vulusokiana mau, ero dua puti:

¹²Go a pitua ki tusi ni navakotoviana ni natano wanogoe paki nam̃elearu ni Baruk natu ni Neriah, natu ni Maseiah, doko narae ni Hanamel natu ni aloagu, go doko narae ni tea noasokisoki maga waina eu midiri nagisada tusi ni navakotoviana ni natano wanogoe, doko kivea ki naka ni Yudea mamau puti waina eu doko natano roara ni tea vavaigoro maga.

¹³Go a pasa parati ki Baruk doko naraeda,

¹⁴po naga, Yehovah ki taua maga, Sup̃e ki Israel, e noa dapala nea, e naga, P̃a tape tusi dua waia ni navakotoviana ni natano, tea waia waina e pei tea vulusokiana, go kerua waia waina e da pei tea vulusokiana mau, po pai ra lasa sikai ni naruku; naga euga toko, po doko mau doko.

¹⁵Nalakena Yehovah ki taua maga, Sup̃e ki Israel, e noa dapala nea, e naga, Nasum̃a maga go vanua maga go roara maga ni vaine euga wo moro pei tea vakotoviana navanua waia.

¹⁶Go a pitua ki tusi ni navakotoviana ni natano wanogoe paki nam̃elearu ni Baruk natu ni Neriah, go edaku ki tea wanogoe a dapasavasa paki Yehovah,

¹⁷po naga, Yehovah Sup̃e O, p̃a leo, nigo ku mari nakoroatelagi go maramana ki namarimatuaana warua anigo go ki aru saikiana anigo; tea waina e kasua liu paki‐go naga ku mari sap̃o mari a, e dika:

¹⁸Nigo ku maritadodomi taua manu laapa, go ku lagati pitua ki namarinaleotageleana ki tamada maga paki narum̃a ni natuda maga waina eu edakugoro ra: Sup̃e warua, Tea Kasua Mau, Yehovah ki taua maga e pei nagisana:

¹⁹Ku pei tea warua nalo ni namidoakip̃otaeana, go ku pei tea marimatua nalo ni nawosiana: namatam̃a ero do leo punusi napua maga mamau puti ki naatam̃oli natuda maga; naga p̃a tua ra sara naatam̃oli sikasikai ega vataka ni napua adeada maga, go ega vataka ni nawa ni natomariana adeada maga:

²⁰Ku lawo ki navaivaiana maga go tea ni namagaana maga eu doko navanua ni Ityipt pa pa paki naaleatia waia, go doko Israel go m̃aleoputo ni naatam̃oli maga mamau puti; go ku dum̃am̃a manigo mari nagisa sikai, dapala waina e doko naaleatia waia;

²¹Go ku piragi lua narei anigo Israel m̃elu dua ki navanua ni Ityipt umai, ki navaivaiana maga, go ki tea ni namagaana maga, go ki nam̃elearu kasua sikai, go ki aru saikiana sikai, go ki namatakuana warua liu sikai;

²²Go ku dua ra navanua waia, waina ku pivisa paki tamada maga naga p̃a tua ra asa, navanua sikai waina e sara ki milk go ki honi;

²³Go eu rumai paki asa, po peani pioli ki nia; ma eu da dogo parati ki nadaleom̃a mau, kite surata nawotaeana anigo mau; eu da mari te navatuna waina ku dip̃aki da naga euga mari a mau: nalakena tea wanogoe ku mari nasaana mamau puti waia e pa parati ki da:

²⁴P̃a leo, natauakiana maga eu po umai dip̃a natokoana naga euga marimatua ki nia; go natokoana e pei tea vituakiana paki nam̃elearu ni naka ni Kaldea waina eu do marimari dip̃a e, nalakena lova, go navitoloana, go nasasanaana sa: go tea waina ku pasa asa, e po lolomana; go p̃a leo, ku punusi a.

²⁵Go ku noa ki nau, Yehovah Sup̃e O, ku naga, P̃a tum̃am̃a manigo pakotovi vanua ki m̃ane, po soso tea noasokisoki maga umai; ma natokoana e pei tea vituakiana paki nam̃elearu ni naka ni Kaldea.

²⁶Go navasaana ki Yehovah e umai paki Yeremiah,

²⁷po naga, P̃a leo, kinau a pei Yehovah, Sup̃e ki nap̃okasi mamau puti: te navatuna sikai e doko waina e kasua liu au dapala waina a mari sap̃o mari a, kite?

²⁸Nalakena tea wanogoe Yehovah e noa dapala nea, e naga, Kuga leo, aga wo pitua ki natokoana waia paki nam̃elearu ni naka ni Kaldea, go paki nam̃elearu ni Nebukadnessar nawota ni Babelon, go nae ega wo marimatua ki nia:

²⁹Go naka ni Kaldea, waina eu do marimari dip̃a natokoana waia, euga wo umai po dokoni natokoana waia ki nakapu, po dap̃ara ki nia, go nasum̃a kakana maga, waina eu pitua ki tea ni nap̃o wia nam̃asua ni nap̃au ni nasum̃a kakana maga paki Baal, po daki navituaana takiana maga paki sup̃e p̃ota maga, po mari au a maeto ki da.

³⁰Nalakena Israel natuna maga go Yudah natuna maga eu mari tea waina e sa namatagu pae ragi ni navei‐natureai‐ana adeada pa pa pa: nalakena Israel natuna maga eu mari au a maeto ki nawosiana ni nam̃elearuda maga, Yehovah e noa e.

³¹Nalakena natokoana waia e mari p̃auluulu paki nau, po mari au a maeto po maritausu pae naaleatia waina e pei tea tavagiana asa pa pa paki naaleatia waia; dapala waina aga wo mari puoli ki nia m̃elu dua ki namatagu:

³²Nalakena namariana sa mamau puti ki Israel natuna maga go ki Yudah natuna maga, waina eu mari p̃auluulu paki nau asa, naga a maeto ki da, nara ma nawota adeada maga, go tea maraki adeada maga, go tea viri adeada maga, go profeta adeada maga, go naatam̃oli maga ni Yudah, go naatatoko maga ni Yerusalem.

³³Go eu atutaku paki nau, go e da pei naraeda mau: go a pasa pisei ki da pitip̃atip̃a, ma eu da daki dorogo naga euga tape natapavanauana mau.

³⁴Ma eu lawo ki tea mamaragokiana adeada maga ekopu ni nasum̃a waina e pei tea salagisana ki nagisagu, po mari a e pei tea m̃oli.

³⁵Go eu davagi tokora vakilagi maga ki Baal, waina eu doko nap̃aloa ni natu ni Hinnom, naga euga vitua ki natuda naanoai maga go natuda nagoroi maga euga vei navituaana tap̃arakiana maga paki Molek; waina kinau a da dip̃aki da asa mau, go waina e da umai paki namidodoana aginau mau, naga euga mari tea mamaragokiana wanogoe; naga euga mari Yudah euga mari naleo sa.

³⁶Go nalakena tea wanogoe, Yehovah Sup̃e ki Israel e noa dapala nea nalo ni natokoana waia waina ku noa nalo kakana, ku naga, E pei tea vituakiana paki nam̃elearu ni nawota ni Babelon ki lova, go ki navitoloana, go ki nasasanaana sa:

³⁷e naga, Kuga leo, aga wo piragi saisai ki da m̃elu dua ki navanua maga mamau puti waina a kopasi lua ra paki asa pano, doko namaetoana go doko namaritausuana aginau, go doko namaritausuana warua: go aga wo moro piragi liliua ki da umai paki tokora waia, go aga wo mari ra euga wo doko p̃ia doko:

³⁸Go euga wo pei narei aginau, go kinau aga wo pei Sup̃e adeada:

³⁹Go aga wo dua ra p̃op̃o sikai maau go napua sikai maau, naga euga matau ki nau pa pa pa; naga ega vei nawiaana adeada go nawiaana ki natuda maga waina euga wo edakugoro ra:

⁴⁰Go aga wo mari navasasokiana sikai paki da, waina ega wo du du po du mau du, naga aga wo da m̃elu dua ki da pano mau, go naga aga wo da makoto ki tea wia waina aga mari a paki da mau; go aga wo doro namatau‐kinau‐ana ega wo doko nap̃op̃oda, naga euga wo da maradoa m̃elu dua kinau pano mau.

⁴¹Go aga wo samasama ara naga aga mari tea wia paki da, go aga wo lawo ki da navanua waia doko naveilomauana ki nap̃op̃ogu mamau go ki naatagu mamau.

⁴²Nalakena Yehovah e noa dapala nea, e naga, Dapala waina a mari nasaana warua liu e pa parati ki narei waia, dapala nogoe aga wo moro mari nawiaana mamau puti waina a sai a paki da, ega wo pakilina ki da.

⁴³Go vanua maga euga wo pei tea vakotoviana navanua waia, waina ku noa nalo kakana, ku naga, E pei maso maladi, naatam̃oli go nalo tuavati e dika asa; e pei tea vituakiana paki nam̃elearu ni naka ni Kaldea.

⁴⁴Naatam̃oli maga euga wo pakotovi vanua maga ki m̃ane, po midiri nagisada maga tusi ni navakotoviana kakada maga, po pulusoki ra, po soso tea noasokisoki maga umai, doko navanua ni Benyamin, go doko tokora maga daliviri Yerusalem, go doko natokoana maga ni Yudah, go doko natokoana maga ni navanua ni tava maga, go doko natokoana maga ni malo matemate maga, go doko natokoana maga ni Sauth: nalakena aga wo piragi liliua ki naviragi‐luapavakotoana adeada, Yehovah e noa e.