Read Nguna Togoa Etafe North YEREMIAH 33 Bible Online

YEREMIAH 33 - Nguna Togoa Etafe North bible

YEREMIAH 33

¹Go navasaana ki Yehovah e moro umai paki Yeremiah sala kerua, ragi waina e ko pei tea kokoroana doko roara ni tea vavaigoro maga, e naga,

²Yehovah waina e mari maramana, Yehovah waina e dawona ki nia po lawo‐ki‐laketoko asa; Yehovah e pei nagisana:

³nae e naga, P̃a vioso paki nau, go aga wo pasadara ko, go aga wo pisei ki‐go naleo warua maga ni p̃aia waina ku da pea atae ra mau.

⁴Nalakena Yehovah, Sup̃e ki Israel, e noa dapala nea nalo ni nasum̃a maga ni natokoana waia, go nalo ni nasum̃a maga ki nawota maga ni Yudah, waina eu pei tea rakaiana naga euga vei nakokoro sikai dip̃a natauakiana maga ni nakelugoroana go dip̃a lova:

⁵e naga, Eu rumai naga euga marimari dip̃a naka ni Kaldea, ma e pei naga euga mari ra euga vura ki nap̃atoko mate maga ni naatam̃oli maga, waina kinau a atugi ra namaetoana aginau go namaritausuana aginau, go waina nasigisigileoana adeada e pei nalakena a dasuru ki naraegu paki natokoana waia.

⁶P̃a leo, aga wo piragi nawiaana go namaripauriana umai paki asa, go aga wo mari pauri ra; go aga wo madeada mari natam̃ateana go natokop̃iaana eroga wo dokolina ki da.

⁷Go aga wo piragi liliua ki tea viragi‐lua‐pavakotoana maga ni Yudah, go tea viragi‐lua‐pavakotoana maga ni Israel, go aga wo davagi ra euga wo moro doko ega tapala ragi vea.

⁸Go aga wo mari ra euga tautau m̃elu dua ki namarinaleotageleana adeada mamau puti, waina eu mari naleo sa asa dip̃a au; go aga wo madeada midoakikorokoro namarinaleotageleana adeada maga mamau puti, waina eu mari naleo sa asa dip̃a au, go waina eu mari natapiriana asa dip̃a au.

⁹Go natokoana waia ega wo maginau pei nagisa sikai ni nalaelaeaana, tea ni nasamasamaana sikai, go tea ni nasamasamaniana sikai, narae ni nalauna maga mamau puti ni maramana, waina euga wo dogo narogorogoana nalo ni nawiaana mamau puti waina aga wo mari a paki da, go euga wo mataku po duruuru nalakena nawiaana mamau go natam̃ateana mamau waina aga wo maneana mari a.

¹⁰Yehovah e noa dapala nea, e naga, Doko tokora waia waina nimu ku noa nalo kakana, ku naga, E pei maso maladi sikai, naatam̃oli go nalo tuavati eu dika asa; doko natokoana maga ni Yudah go napua maga ni Yerusalem waina eu maladi doko, naatam̃oli go naatatoko go nalo tuavati eu dika ara,

¹¹Doko tokora wanogoe nadaleo ni nalaelaeaana go nadaleo ni nasamasamaana ega wo moro pei tea rogoana asa, nadaleo ni tea vitawiri, go nadaleo ni tea laki, nadaleo ni tea maga waina eu naga, Tuga samasama ni Yehovah ki taua maga, nalakena Yehovah e p̃ia, nalakena nadodomiana aneana e du du po du mau du: go nadaleo ni tea maga waina eu do dape naviriana maga ni navasadodom̃atakiana umai paki ekopu ni nasum̃a ki Yehovah. Nalakena aga wo piragi liliua ki tea viragi‐lua‐pavakotoana maga ni navanua euga toko ega tapala waina eu doko ragi vea, Yehovah e noa e.

¹²Yehovah ki taua maga e noa dapala nea, e naga, Tokora waia waina e maladi doko, waina naatam̃oli go nalo tuavati eu dika asa, go natokoana kakana maga mamau puti, euga wo moro pei tokora tokoana maga ki tea leoparatiki maga ni shiip, tokora waina navata ni shiip adeada euga wo one natano asa.

¹³Doko natokoana maga ni navanua ni tava maga, go doko natokoana maga ni malo matemate, go doko natokoana maga ni Sauth, go doko navanua ni Benyamin, go doko tokora maga waina eu dalivirigoro Yerusalem, go doko natokoana maga ni Yudah, navata maga ni shiip euga wo moro liu pano etano ki nam̃elearu ni tea waina e do peve ra, Yehovah e noa e.

¹⁴Kuga leo, naaleatia maga euga wo umai, Yehovah e noa e, go aga wo pakavuro nasaiana aginau waina a noa sua e nalo ni nasum̃a ni Israel go nalo ni nasum̃a ni Yudah.

¹⁵Doko naaleatia maga wanogoe, go doko ragi sikai maau wanogoe, aga wo mari Ara sikai ni naleanaana ega wo magi David pei nasiri; go nae ega wo mari navasap̃otaeana go naleanaana navanua.

¹⁶Doko naaleatia maga wanogoe Yudah ega wo pei tea mautiana, go Yerusalem ega wo doko p̃ia doko: go nagisana waina ega wo pei tea salagisana asa ega vei tea waia, Yehovah e pei namarinaleoleanaana anigida.

¹⁷Nalakena Yehovah e noa dapala nea, e naga, Naatam̃oli sikai waina ega tasake malo tasake ni nasum̃a ni Israel, ega wo da puoli ki David mau;

¹⁸Go naatam̃oli sikai waina ega vitua ki navituaana tap̃arakiana maga, go waina ega tap̃ara ki naviriana maga ni navinaga, go waina ega mari naviriana maga ni sara ragi, ega wo da puoli ki tea viri maga, naworawora ni Levi mau.

¹⁹Go navasaana ki Yehovah e umai paki Yeremiah,

²⁰doko do naga, Yehovah e noa dapala nea, e naga, Waina ku pe mariatae mari kotovi navasasokiana aginau waina a mari a nalo ni naaleatia, go navasasokiana aginau waina a mari a nalo ni nap̃ogiana, dapala waina naaleatia go nap̃ogiana eroga wo da pakilina ragi ni natatutakiana kakada mau;

²¹Navasasokiana aginau paki tea suasua aginau David e pe moro mariatae pei tea marikotoviana, dapala waina natuna sikai waina ega maramara doko malo tasake aneana, ega wo dika; go navasasokiana aginau paki tea viri maga, naworawora ni Levi, tea suasua aginau maga, nae ma e pe mariatae pei tea marikotoviana tapala nogoe.

²²Dapala waina m̃asoe maga ni nakoroatelagi eu mari sap̃o pei tea veve‐atae‐ana, go dapala waina naworaone ni natasi e mari sap̃o pei tea rowogi‐atae‐ana; dapala nogoe aga wo mari naworawora ni tea suasua aginau David euga wo laapa, nara ma tea ni naworawora ni Levi waina eu do maginau suasua.

²³Go navasaana ki Yehovah e moro umai paki Yeremiah, doko do naga,

²⁴Ku da midoakiusiusi tea waina narei waia eu noa e, waina eu naga, Yehovah e dip̃adoa naworawora dua waina e dum̃ana matadoa ra, kite? Dapala nogoe eu midoaki p̃alo ki narei aginau, dapala waina eu da moro pei nalauna sikai namatada mau.

²⁵Yehovah e noa dapala nea, e naga, Kinau a pe ta lawosoki navasasokiana aginau waina a mari a nalo ni naaleatia go waina a mari a nalo ni nap̃ogiana, go a pe ta lawosoki natawonakiana maga nalo ni nakoroatelagi go nalo ni maramana mau;

²⁶A pe wo dip̃adoa naworawora ni Yakob, go ni tea suasua aginau David, po da matadoa tea sikai ni naworaworana waina ega maramara dap̃au naworawora ni Abraham, Isaak, go Yakob mau. Ma aga wo piragi liliua ki tea viragi‐luapavakotoana adeada maga, go aga wo maritadodomi ra.