Read Nguna Togoa Etafe North YEREMIAH 34 Bible Online

YEREMIAH 34 - Nguna Togoa Etafe North bible

YEREMIAH 34

¹Navasaana waina e pae Yehovah umai paki Yeremiah, ragi waina Nebukadnessar nawota ni Babelon, go naatam̃oli maga mamau puti ni navakalo aneana, go namarakiana maga mamau puti ni maramana waina eu doko etano ki naveinawotaana aneana, go narei maga mamau puti, eu mari navakalo dip̃a Yerusalem, go dip̃a natokoana kakana maga,

²e naga, Yehovah Sup̃e ki Israel e noa dapala nea, e naga, P̃a vano, po pasa paki Sedekiah nawota ni Yudah, po noa ki nia, p̃a naga, Yehovah e noa dapala nea, e naga, P̃a leo, kinau aga wo pitua ki natokoana waia paki nam̃elearu ni nawota ni Babelon, go nae ega wo dap̃ara ki nia ki nakapu:

³Go p̃a wo da pei tea mautiana m̃elu dua ki nam̃elearuna mau, ma p̃a wo pei tea vuasokiana, po pei tea vituakiana paki nam̃elearuna; go p̃a wo punusi nawota ni Babelon namata paki namata, go nae ega wo pasa paki‐go narae paki narae, go p̃a wo paki Babelon pano.

⁴Ma p̃a rogo navasaana ki Yehovah, Sedekiah nawota ni Yudah O: Yehovah e noa dapala nea nalo kakam̃a,

⁵e naga, P̃a wo da mate ki lova mau; P̃a wo mate natam̃ateana; go dapala natap̃arakiana maga waina eu magi tamam̃a maga mari a, nawota vea maga waina eu pea ki‐go nogo, euga wo moro manigo mari natap̃arakiana sikai ega tapala nogoe; go euga wo dagisi ko, doko do naga, Awi, nawota! Nalakena kinau a noa sua navasaana wanogoe, Yehovah e noa e.

⁶Go profeta Yeremiah e noa navasaana maga mamau puti wanogoe paki Sedekiah nawota ni Yudah doko Yerusalem,

⁷Ragi waina naatam̃oli maga ni navakalo ki nawota ni Babelon eu mari navakalo dip̃a Yerusalem, go dip̃a natokoana maga ni Yudah waina ero pei tea toropusiana doko, dip̃a Lakish go dip̃a Asekah nogo; nalakena nara dua ni natokoana p̃aakagoroana maga ni Yudah ero sikida pei tea toropusiana doko.

⁸Navasaana waina e pae Yehovah umai paki Yeremiah, edaku ki ragi waina nawota Sedekiah e mari navasasokiana sikai paki narei mamau puti waina eu doko Yerusalem, naga ega rogorogo ki naveresi‐m̃oli‐kiana sikai paki da;

⁹Naga sara naata sikasikai ega suasua ki tea suasua naanoai aneana, go naga sara naata sikasikai ega suasua ki tea suasua nagoroi aneana, waina eu pei naka ni Heberu, naanoai go nagoroi, naga euga vei tea veresi‐m̃oli‐kiana; naga te naata sikai ega ta mari taina, naka ni Yudea sikai, ega maneana suasua mau:

¹⁰Go eu dogo parati ki nia, tea maraki maga mamau puti go narei mamau puti, waina eu sili paki navasasokiana wanogoe, naga sara naata sikasikai ega suasua ki tea suasua naanoai aneana, go naga sara naata sikasikai ega suasua ki tea suasua nagoroi aneana, naga euga vei tea veresi‐m̃oli‐kiana, naga euga ta moro pei naviti adeada maga mau; eu dogo parati ki nia, po suasua ki da naga euga vei tea veresi‐m̃oli‐kiana:

¹¹Ma edaku ki tea wanogoe eu maradoa, po mari tea suasua naanoai maga wanogoe, go tea suasua nagoroi maga, waina eu suasua ki da naga euga vei tea veresi‐m̃oli‐kiana, eu mari ra eu moro liliu, po mari ra eu doko etano paki da naga euga vei tea suasua naanoai maga go tea suasua nagoroi maga:

¹²Nalakena tea wanogoe navasaana ki Yehovah e umai paki Yeremiah pae Yehovah,

¹³po naga, Yehovah Sup̃e ki Israel, e noa dapala nea, e naga, Kinau a mari navasasokiana sikai paki tamamu maga naaleatia waina a piragi lua ra m̃elu dua ki navanua ni Ityipt umai, m̃elu dua ki nasum̃a ni navei‐naviti‐ana, doko do naga,

¹⁴Ragi ni nanopuana ni natau kelarua, kuga wo suasua sara naata sikasikai ki taina, waina e pei Heberu sikai, waina e pei tea soriana paki‐go, go waina e manigo suasua natau latesa sua, p̃a suasua ki nia naga ega vei tea veresi‐m̃olikiana m̃elu dua ki‐go pano: ma tamamu maga eu da daki dorogo paki nau mau, kite daki nadaligada mau.

¹⁵Go nimu ku maradoa liliu, go ku mari tea waina e leana namatagu, doko do dogorogo ki naveresi‐m̃oli‐kiana, sara naata sikasikai paki tea ni m̃aladigi ki nia; go ku mari navasasokiana sikai naraegu ekopu ni nasum̃a waina e pei tea salagisana ki nagisagu:

¹⁶Ma ku moro maradoa pano, po mari m̃oli ki nagisagu, go ku sikasikai sarasara mu mari tea suasua naanoai animu, go tea suasua nagoroi animu, waina ku suasua ki da naga euga vei tea veresi‐m̃oli‐kiana naga euga tum̃ada mari namasauana adeada, ku mari ra eu moro liliu; go ku mari ra eu doko etano paki mu, naga euga manimu pei tea suasua naanoai maga go tea suasua nagoroi maga.

¹⁷Nalakena tea wanogoe Yehovah e noa dapala nea, e naga, Ku da dogo parati ki nau mau, ku da dogorogo ki naveresi‐m̃olikiana mau, sara naata sikasikai paki taina, go sara naata sikasikai paki tea ni m̃aladigi ki nia: kuga leo, Yehovah e noa e, kinau a dogorogo paki mu ki naveresi‐m̃oli‐kiana sikai paki lova, go paki nasasanaana sa, go paki navitoloana; go aga wo mari mu kuga vei tea duletuleakiana usuraki namarakiana maga mamau puti ni maramana.

¹⁸Go aga wo pitua ki naatam̃oli maga waina eu dapiri navasasokiana aginau, waina eu da mari pataka ni navasaana maga ni navasasokiana waina eu mari a naraegu, ragi waina eu daep̃orae kau natuna e dua asa, po surata pae namawota ni matele kakana maga;

¹⁹Tea maraki maga ni Yudah, go tea maraki maga ni Yerusalem, atavau maga, go tea viri maga, go naatatoko maga mamau puti ni navanua, waina eu surata pae namawota ni matele maga ni kau natuna wanogoe;

²⁰Tea maga mamau puti wanogoe aga wo pitua ki da paki nam̃elearu ni tea kokona ki da maga, go paki nam̃elearu ni tea maga waina eu laaga namauriana adeada: go nap̃atoko mate adeada maga euga wo pei navinaga ki manu maga ni namalopa, go ki nalo tuavati maga ni maramana.

²¹Go Sedekiah nawota ni Yudah go tea maraki aneana maga, aga wo pitua ki da paki nam̃elearu ni tea kokona ki da maga, go paki nam̃elearu ni tea maga waina eu laaga namauriana adeada, go paki nam̃elearu ni naatam̃oli maga ni navakalo ki nawota ni Babelon, waina eu m̃elu dua ki mu pano.

²²Kuga leo, aga wo pitip̃aki, Yehovah e noa e, po mari ra euga moro umai paki natokoana waia; go euga wo mari navakalo dip̃a e, po mari matua ki nia, po dap̃ara ki nia ki nakapu: go aga wo mari natokoana maga ni Yudah euga vei maso maladi sikai, naatam̃oli ega wo dika ara.