Read Nguna Togoa Etafe North YEREMIAH 35 Bible Online

YEREMIAH 35 - Nguna Togoa Etafe North bible

YEREMIAH 35

¹Navasaana waina e umai paki Yeremiah pae Yehovah naaleatia maga ki Yehoiakim natu ni Yosiah, nawota ni Yudah, waina e naga,

²P̃a vano, po punusi tea ni nasum̃a ki Rekab, go p̃a vasa paki da, po piragi ra umai paki ekopu ni nasum̃a ki Yehovah, paki ekopu ni em̃ago maga sikai kakada, po dua ra waine naga euga munugi a.

³Go dapala nogoe a piragi Yaasaniah natu ni Yeremiah, natu ni Habasiniah, nara ma taina maga, go natuna maga mamau puti, go tea maga mamau puti ni nasum̃a ki Rekab;

⁴Go a piragi ra umai paki ekopu ni nasum̃a ki Yehovah, paki ekopu ni em̃ago ki Hanan, natu ni Ikdaliah naatam̃oli ki Sup̃e natuna maga, waina e doko nadigi ni em̃ago ki tea maraki maga, waina e doko elagi ki em̃ago ki Maaseiah natu ni Shallum, tea vavaigoro namata:

⁵Go a lawo ki lasa munu maga waina eu pura ki waine, go lasa munu maga narae ni naatam̃oli maga ni nasum̃a ki Rekab, go a noa ki da, a naga, Kuga munu waine.

⁶Ma eu naga, Auga wo da munu waine mau: nalakena tamagami Yonadab natu ni Rekab, e dip̃aki gami, po naga, Kuga ta munu waine mau, nimu go natumu maga pa pa pa:

⁷Go kuga ta davagi nasum̃a sikai mau, kite sapura ki napati ni korn, kite lawo roara ni vaine kite pei talakea ni tea sikai mau: ma kuga toko tap̃aup̃au maga doko sara naaleatia ni namauriana animu; naga kuga mauri doko naaleatia laapa navanua waina ku m̃enaki atatoko asa.

⁸Go au dogo parati ki navasaana ki tamagami Yonadab natu ni Rekab pataka ni tea mamau puti waina e pasa parati ki gami asa, naga auga ta munu waine mau sara naaleatia ni namauriana aginau, kinami ma nagoroi aginami maga, go natugami naanoai maga go natugami nagoroi maga;

⁹Go naga auga ta maginami davagi nasum̃a maga naga auga toko ara mau: go au da pei talakea ni roara ni vaine kite vanua mau, go au dika ki korn:

¹⁰Ma au doko tap̃aup̃au maga, go au dogo parati ki po mari pataka ni tea mamau puti waina tamagami Yonadab e dip̃aki gami asa.

¹¹Ma ragi waina Nebukadnessar nawota ni Babelon e sake umai dip̃a navanua, au naga, Kuga umai, go tuga vaki Yerusalem pano, nalakena namatakuana nalo ni naatam̃oli maga ni navakalo ki naka ni Kaldea, go nalakena namatakuana nalo ni naatam̃oli maga ni navakalo ki tea ni Siria; go dapala nogoe au m̃enaki atatoko Yerusalem.

¹²Go navasaana pae Yehovah e umai paki Yeremiah, doko do naga, Yehovah ki taua maga,

¹³Sup̃e ki Israel, e noa dapala nea, e naga, P̃a vano, po noa ki naatam̃oli maga ni Yudah go ki naatatoko maga ni Yerusalem, p̃a naga, Kuga wo da pei tea vasa‐parati‐kiana naga kuga rogo parati ki navasaana aginau maga mau, kite? Yehovah e noa e.

¹⁴Navasaana maga ki Yonadab natu ni Rekab, waina e dip̃aki natuna maga asa, naga euga ta munu waine mau, eu pei tea vavaigoroana, go pa pa paki naaleatia waia eu da munugi a mau, nalakena eu dogo parati ki natip̃akiana ki tamada: ma kinau a pasa paki mu pitip̃atip̃a, go ku da daki dorogo paki nau mau.

¹⁵Go a dip̃aki lua tea suasua aginau profeta maga mamau puti pano punusi mu pitip̃atip̃a, doko do naga, Kuga maradoa liliu sara naata kakamu m̃elu dua ki napua sa animu, po midoakidoa pa dua ki natomariana animu maga, po da surata dausi sup̃e p̃ota maga naga kuga madeada suasua mau, go kuga wo doko navanua waina a dua mu asa, nimu ma tamamu maga: ma ku da daki nadaligamu mau, kite daki dorogo paki nau mau.

¹⁶Nalakena natu maga ni Yonadab natu ni Rekab eu mari pataka ni natip̃akiana ki tamada waina e dip̃aki da asa, ma narei waia eu da dogo parati ki nau mau;

¹⁷Nalakena tea wanogoe Yehovah Sup̃e ki taua maga, Sup̃e ki Israel, e noa dapala nea, e naga, Kuga leo, kinau aga wo piragi umai paki Yudah go paki naatatoko maga mamau puti ni Yerusalem, nasaana mamau puti waina a noa sua naga aga mari a dip̃a ra: nalakena a pasa paki da, ma eu da daki dorogo mau; go a pioso paki da, ma eu da pasadara mau.

¹⁸Go Yeremiah e noa ki tea ni nasum̃a ki Rekab, e naga, Yehovah ki taua maga, Sup̃e ki Israel, e noa dapala nea, e naga, Nalakena ku dogo parati ki natip̃akiana ki tamamu Yonadab, po pavaigoro navasaparatikiana aneana maga mamau puti, po mari pataka ni tea mamau puti waina e dip̃aki mu asa;

¹⁹Nalakena tea wanogoe Yehovah ki taua maga, Sup̃e ki Israel, e noa dapala nea, e naga, Yonadab natu ni Rekab ega wo da dika mau ki naatam̃oli sikai waina ega lawodu naraegu.