Read Nguna Togoa Etafe North YEREMIAH 36 Bible Online

YEREMIAH 36 - Nguna Togoa Etafe North bible

YEREMIAH 36

¹Go e pakilina natau kevati ki Yehoiakim natu ni Yosiah nawota ni Yudah, naga navasaana waia e pae Yehovah umai paki Yeremiah, e naga,

²P̃a tape tusi lulukiana sikai, po midiri navasaana maga mamau puti euga toko asa, waina a noa sua paki‐go dip̃a Israel go dip̃a Yudah, go dip̃a nalauna maga mamau puti, pae naaleatia waina a pasa paki‐go, pae naaleatia maga ki Yosiah pa pa paki naaleatia waia.

³Mase tea ni nasum̃a ni Yudah eu pe rogo narogorogoana nalo ni nasaana mamau puti waina a naga aga mari a ega vakilina ki da; go eu pe liliu sara naata sikasikai m̃elu dua ki napua sa adeada; go kinau a pe mariatae madeada midoakikorokoro namarinaleotageleana adeada go namarinaleosaana adeada.

⁴Go Yeremiah e soso Baruk natu ni Neriah umai punusi a; go Baruk e midiri navasaana maga mamau puti ki Yehovah waina eu dave m̃elu nawoka ni Yeremiah, waina Yehovah e noa ki nia asa, e midiri ra tusi lulukiana sikai.

⁵Go Yeremiah e dip̃aki Baruk, doko do naga, Kinau a pei tea tip̃agoroana; a mari sa paki ekopu ni nasum̃a ki Yehovah mau:

⁶Nalakena tea wanogoe nigo p̃a vano, go p̃a veve navasaana maga waina ku midiri ra tusi lulukiana wanogoe, navasaana maga ki Yehovah waina eu dave m̃elu nawokagu, p̃a veve ra nadaliga ni narei, naaleatia sikai ni navaliana: go p̃a moro peve ra nadaliga ni naatam̃oli maga mamau puti ni Yudah waina eu m̃elu dua ki natokoana adeada maga po umai.

⁷Mase eu pe tum̃ada mari navavaraniana maga paki Yehovah, po maradoa liliu sara naata sikasikai m̃elu dua ki napua sa adeada: nalakena namaetoana go namaritausuana waina Yehovah e noa naga ega mari a dip̃a narei waia, e p̃arua.

⁸Go Baruk natu ni Neriah e mari pataka ni tea mamau puti waina profeta Yeremiah e dip̃aki nia asa; e peve navasaana maga ki Yehovah waina eu pei tea midiriana tusi lulukiana wanogoe, ekopu ni nasum̃a ki Yehovah.

⁹Go e pakilina natau kelima ki Yehoiakim natu ni Yosiah, nawota ni Yudah, atelagi keloveti kakana, naga narei mamau puti waina eu doko Yerusalem, go narei mamau puti waina eu m̃elu dua ki natokoana maga ni Yudah umai paki Yerusalem, eu dogorogo ki navaliana sikai narae ni Yehovah.

¹⁰Go navasaana maga ki Yeremiah waina eu doko tusi wanogoe, Baruk e peve ra doko ekopu ni nasum̃a ki Yehovah, ekopu ni em̃ago ki Cemariah natu ni Shafan tea midiri, doko roara ni elagi, tokora waina eu sili asa namata‐pua vau ni nasum̃a ki Yehovah, e peve ra nadaliga ni narei mamau puti.

¹¹Go ragi waina Mikaiah natu ni Cemariah, natu ni Shafan, e dogo navasaana maga mamau puti ki Yehovah waina eu pei tea midiriana tusi wanogoe pa pa e nopu,

¹²E siwo paki nasum̃a ki nawota pano, po paki ekopu ni em̃ago ki tea midiri: go p̃a leo, tea maraki maga mamau puti eu doko tokora wanogoe, Elishama tea midiri, go Delaiah natu ni Shemaiah, go Elnathan natu ni Akbor, go Cemariah natu ni Shafan, go Sedekiah natu ni Hananiah, nara ma tea maraki maga eu mamau.

¹³Go Mikaiah e noakisai ra navasaana mamau puti waina e dogo sua e, ragi waina Baruk e peve tusi wanogoe nadaliga ni narei.

¹⁴Nalakena tea wanogoe tea maraki maga mamau puti wanogoe eu dip̃aki lua Yehudi natu ni Nethaniah, go Shelemiah natu ni Kushi, pa punusi Baruk, doko do naga, P̃a tape tusi lulukiana wanogoe waina ku peve a nadaliga ni narei, po piragi a umai. Go dapala nogoe Baruk natu ni Neriah e dape tusi lulukiana wanogoe nam̃elearuna, po umai punusi ra.

¹⁵Go eu noa ki nia, eu naga, P̃a toko natano, po peve a nadaligagami. Go Baruk e peve a nadaligada.

¹⁶Go e pakilina, ragi waina eu dogo navasaana maga mamau puti wanogoe, eu mataku, po dum̃ada leo punusi ra, po noa ki Baruk, eu naga, E one gida one naga tuga noa ki nawota nalo ni navasaana maga mamau puti waia.

¹⁷Go eu pusuusu ki Baruk, eu naga, P̃a noa ki gami asa, e dapale sava waina ku midiri navasaana maga mamau puti waia waina eu dave m̃elu nawokana?

¹⁸Go Baruk e pasadara ra, po naga, Nae e noa kinau navasaana maga mamau puti waia ki nagolena, go kinau a midiri ra ki noai loa doko tusi waia.

¹⁹Go tea maraki maga eu noa ki Baruk, eu naga, P̃a vano, nimu ma Yeremiah, po dum̃amu dasuru ki mu; go koroga ta noa ki te naata sikai ki tokora waina koroga toko asa mau.

²⁰Go eu paki ekopu ni roara punusi nawota; ma eu doropusi tusi lulukiana wanogoe e doko ekopu ni em̃ago ki Elishama tea midiri; go eu noasai navasaana maga mamau puti nadaliga ni nawota.

²¹Go nawota e dip̃aki lua Yehudi pano naga ega varaki tusi lulukiana wanogoe umai: go e dape lua e m̃elu dua ki ekopu ni em̃ago ki Elishama tea midiri. Go Yehudi e peve a nadaliga ni nawota, go nadaliga ni tea maraki maga mamau puti, waina eu lawodu nap̃irikia ni nawota.

²²Go nawota e doko natano ekopu ni nasum̃a ni namamaladiana, e pei atelagi keloveti: go nakapu sikai e do pavaga lasa ni nakapu vavaga waina e doko kivea ki nia.

²³Go e pakilina, ragi waina Yehudi e peve namalaga e alagoro dolu kite pati, naga nawota e dovae kotovi a ki masimasi kiki, po nadi ki nia paki nakapu vavaga waina e doko lasa ni nakapu vavaga, pa pa tusi lulukiana mamau e pei tea kani‐puoli‐kiana ki nakapu waina e doko lasa ni nakapu vavaga.

²⁴Go eu da mataku mau, kite pua p̃orae sugoro adeada maga mau, nawota kite tea suasua aneana maga te sikai kakada waina eu dogo navasaana maga mamau puti wanogoe.

²⁵Go Elnathan go Delaiah go Cemariah eu mari navavaraniana paki nawota naga ega ta dap̃ara ki tusi lulukiana wanogoe mau: ma e da daki dorogo paki da mau.

²⁶Go nawota e dip̃aki Yerahmeel nawota natuna, go Seraiah natu ni Asriel, go Shelemiah natu ni Abdeel, naga euga vuasoki Baruk tea midiri, go profeta Yeremiah: ma Yehovah e dasuru ki da.

²⁷Go edaku ki ragi waina nawota e dap̃ara ki tusi lulukiana wanogoe, go navasaana maga waina Baruk e midiri ra asa, waina eu dave m̃elu nawoka ni Yeremiah, navasaana ki Yehovah e umai paki Yeremiah, doko do naga,

²⁸P̃a moro dape tusi lulukiana p̃ota sikai, po midiri navasaana maga mamau puti euga toko asa, waina eu pea pei tea midiriana tusi lulukiana vea, waina Yehoiakim nawota ni Yudah e po dap̃ara ki nia.

²⁹Go nalo ni Yehoiakim nawota ni Yudah, p̃a naga, Yehovah e noa dapala nea, e naga, Nigo ku dap̃ara ki tusi lulukiana wanogoe, doko do naga, Ekasana ku midiri doko naga, Nawota ni Babelon ega wo umai po mari sa sa ki navanua waia, go ega wo mari puoli ki naatam̃oli go nalo tuavati m̃elu dua ki nia pano?

³⁰Nalakena tea wanogoe Yehovah e noa dapala nea nalo ni Yehoiakim nawota ni Yudah, e naga, Nae ega wo dika ki naatam̃oli waina ega tasake malo tasake ki David: go nap̃atoko mate aneana ega wo pei tea nadikiana pano paki navivitinuana ni aleati, go paki namamaladiana ni p̃ogi.

³¹Go aga wo parati a nara ma naworaworana go tea suasua aneana maga nalakena namarinaleotageleana adeada; go aga wo mari nasaana mamau puti ega va parati ki da, go ega va parati ki naatatoko maga ni Yerusalem, go ega va parati ki naatam̃oli maga ni Yudah, nasaana mamau puti waina a noa sua naga aga mari a paki da, ma eu da daki dorogo mau.

³²Go Yeremiah e dape tusi lulukiana p̃ota sikai, po dua tea midiri Baruk natu ni Neriah asa; go nae e midiri navasaana maga eu doko asa waina eu dave m̃elu nawoka ni Yeremiah, navasaana mamau puti waina eu pea pei tea midiriana tusi waina Yehoiakim nawota ni Yudah e dap̃ara ki nia nakapu: go navasaana laapa waina eu dakiusi navasaana maga wanogoe, eu moro pei tea midiriana sokari ra.