Read Nguna Togoa Etafe North YEREMIAH 37 Bible Online

YEREMIAH 37 - Nguna Togoa Etafe North bible

YEREMIAH 37

¹Go Sedekiah natu ni Yosiah e maramara, e pei nawota du oli Koniah natu ni Yehoiakim, waina Nebukadnessar nawota ni Babelon e mari a e pei nawota navanua ni Yudah.

²Ma nae, go tea suasua aneana maga, go narei ni navanua, eu da daki dorogo paki navasaana maga ki Yehovah mau, waina e pasa asa pae nawoka ni profeta Yeremiah.

³Go nawota Sedekiah e dip̃aki lua Yehukal natu ni Shelemiah, go Sefaniah natu ni Maaseiah tea viri pa punusi profeta Yeremiah, po naga, P̃a maginami pavara paki Yehovah Sup̃e aginami.

⁴Go Yeremiah e sikoti narei doko do sili umai po do dave pano: nalakena eu ko da doropusi a paki nasum̃a ni navavaigoroana.

⁵Go naatam̃oli maga ni navakalo ki Faraoh eu m̃elu dua ki Ityipt: go ragi waina naka ni Kaldea waina eu kelugoro Yerusalem eu dogo narogorogoana nalo kakada, eu doropusi Yerusalem po pano.

⁶Go navasaana ki Yehovah e umai paki profeta Yeremiah, doko do naga,

⁷Yehovah Sup̃e ki Israel e noa dapala nea, e naga, Kuga noa ega tapala nea paki nawota ni Yudah waina e dip̃aki lua mu umai punusi au naga kuga vusuusu kinau, kuga naga, Kuga leo, naatam̃oli maga ni navakalo ki Faraoh waina eu dave umai naga euga silae mu, euga wo liliu paki Ityipt, navanua adeada.

⁸Go naka ni Kaldea euga wo moro umai, po mari navakalo dip̃a natokoana waia; go euga wo mari matua ki nia, po dap̃ara ki nia ki nakapu.

⁹Yehovah e noa dapala nea, e naga, Kuga ta dum̃amu surue mu mau, doko do naga, Naka ni Kaldea euga wo doropusi gami po pano: nalakena euga wo da doropusi mu po pano mau.

¹⁰Nalakena ku pe atugi puti naatam̃oli maga ni navakalo ki naka ni Kaldea waina eu mari navakalo dip̃a mu, go tea kakada maga waina eu pei tea toropusiana doko eu pe vei wotu mau, ma eu pe wo duleana sara naata sikasikai kakada doko tap̃aup̃au adeada, po dap̃ara ki natokoana waia ki nakapu.

¹¹Go e pakilina ragi waina naatam̃oli maga ni navakalo ki naka ni Kaldea eu doropusi Yerusalem po pano nalakena eu matau ki naatam̃oli maga ni navakalo ki Faraoh,

¹²E pakilina naga Yeremiah e dave m̃elu dua ki Yerusalem naga ega vano paki navanua ni Benyamin, naga ega tape matele aneana tokora wanogoe, m̃aleoputo ni narei aneana.

¹³Go ragi waina e doko namata‐pua ni Benyamin, nap̃au ni tea vavaigoro maga sikai kakada e doko tokora wanogoe, nagisana Iriyah natu ni Shelemiah, natu ni Hananiah; go e nadi ki nam̃elearuna paki profeta Yeremiah, po naga, Ku do dowo pano paki naka ni Kaldea.

¹⁴Go Yeremiah e naga, E pei nasorosoroana sikai; a da do dowo pano paki naka ni Kaldea mau; ma Iriyah e da daki dorogo paki nia mau: dapala nogoe e puasoki Yeremiah, po piragi a umai punusi tea maraki maga.

¹⁵Go tea maraki maga eu maeto p̃arua ki Yeremiah, po p̃okati a, po doropusi a paki ekopu ni nasum̃a ni navavaigoroana, doko nasum̃a ki Yonathan tea midiri; nalakena eu mari nasum̃a wanogoe e pei nasum̃a ni navavaigoroana.

¹⁶Go ragi waina Yeremiah e paki ekopu ni nasum̃a ni m̃orutano, go paki ekopu ni em̃ago kirikiri kakana maga, go ragi waina Yeremiah e doko tokora wanogoe doko naaleatia laapa;

¹⁷Ragi wanogoe nawota Sedekiah e dip̃aki lua po paraki nia umai: go nawota e pusuusu ki nia, ero dua maau, doko nasum̃a aneana, po naga, Te navasaana sikai e pae Yehovah umai, kite? Go Yeremiah e naga, Io. Go e moro naga, P̃a wo pei tea vituakiana paki nam̃elearu ni nawota ni Babelon.

¹⁸Go Yeremiah e moro noa ki nawota Sedekiah, e naga, Kinau a mari naleo sa nasava dip̃a ko, kite dip̃a tea suasua anigo maga, kite dip̃a narei waia, naga ku doropusi au paki nasum̃a ni navavaigoroana?

¹⁹Profeta anigo maga nara wai, waina eu peanoasai paki‐go, doko do naga, Nawota ni Babelon ega wo da umai mari dip̃a ko, kite dip̃a navanua waia mau?

²⁰Go p̃a taki dorogo, a pavara ni ko asa, nawota aginau nawota O: p̃a suasua kinau naga navavaraniana aginau ega valoti paki naraem̃a, a pavara ni ko asa; go p̃a ta moro dip̃aki lua au pano paki nasum̃a ki Yonathan tea midiri waina mau, mase a pe mate tokora wanogoe.

²¹Go nawota Sedekiah e pitip̃aki, go eu doropusi Yeremiah paki roara ki tea vavaigoro maga, go eu dua e m̃olim̃oli ni bred sikasikai sara naaleatia pae napua ni tea tao ni bred, pa pa bred e nopu natokoana. Dapala nogoe Yeremiah e doko roara ki tea vavaigoro maga doko.