Read Nguna Togoa Etafe North YEREMIAH 38 Bible Online

YEREMIAH 38 - Nguna Togoa Etafe North bible

YEREMIAH 38

¹Go Shefatiah natu ni Mattan, go Cedaliah natu ni Pashur, go Yukal natu ni Shelemiah, go Pashur natu ni Malkiyah, eu dogo navasaana maga waina Yeremiah e noa ki narei mamau puti asa, doko do naga,

²Yehovah e noa dapala nea, e naga, Naata waina ega wo doko natokoana waia doko, ega wo mate ki lova, go ki navitoloana, go ki nasasanaana sa: ma naata waina ega wo dave pano po dowo paki naka ni Kaldea, ega wo mauri, go namauriana aneana ega wo maneana pei tea vuti‐luapavakotoana sikai, go nae ega wo mauri.

³Yehovah e noa dapala nea, e naga, Natokoana waia ega wo pei tea vituakiana paki nam̃elearu ni naatam̃oli maga ni navakalo ki nawota ni Babelon, go nae ega wo marimatua ki nia.

⁴Go tea maraki maga eu noa ki nawota, eu naga, Naatam̃oli waia ega vei tea toropusiana paki namateana, au pavara ni ko asa; nalakena e do mari nam̃elearu ni naatam̃oli maga ni navakalo waina eu ko doko natokoana waia doko, go nam̃elearu ni narei mamau puti, eu manainai, pae navasaana maga wanogoe waina e do noa ki da asa: nalakena naatam̃oli waia e da do magi narei waia laaga nawiaana mau, ma eu do laaga namarisa‐kida‐ana.

⁵Go nawota Sedekiah e naga, Kuga leo, e doko nam̃elearumu: nalakena nawota e mari sa mari te navatuna dip̃a mu mau.

⁶Go eu puasoki Yeremiah, po nadi ki nia paki m̃orutano ki Malkiyah natu ni nawota, waina e doko roara ki tea vavaigoro maga: go eu doro Yeremiah pakitano ki natali solisoki maga. Go m̃orutano wanogoe noai e dika asa, ma e pei nalepa mau: go Yeremiah e diro doko nalepa wanogoe doko.

⁷Go ragi waina Ebed‐melek, naatam̃oli ni Ethiopia, atavau sikai waina e doko nasum̃a ki nawota, e dogo naga eu doropusi Yeremiah e doko m̃orutano wanogoe; go nawota e doko natano namatapua ni Benyamin;

⁸Ragi wanogoe Ebed‐melek e dave m̃elu dua ki nasum̃a ki nawota, po pasa paki nawota,

⁹po naga, Nawota aginau nawota O, naatam̃oli maga wanogoe eu mari tea waina e sa nalo ni tea mamau puti waina eu mari a paki profeta Yeremiah, waina eu nadi ki nia paki m̃orutano; go ega mate tokora wanogoe waina e doko asa nalakena navitoloana: nalakena navinaga e dika natokoana.

¹⁰Go nawota e dip̃aki Ebed‐melek naatam̃oli ni Ethiopia, po naga, P̃a matadoa naatam̃oli dolu, go kuga vano, po dape dakati profeta Yeremiah m̃elu dua ki m̃orutano, mase e pe mate asa.

¹¹Go Ebed‐melek go naatam̃oli maga wanogoe eu mamau pano, po paki ekopu ni nasum̃a ki nawota, paki ekopu ni em̃ago sikai waina eu do daua ki tea suniana maga asa, doko nasum̃a ni natauakiana ni naleo wia maga, po dape lua m̃elu dua ki tokora wanogoe sugoro tuai maga go nakulukulu madada maga, po doropusi ra pakitano ki natali solisoki maga paki m̃orutano dua Yeremiah ara.

¹²Go Ebed‐melek naatam̃oli ni Ethiopia e noa ki Yeremiah, e naga, P̃a toropusi sugoro tuai maga go nakulukulu madada maga waia navinam̃a, etano ni natali solisoki maga. Go Yeremiah e mari dapala nogoe.

¹³Go eu pua dakati Yeremiah ki natali solisoki maga, po dape dakati lua e m̃elu dua ki m̃orutano: go Yeremiah e doko roara ki tea vavaigoro maga doko.

¹⁴Go nawota Sedekiah e dip̃aki lua, po paraki Yeremiah umai punusi a namata sili ketolu ni nasum̃a ki Yehovah: go nawota e noa ki Yeremiah, e naga, Aga wo pusuusu paki‐go ki navusuusuana sikai; p̃a ta dasuru ki te navatuna paki nau mau.

¹⁵Go Yeremiah e noa ki Sedekiah, e naga, A pe noakisai ko asa, ku pe wo da doropusi au paki namateana, kite? Go a pe vasa parati ki‐go, ma ku pe wo da daki dorogo paki nau mau.

¹⁶Go nawota Sedekiah e pivisa paki Yeremiah, ero dua maau, po naga, Yehovah e mauri, waina e mari naatagida, go aga wo da doropusi ko paki namateana mau, kite pitua ki‐go paki nam̃elearu ni naatam̃oli maga waia waina eu do laaga namauriana anigo.

¹⁷Go Yeremiah e noa ki Sedekiah, e naga, Yehovah Sup̃e ki taua maga, Sup̃e ki Israel, e noa dapala nea, e naga, Ku pe tave pano po dowo paki tea maraki maga ki nawota ni Babelon, naatam̃a e pe wo mauri, go natokoana waia e pe wo da pei tea tap̃arakiana ki nakapu mau; go p̃a wo mauri, nimu ma tea ni nasum̃a anigo:

¹⁸Ma ku pe karai dave pano po dowo paki tea maraki maga ki nawota ni Babelon, natokoana waia e pe wo pei tea vituakiana paki nam̃elearu ni naka ni Kaldea, go nara euga wo dap̃ara ki nia ki nakapu, go p̃a wo da pei tea mautiana m̃elu dua ki nam̃elearuda mau.

¹⁹Go nawota Sedekiah e noa ki Yeremiah, e naga, Kinau a matau ki naka ni Yudea waina eu dowo pano paki naka ni Kaldea, mase eu pe vitua ki nau paki nam̃elearuda, go eu pe mari saudoa kinau.

²⁰Ma Yeremiah e naga, Euga wo da pitua ki‐go paki da mau. P̃a rogo parati ki nadaleo ni Yehovah, a pavara ni ko asa, nalo ni tea waina a noa ki‐go asa: dapala nogoe ega wo p̃ia ki‐go, go naatam̃a ega wo mauri.

²¹Ma ku pe karai dave pano, tea waia e pei navasaana waina Yehovah e pisei kinau asa:

²²P̃a leo, a punusi nagoroi maga mamau puti waina eu pei tea toropusiana doko nasum̃a ki nawota ni Yudah, eu doko pei tea viragiluaana pano punusi tea maraki maga ki nawota ni Babelon, doko do naga, Naatam̃oli ni natam̃ateana anigo maga eu surue ko, go eu marimatua ki‐go: natuam̃a ero diro nalepa: go nara eu m̃elu dua ki‐go pano.

²³Nagoroi animu maga mamau puti go natumu naanoai maga euga wo pei tea viragiluaana pano punusi naka ni Kaldea: go nigo ma p̃a wo da pei tea mautiana m̃elu dua ki nam̃elearuda mau, ma p̃a wo pei tea tape‐lua‐pavakotoana pae nam̃elearu ni nawota ni Babelon: go natokoana waia ega wo pei tea tap̃arakiana ki nakapu.

²⁴Go Sedekiah e noa ki Yeremiah, e naga, P̃a ta noa ki te naata ki navasaana maga waia mau, go p̃a wo da mate mau.

²⁵Ma tea maraki maga eu pe rogo naga a po pasa paki‐go, go eu pe umai punusi ko, po noa ki‐go naga, P̃a noakisai gami ki tea waina ku noa ki nawota asa; p̃a ta dasuru ki nia paki gami mau, go auga wo da doropusi ko paki namateana mau: go p̃a moro noa ki gami ki tea waina nawota e noa ki‐go asa.

²⁶E pe tapala nogoe, p̃a noa ki da, p̃a naga, A mari navavaraniana aginau narae ni nawota, naga ega ta mari au aga liliu paki nasum̃a ki Yonathan mau, naga aga mate tokora wanogoe.

²⁷Go tea maraki maga mamau puti eu rumai punusi Yeremiah, po pusuusu paki nia: go e noakisai ra pataka ni navasaana mamau puti wanogoe waina nawota e dip̃aki nia asa. Go eu da moro pasa paki nia mau; nalakena eu pei nara sikida maau waina eu atae naleo wanogoe.

²⁸Go dapala nogoe Yeremiah e doko roara ki tea vavaigoro maga pa pa paki naaleatia waina Yerusalem e pei tea marimatuakiana asa. Go e doko tokora wanogoe doko ragi waina Yerusalem e pei tea marimatuakiana.