Read Nguna Togoa Etafe North YEREMIAH 39 Bible Online

YEREMIAH 39 - Nguna Togoa Etafe North bible

YEREMIAH 39

¹(Go e pakilina natau keloveti ki Sedekiah nawota ni Yudah, doko atelagi kerualima sikai kakana, naga Nebukadnessar nawota ni Babelon, nara ma naatam̃oli ni navakalo aneana mamau puti, eu rumai po mari dip̃a Yerusalem, po kelugoro e;

²Go doko natau kerualima sikai tamate sikai ki Sedekiah, atelagi kevati kakana, nakup̃a keloveti ni atelagi wanogoe, malo marip̃oraeana sikai e pei tea mariana p̃aaka maga ni natokoana:)

³Go tea maraki maga mamau puti ki nawota ni Babelon eu sili pae asa, po doko natano namata‐pua ni m̃aleoputo, eu pei Nerkal‐sareser, Samkar‐nebo, Sarsekim, Rab‐saris, Nerkal‐sareser, Rabmak, nara ma tea maraki maga mamau puti ki nawota ni Babelon eu mamau.

⁴Go e pakilina, ragi waina Sedekiah nawota ni Yudah go naatam̃oli maga mamau puti ni navakalo eu punusi ra, nara eu sava pano, eu dave m̃elu dua ki natokoana p̃ogi, pae napua ni roara ki nawota, pae namata‐pua waina e doko namawota ni p̃aaka dua: go e surata pae napua ni Arabah pano.

⁵Ma naatam̃oli maga ni navakalo ki naka ni Kaldea eu sava dausi ra, po pa parati ki Sedekiah doko malo matemate maga ni Yeriko: go eu dape pavakoto asa, po piragi lua e sake paki Riblah doko navanua ni Hamath, pa punusi Nebukadnessar nawota ni Babelon, go nae e pasa p̃otae a.

⁶Go nawota ni Babelon e atugi Sedekiah natuna maga naraena doko Riblah: go nawota ni Babelon e moro atugi naatam̃oli vakilagi maga mamau puti ni Yudah.

⁷Go e asiri lua namata ni Sedekiah, po solisoki a ki tea moti maga, naga ega tape a paki Babelon pano.

⁸Go naka ni Kaldea eu dap̃ara ki nasum̃a ki nawota go nasum̃a maga ni narei ki nakapu, po p̃oka p̃oraworae p̃aaka maga ni Yerusalem.

⁹Go Nebusaradan, nap̃au ni tea vavaigoro maga, e piragi lua pavakoto narei maga waina eu pei tea toropusiana doko natokoana paki Babelon pano, nara ma tea maga waina eu dowo pano paki nia, go namagovai ni narei waina eu pei tea toropusiana doko eu mamau.

¹⁰Ma Nebusaradan nap̃au ni tea vavaigoro maga e doropusi tea tika maga seara kakada waina eu pei tea tika lomau maga, eu doko navanua ni Yudah doko, go e dua ra roara maga ni vaine go vanua maga ragi sikai maau wanogoe.

¹¹Go Nebukadnessar nawota ni Babelon e pasa parati ki Nebusaradan nap̃au ni tea vavaigoro maga nalo ni Yeremiah,

¹²e naga, P̃a viragi a pano, po leo parati ki m̃ata ki nia, po da mari te namarisakiana sikai paki nia mau; ma p̃a mari paki nia ega vataka ni tea waina ega noa ki‐go asa.

¹³Dapala nogoe Nebusaradan nap̃au ni tea vavaigoro maga e pitip̃aki, go Nebusasban, Rab‐saris, go Nerkal‐sareser, Rab‐mak, go tasiga vakilagi maga ki nawota ni Babelon;

¹⁴Eu dip̃aki lua, po piragi lua Yeremiah m̃elu dua ki roara ki tea vavaigoro maga, po pitua ki nia paki nam̃elearu ni Cedaliah natu ni Ahikam, natu ni Shafan, naga ega viragi a paki esum̃a ni kiana pano: go dapala nogoe e doko sikoti narei doko.

¹⁵Go ragi waina Yeremiah e pei tea kokoro‐p̃onotiana doko roara ki tea vavaigoro maga, navasaana ki Yehovah e umai paki nia, po naga,

¹⁶P̃a vano, po pasa paki Ebed‐melek naatam̃oli ni Ethiopia, po naga, Yehovah ki taua maga, Sup̃e ki Israel, e noa dapala nea, e naga, P̃a leo, aga wo pakavuro navasaana aginau maga dip̃a natokoana waia, po mari sa ki nia, aga wo da mari tea wia paki nia mau; go euga wo pei tea vakavuroana naraem̃a naaleatia wanogoe.

¹⁷Ma aga wo mauti ko naaleatia wanogoe, Yehovah e noa e: go p̃a wo da pei tea vituakiana paki nam̃elearu ni naatam̃oli maga waina ku matau ki da mau.

¹⁸Nalakena aga wo mauti ko, go p̃a wo da dowo ki lova mau, ma namauriana anigo ega wo manigo pei tea vuti‐lua‐pavakotoana sikai: nalakena ku pavatu au, Yehovah e noa e.