Read Nguna Togoa Etafe North YEREMIAH 40 Bible Online

YEREMIAH 40 - Nguna Togoa Etafe North bible

YEREMIAH 40

¹Navasaana waina e pae Yehovah umai paki Yeremiah, edaku ki waina Nebusaradan nap̃au ni tea vavaigoro maga e suasua ki nia naga ega m̃elu dua ki Ramah pano, ragi waina e piragi lua pavakoto asa doko pei tea soliana ki tea moti maga, nara ma tea viragi‐lua‐pavakotoana maga mamau puti ni Yerusalem go Yudah, ragi waina eu mamau puti pei tea viragi‐lua‐pavakotoana paki Babelon pano.

²Go nap̃au ni tea vavaigoro maga e piragi lua Yeremiah, po noa ki nia, e naga, Yehovah Sup̃e anigo e noa p̃otae nasaana waia dip̃a tokora waia:

³Go Yehovah e mari a e pakilina, go e po mari pataka ni tea waina e noa e; nalakena nimu ku mari naleo sa dip̃a Yehovah, go ku da dogo parati ki nadaleona mau, nalakena tea wanogoe naleo waia e umai paki mu.

⁴Go p̃a leo, a peresi ko naaleatia waia m̃elu dua ki namori maga waina eu solisoki nam̃elearum̃a maga asa. E pe wia ki‐go naga p̃a sikoti au paki Babelon pano, p̃a umai, go kinau aga wo leo parati ki m̃ata ki‐go; ma e pe sa ki‐go naga p̃a sikoti au paki Babelon pano, p̃a toko: p̃a leo, navanua mamau e doko naraem̃a; tokora waina e p̃ia go e leana namatam̃a naga p̃a vaki asa, tokora wanogoe p̃a vaki asa.

⁵Go ku pe wo doko, p̃a moro liliu pa punusi Cedaliah, natu ni Ahikam, natu ni Shafan, waina nawota ni Babelon e mari a e pei tea maramara dap̃au natokoana maga ni Yudah, go p̃a toko sikoti a doko m̃aleoputo ni narei: kite p̃a vaki tokora sikai waina ku pe midoa ki nia naga e p̃ia go e leana. Go nap̃au ni tea vavaigoro maga e dua e navinaga maga go navituaana sikai, po dip̃aki lua e pano.

⁶Go Yeremiah e paki Mispah pano punusi Cedaliah natu ni Ahikam, po doko sikoti a doko m̃aleoputo ni narei waina eu pei tea toropusiana doko navanua.

⁷Go ragi waina napau maga ni naatam̃oli maga ni navakalo waina eu doko vanua maga, nara ma naatam̃oli adeada maga, eu dogo naga nawota ni Babelon e mari Cedaliah natu ni Ahikam e pei tea maramara dap̃au navanua, go naga e dua e naatam̃oli maga, naanoai, go nagoroi, go piakirikiri maga, go tea tika maga ni navanua seara kakada ni tea maga waina eu da pei tea viragi‐lua‐pavakotoana paki Babelon pano mau;

⁸Ragi wanogoe eu rumai paki Mispah punusi Cedaliah, eu pei Ishmael natu ni Nethaniah, go Yohanan go Yonathan, Kareah natuna maga, go Seraiah natu ni Tanhumeth, go Efai tea ni Netafah natuna maga, go Yesaniah natu ni Maakah nara ma naatam̃oli adeada maga eu mamau.

⁹Go Cedaliah natu ni Ahikam natu ni Shafan e pivisa paki da go paki naatam̃oli adeada maga, po naga, Kuga ta mataku, kuga magi naka ni Kaldea suasua: kuga toko navanua, po magi nawota ni Babelon suasua, go kuga wo doko p̃ia doko.

¹⁰Go kinau, kuga leo, kinau aga wo doko Mispah, naga aga manimu lawodu narae ni naka ni Kaldea waina euga wo umai punusi gami: ma nimu, kuga lei nawa ni vaine, go nawa matua maga, go oliva, po daua ki waine, go nawa maga, go naroro, doko lasa animu maga, po doko natokoana animu maga waina ku dape pavakoto ara.

¹¹Go ragi waina naka ni Yudea mamau puti waina eu doko Moab, go m̃aleoputo ni Ammon natuna maga, go Edom, go waina eu doko navanua p̃ota maga, eu dogo naga nawota ni Babelon e doropusi namagovai ni Yudah eu doko, go naga e lawo ki Cedaliah natu ni Ahikam, natu ni Shafan, e pei tea tap̃au dap̃au ra;

¹²Ragi wanogoe naka ni Yudea mamau puti eu m̃elu dua ki tokora maga mamau puti waina eu pei tea kopasiluaana paki ara pano, po liliu umai paki navanua ni Yudah punusi Cedaliah, doko Mispah; go eu pila daua ki p̃arua ki waine go ki nawa matua maga.

¹³Go Yohanan natu ni Kareah, go nap̃au maga mamau puti ni naatam̃oli maga ni navakalo waina eu doko navanua, eu rumai punusi Cedaliah, doko Mispah,

¹⁴Go eu noa ki nia, eu naga, Nigo ku atae naga Baalis nawota ki Ammon natuna maga e po dip̃aki lua Ishmael natu ni Nethaniah naga ega mari punue ko, kite? Ma Cedaliah natu ni Ahikam e da saralomau ara mau.

¹⁵Go Yohanan natu ni Kareah e pasa paki Cedaliah doko Mispah, ero dua maau, po naga, P̃a suasua kinau naga aga vano, a pavara ni ko asa, go aga wo atugi Ishmael natu ni Nethaniah, go te naata ega ta atae a mau: ekasana ega wo mari punue ko, dapala waina naka ni Yudea mamau puti waina eu pei tea saisaikiana umai punusi ko euga wo pei tea taperaverakiana, go namagovai ni Yudah waina eu pei tea toropusiana doko euga wo mate puoli?

¹⁶Ma Cedaliah natu ni Ahikam e noa ki Yohanan natu ni Kareah, e naga, P̃a ta mari tea wanogoe mau: nalakena ku do pasa nasorosoroana nalo ni Ishmael.