Read Nguna Togoa Etafe North YEREMIAH 41 Bible Online

YEREMIAH 41 - Nguna Togoa Etafe North bible

YEREMIAH 41

¹Go e pakilina atelagi kelarua, naga Ishmael natu ni Nethaniah, natu ni Elishama, naworawora ni naveinawotaana sikai kakada, go tasiga vakilagi maga ki nawota sikai kakada, nara ma naatam̃oli rualima sikai eu mamau umai punusi Cedaliah natu ni Ahikam doko Mispah; go tokora wanogoe Mispah, eu mamau ganikani.

²Go Ishmael natu ni Nethaniah, go naatam̃oli rualima sikai wanogoe waina eu sikoti a, eu duleana po atugi Cedaliah natu ni Ahikam natu ni Shafan, ki lova, po mari punue a, nae waina nawota ni Babelon e mari a e pei tea maramara dap̃au navanua.

³Go Ishmael e mari punue puti naka ni Yudea waina eu mamau doko ma Cedaliah doko Mispah, nara ma naka ni Kaldea, naatam̃oli maga ni navakalo, waina eu pei tea vap̃aiana doko tokora wanogoe.

⁴Go e pakilina matamai ki nia, go te naata e da atae naga Cedaliah e pei tea maripunueana mau,

⁵E pakilina naga naatam̃oli seara eu pae Shekem umai, go pae Shiloh, go Samaria, eu pei naatam̃oli rualima latolu, go nalolu ni nasida e pei tea masiluaana, go sugoro adeada maga eu pei tea vuap̃oraeana, go eu dum̃ada dovae ra, go navituaana maga ni navinaga go libano eu doko nam̃elearuda, naga euga tape ra umai paki ekopu ni nasum̃a ki Yehovah.

⁶Go Ishmael natu ni Nethaniah e dave m̃elu dua ki Mispah pano naga ega sua ra, e do pano, e do pano, e do dagi: go e pakilina, ragi waina e sua ra, naga e noa ki da, e naga, Kuga umai punusi Cedaliah natu ni Ahikam.

⁷Go e doko, ragi waina eu rumai paki m̃aleoputo ni natokoana, naga Ishmael natu ni Nethaniah e atugi ra, po nadi ki da paki m̃orutano sikai, nae go naatam̃oli maga waina eu sikoti a doko.

⁸Ma naatam̃oli rualima sikai eu pei tea vap̃aiana doko m̃aleoputo kakada, waina eu noa ki Ishmael, eu naga, P̃a ta mari punue gami mau: nalakena eu peani naleo tauakiana maga ni navinaga waina eu pei tea tasurukiana doko vanua maga, whiit, go barle, go naroro, go honi. Dapala nogoe e soki du, po da mari punue ra mau ragi waina e mari punue taida maga.

⁹Go m̃orutano waina Ishmael e nadi ki nap̃atoko mate maga mamau puti asa, ni naatam̃oli maga waina e mari punue ra, nalakena nalo ni Cedaliah, e pei m̃orutano warua waina nawota Asa e mari a ega vei nakokoro sikai dip̃a Baasha nawota ni Israel; go Ishmael natu ni Nethaniah e mari a e pura ki tea maga waina eu pei tea maripunueana.

¹⁰Go Ishmael e piragi lua pavakoto namagovai mamau ni narei waina eu pei tea toropusiana doko Mispah, nawota natuna nagoroi maga, go naatam̃oli mamau puti waina eu doko Mispah doko, waina Nebusaradan nap̃au ni tea vavaigoro maga e pitua ki da paki nam̃elearu ni Cedaliah natu ni Ahikam: Ishmael natu ni Nethaniah e piragi lua pavakoto ara, po m̃elu pano naga ega tuagoto pano punusi Ammon natuna maga.

¹¹Ma ragi waina Yohanan natu ni Kareah, go nap̃au maga mamau puti ni naatam̃oli maga ni navakalo waina eu mamau doko, eu dogo narogorogoana nalo ni tea sa mamau puti waina Ishmael natu ni Nethaniah e po mari a,

¹²Ragi wanogoe eu mamau pano ma naatam̃oli maga mamau puti wanogoe naga euga mari navakalo paki Ishmael natu ni Nethaniah, go eu pap̃ai a doko nadigi ni noai warua waina e doko Cibeon.

¹³Go e pakilina ragi waina narei mamau puti waina eu sikoti Ishmael eu punusi Yohanan natu ni Kareah, nara ma nap̃au maga mamau puti ni naatam̃oli maga ni navakalo waina eu mamau doko, e pakilina ragi wanogoe naga eu laelaea.

¹⁴Go dapala nogoe narei mamau puti waina Ishmael e piragi lua pavakoto ara m̃elu dua ki Mispah, eu maradoa liliu po pa punusi Yohanan natu ni Kareah.

¹⁵Ma Ishmael natu ni Nethaniah nara ma naatam̃oli latolu, eu sava dua ki Yohanan, go eu pa punusi Ammon natuna maga.

¹⁶Go Yohanan natu ni Kareah nara ma nap̃au maga mamau puti ni naatam̃oli maga ni navakalo waina eu mamau doko, eu piragi narei mamau puti waina Ishmael natu ni Nethaniah e piragi lua pavakoto ara m̃elu dua ki Mispah, edaku ki waina e mari punue Cedaliah natu ni Ahikam, eu pei naatam̃oli kasua maga ni navakalo, go nagoroi maga, go piakirikiri maga, go atavau maga, waina Yohanan e moro piragi liliua ki da m̃elu dua ki Cibeon:

¹⁷Go eu surata pano, po m̃enaki doko Kerut Kimham, waina e doko m̃aladigi ki Bethlehem, naga euga vaki Ityipt pano,

¹⁸Nalakena naka ni Kaldea: nalakena eu matau ki da, nalakena Ishmael natu ni Nethaniah e atugi Cedaliah natu ni Ahikam, waina nawota ni Babelon e mari a e pei tea maramara dap̃au navanua.