Read Nguna Togoa Etafe North YEREMIAH 42 Bible Online

YEREMIAH 42 - Nguna Togoa Etafe North bible

YEREMIAH 42

¹Go nap̃au maga mamau puti ni naatam̃oli maga ni navakalo, go Yohanan natu ni Kareah, go Yesaniah natu ni Hoshaiah, go narei mamau puti pae tea vakitano maga pa pa paki tea vakilagi maga, eu rumai paki m̃aladigi,

²Po noa ki profeta Yeremiah, eu naga, P̃a suasua, au pavara ni ko asa, naga navavaraniana aginami ega valoti paki naraem̃a, go p̃a maginami namagovai mamau waia dapasavasa paki Yehovah Sup̃e anigo; nalakena au pei tea visa maau ni tea laapa waina au pei tea toropusiana doko, dapala waina namatam̃a ero punusi gami:

³Naga Yehovah Sup̃e anigo ega visei ki gami napua waina auga vae asa pano, go tea waina auga mari a.

⁴Go profeta Yeremiah e noa ki da, e naga, Kinau a po dogo navasaana animu; kuga leo, aga wo mari natapasavasaana paki Yehovah Sup̃e animu, ega vataka ni navasaana animu maga; go ega wo pakilina, naga te navatuna waina Yehovah ega wo pasadara mu asa, aga wo noakisai mu asa; aga wo da mauti te navatuna sikai pa dua ki mu mau.

⁵Go eu noa ki Yeremiah, eu naga, Yehovah ega vei tea noasokisoki lomau go leana namawota kakagida, au pe ta mari pataka ni navasaana mamau puti waina Yehovah Sup̃e anigo e pe wo dip̃aki lua ko naga p̃a noa ki gami asa.

⁶E pe vei tea waina e p̃ia, kite e pe vei tea waina e sa, ma auga wo dogo parati ki nadaleo ni Yehovah Sup̃e aginami, waina au dip̃aki lua ko pano punusi a; naga auga toko p̃ia doko, ragi waina auga rogo parati ki nadaleo ni Yehovah Sup̃e aginami.

⁷Go e pakilina doko nanopuana ni naaleatia rualima sikai, naga navasaana ki Yehovah e umai paki Yeremiah.

⁸Go e soso Yohanan natu ni Kareah umai punusi a, nara ma nap̃au maga mamau puti ni naatam̃oli maga ni navakalo waina eu mamau doko, go narei mamau puti pae tea vakitano pa pa paki tea vakilagi,

⁹Po noa ki da, e naga, Yehovah Sup̃e ki Israel, waina ku dip̃aki lua au pa punusi a naga aga manimu mari navavaraniana naraena, e noa dapala nea,

¹⁰e naga, Ku pe wo doko navanua waia doko, kinau a pe wo davagi mu, po da dakai mu pakitano mau, go a pe wo lawo ki mu, po da paku dakati lua mu mau: nalakena a midoaki piri nasaana waina a mari a paki mu.

¹¹Kuga ta matau ki nawota ni Babelon mau, waina ku matau ki nia; kuga ta matau ki nia mau, Yehovah e noa e: nalakena kinau a sikoti mu doko naga aga mauti mu, go naga aga vualua mu m̃elu dua ki nam̃elearuna.

¹²Go aga wo dua mu namaritadodomiana, naga nae ma ega wo maritadodomi mu, po mari mu kuga liliu paki navanua animu.

¹³Ma ku pe naga, Auga wo da doko navanua waia doko mau; dapala waina ku da dogo parati ki nadaleo ni Yehovah Sup̃e animu mau;

¹⁴Doko do naga, Ee; ma auga wo paki navanua ni Ityipt pano, tokora waina auga wo da punusi navakalo asa mau, kite dogo nadaleo ni paiga, kite navitoloana mau; go tokora wanogoe auga wo doko asa doko:

¹⁵E pe tapala nogoe, kuga rogo navasaana ki Yehovah, nimu namagovai ni Yudah O, waina ku pei tea toropusiana doko: Yehovah ki taua maga, Sup̃e ki Israel, e noa dapala nea, e naga, Ku pe lawo ki naraemu naga ku pe vaki Ityipt pano, go ku pe vano naga ku pe m̃enaki atatoko asa;

¹⁶E pe wo pakilina, naga lova waina ku matau ki nia, ega wo pa parati ki mu tokora wanogoe navanua ni Ityipt, go navitoloana waina ku matau ki nia, ega wo dausi mu pano m̃araverave paki tokora wanogoe Ityipt; go tokora wanogoe kuga wo mate asa.

¹⁷Go ega wo dapala nogoe doko paki naatam̃oli maga mamau puti waina eu lawo ki naraeda naga euga vaki Ityipt pano, naga euga m̃enaki atatoko asa; euga wo mate ki lova, go ki navitoloana, go ki nasasanaana sa: go te naata sikai kakada ega wo da pei tea toropusiana doko kite pei tea mautiana mau m̃elu dua ki nasaana waina aga wo mari a ega va parati ki da.

¹⁸Nalakena Yehovah ki taua maga, Sup̃e ki Israel, e noa dapala nea, e naga, Dapala waina namaetoana aginau go namaritausuana aginau ero pei tea takiana paki naatatoko maga ni Yerusalem, dapala nogoe namaritausuana aginau ega wo moro pei tea takiana paki mu, ragi waina kuga vaki Ityipt pano: go kuga wo pei tea mamaragokiana sikai, go tea ni nasaram̃akotoana sikai, go tea ni navasasakiana sikai, go tea ni navasapinoaana sikai; go kuga wo da moro punusi tokora waia mau.

¹⁹Yehovah e noa sua nalo kakamu, nimu namagovai ni Yudah O, waina ku pei tea toropusiana doko, e naga, Kuga ta paki Ityipt pano mau: kuga atae naga kinau a noasokisoki paki mu naaleatia waia.

²⁰Nalakena ku dum̃amu mari namarisoreana nap̃op̃omu; nalakena ku dip̃aki lua au pano punusi Yehovah Sup̃e animu, doko do naga, P̃a maginami dapasavasa paki Yehovah Sup̃e aginami; go dapala tea mamau puti waina Yehovah Sup̃e aginami ega wo noa e, ega tapala nogoe p̃a noakisai gami asa, go auga wo mari ega vatakana.

²¹Go naaleatia waia a noakisai mu asa; ma ku da dogo parati ki nadaleo ni Yehovah Sup̃e animu nalo ni te navatuna mau waina e dip̃aki lua au umai naga aga noakisai mu asa.

²²Nalakena tea wanogoe kuga atae naga kuga wo mate ki lova, go ki navitoloana, go ki nasasanaana sa, doko tokora waina ku masauna naga kuga vaki asa naga kuga m̃enaki atatoko asa.