Read Nguna Togoa Etafe North YEREMIAH 43 Bible Online

YEREMIAH 43 - Nguna Togoa Etafe North bible

YEREMIAH 43

¹Go e pakilina ragi waina Yeremiah e pasa sua paki narei mamau puti ki navasaana maga mamau puti ki Yehovah Sup̃e adeada, waina Yehovah Sup̃e adeada e dip̃aki lua e pano naga ega noa ki da asa, navasaana maga mamau puti wanogoe, go e nopu,

²E pakilina naga Asariah natu ni Hoshaiah, go Yohanan natu ni Kareah, go naatam̃oli leomadaga maga mamau puti, eu pasa po noa ki Yeremiah, eu naga, Nigo ku pasa nasorosoroana: Yehovah Sup̃e aginami e da dip̃aki lua ko umai mau naga p̃a wo naga, Kuga wo da paki Ityipt pano naga kuga m̃enaki atatoko asa:

³Ma Baruk natu ni Neriah e mari ko naga p̃a mari dip̃a gami, naga kuga vitua ki gami paki nam̃elearu ni naka ni Kaldea, naga nara euga toropusi gami paki namateana, kite piragi lua pavakoto gami paki Babelon pano.

⁴Go dapala nogoe Yohanan natu ni Kareah, go nap̃au maga mamau puti ni naatam̃oli maga ni navakalo, go narei mamau, eu da dogo parati ki nadaleo ni Yehovah mau, naga euga doko navanua ni Yudah doko.

⁵Ma Yohanan natu ni Kareah, go nap̃au maga mamau puti ni naatam̃oli maga ni navakalo, eu piragi namagovai mamau ni Yudah waina eu pae nalauna maga mamau puti waina eu pei tea kopasiluaana paki ara pano, liliu umai naga euga toko Yudah doko;

⁶Naanoai maga, go nagoroi maga, go piakirikiri maga, go nawota natuna nagoroi maga, go sara naata waina Nebusaradan nap̃au ni tea vavaigoro maga e doropusi ra eu doko sikoti Cedaliah natu ni Ahikam natu ni Shafan, go profeta Yeremiah, go Baruk natu ni Neriah;

⁷Go eu rumai paki navanua ni Ityipt; nalakena eu da dogo parati ki nadaleo ni Yehovah mau: go eu rumai pakilina Tapanes po doko asa.

⁸Go navasaana ki Yehovah e umai paki Yeremiah doko Tapanes, po naga,

⁹P̃a tape vatu warua maga nam̃elearum̃a, doko narae ni naatam̃oli maga ni Yudah, po dasuru ki da doko naruku, tokora welewelea waina e doko namata‐pua ni nasum̃a ki Faraoh, doko Tapanes;

¹⁰Go p̃a noa ki da, p̃a naga, Yehovah ki taua maga, Sup̃e ki Israel, e noa dapala nea, e naga, Kuga leo, aga wo dip̃aki lua po piragi tea suasua aginau Nebukadnessar nawota ni Babelon umai, go aga wo lawo ki malo tasake aneana ega toko elagi ni vatu maga waia waina a dasuru ki da; go nae ega wo sike tap̃aup̃au ni naveinawotaana aneana ega tap̃augoro ra.

¹¹Go nae ega wo umai, go ega wo atugi navanua ni Ityipt; tea maga waina namateana e pei adeada, euga wo pei tea vituakiana paki namateana, go tea maga waina naviragi‐lua‐pavakotoana e pei adeada, euga wo pei tea vituakiana paki naviragi‐lua‐pavakotoana, go tea maga waina lova e pei adeada, euga wo pei tea vituakiana paki lova.

¹²Go aga wo dokoni nakapu sikai ekopu ni nasum̃a maga ki sup̃e maga ni Ityipt; go nae ega wo dap̃ara ki da, po piragi lua pavakoto ara pano: go ega wo dum̃ana kovagoro e ki navanua ni Ityipt, dapala waina tea leoparatiki shiip e do dum̃ana kovagoro e ki tea suniana aneana; go ega wo m̃elu dua ki tokora wanogoe po pano doko natam̃ateana.

¹³Go ega wo moro mari p̃oraworae tea lawodu maga ni Beth‐shemesh, waina e doko navanua ni Ityipt; go nasum̃a maga ki sup̃e maga ni Ityipt, nae ega wo dap̃ara ki da ki nakapu.