Read Nguna Togoa Etafe North YEREMIAH 44 Bible Online

YEREMIAH 44 - Nguna Togoa Etafe North bible

YEREMIAH 44

¹Navasaana waina e umai paki Yeremiah nalo ni naka ni Yudea mamau puti waina eu doko navanua ni Ityipt, waina eu doko Mikdol, go Tapanes, go Nof, go navanua ni Pathros,

²e naga, Yehovah ki taua maga, Sup̃e ki Israel, e noa dapala nea, e naga, Nimu ku punusi sua nasaana mamau puti waina a mari a paki Yerusalem, go paki natokoana maga mamau puti ni Yudah; go kuga leo, naaleatia waia eu pei malo maladi sikai doko, naatam̃oli e dika ara;

³Nalakena nasigisigileoana adeada waina eu mari a, waina eu mari p̃auluulu kinau po mari au a maeto, nalakena eu pano naga euga tap̃ara ki tea ni nap̃o wia, go naga euga magi sup̃e p̃ota maga suasua, waina eu da atae ra mau, nara kite nimu, kite tamamu maga.

⁴Ma a dip̃aki lua tea suasua aginau profeta maga mamau puti pa punusi mu pitip̃atip̃a, doko do naga, Ee, kuga ta mari tea mamaragokiana waia mau, waina kinau a pilosi a.

⁵Ma eu da daki dorogo kite daki nadaligada mau, naga euga m̃elu dua ki nasigisigileoana adeada go naga euga ta dap̃ara ki tea ni nap̃o wia paki sup̃e p̃ota maga mau.

⁶Nalakena tea wanogoe namaritausuana aginau go namaetoana aginau e pei tea takiana pano, go e pavaga natokoana maga ni Yudah, go napua maga ni Yerusalem; go eu makaka po pei maso maladi doko, dapala waina e doko naaleatia waia.

⁷Nalakena tea wanogoe Yehovah Sup̃e ki taua maga, Sup̃e ki Israel, e noa dapala nea, e naga, Ekasana ku mari namarinaleosaana warua waia dum̃amu dip̃a mu, naga kuga taelua m̃elu dua ki mu tea matua naanoai go nagoroi, piakiki go tea waina e do susu, m̃elu dua ki m̃aleoputo ni Yudah, naga te naata sikai ega ta manimu pei tea toropusiana doko mau?

⁸Ekasana ku mari p̃auluulu kinau po mari au a maeto ki nawosiana maga ni nam̃elearumu maga, doko do dap̃ara ki tea ni nap̃o wia paki sup̃e p̃ota maga navanua ni Ityipt, tokora waina ku paki asa pano naga kuga m̃enaki atatoko asa; naga kuga vei tea taeluaana, go naga kuga vei tea ni navasasakiana sikai, go tea ni navasapinoaana sikai usuraki nalauna maga mamau puti ni maramana?

⁹Ku malio ki sua nasigisigileoana ki tamamu maga, go nasigisigileoana ki nawota maga ni Yudah, go nasigisigileoana ki nagoroi adeada maga, go nasigisigileoana animu, go nasigisigileoana ki nagoroi animu maga, waina eu mari a navanua ni Yudah, go napua maga ni Yerusalem, kite?

¹⁰Nara eu da dum̃ada doro ra pakitano pa pa paki naaleatia waia mau, go eu da mataku, kite surata nawotaeana aginau mau, kite natawonakiana aginau maga mau, waina a lawo ki da naraemu go narae ni tamamu maga.

¹¹Nalakena tea wanogoe Yehovah ki taua maga, Sup̃e ki Israel, e noa dapala nea, e naga, Kuga leo, aga wo lawo ki naraegu ega tip̃a mu naga aga mari nasaana, naga aga taelua Yudah mamau.

¹²Go nalo ni namagovai ni Yudah waina eu pei tea toropusiana doko, waina eu lawo ki naraeda naga euga vaki navanua ni Ityipt pano, naga euga m̃enaki atatoko asa, nara euga wo pei tea maripuolikiana; doko navanua ni Ityipt euga wo dowo; go euga wo pei tea maripuolikiana ki lova go ki navitoloana; euga wo mate, pae tea vakitano pa pa paki tea vakilagi, ki lova go ki navitoloana: go euga wo pei tea mamaragokiana sikai, go tea ni nasaram̃akotoana sikai, go tea ni navasasakiana sikai, go tea ni navasapinoaana sikai.

¹³Nalakena aga wo parati tea maga waina eu doko navanua ni Ityipt, dapala waina a parati Yerusalem, ki lova, go ki navitoloana, go ki nasasanaana sa:

¹⁴Dapala waina namagovai ni Yudah waina eu pei tea toropusiana doko, waina eu paki navanua ni Ityipt pano, naga euga m̃enaki atatoko asa, te naata sikai kakada ega wo da pei tea mautiana kite toropusiana mau, naga ega liliu paki navanua ni Yudah waina eu masauna naga euga liliu paki asa naga euga toko asa doko: nalakena te naata sikai kakada ega wo da liliu mau, ma tea maga waina euga sava pano nara euga sikida.

¹⁵Go naanoai maga mamau puti waina eu atae naga adagoroi maga eu dap̃ara ki tea ni nap̃o wia paki sup̃e p̃ota maga, go nagoroi maga mamau puti waina eu lawodu m̃aladigi, nasaisaiana warua sikai, naatam̃oli maga mamau puti waina eu doko Pathros, doko navanua ni Ityipt, eu pasadara Yeremiah, po naga,

¹⁶Nalo ni navasaana waina ku noa ki gami asa pae nagisa ni Yehovah, auga wo da dogo parati ki‐go asa mau.

¹⁷Ma auga wo mari pataka ni sara navasaana maga waina eu dave m̃elu nawokagami, naga auga tap̃ara ki tea ni nap̃o wia paki nawota nagoroi ni nakoroatelagi, go naga auga taki navituaana takiana maga paki nia, dapala waina au mari a, kinami go tamagami maga, nawota aginami maga go tea maraki aginami maga, doko natokoana maga ni Yudah, go napua maga ni Yerusalem: nalakena doko ragi wanogoe navinaga aginami e p̃arua, go au doko p̃ia doko, go au da punusi te nasaana mau.

¹⁸Ma pae naaleatia waina au makoto asa po da moro dap̃ara ki tea ni nap̃o wia paki nawota nagoroi ni nakoroatelagi mau, po da moro daki navituaana takiana maga paki nia mau, pa pa paki naaleatia waia, au dika ki sara naleo, go au do pei tea maripuolikiana ki lova go ki navitoloana.

¹⁹Go ragi waina au dap̃ara ki tea ni nap̃o wia paki nawota nagoroi ni nakoroatelagi, po daki navituaana takiana maga paki nia, au maneana mari keke maga naga auga lotu ki nia, po daki navituaana takiana maga paki nia, au masikigami asa, masale ki naanoai aginami maga, kite?

²⁰Go Yeremiah e noa ki narei mamau puti, ki naanoai maga, go ki nagoroi maga, ki naatam̃oli maga mamau puti waina eu dua e navasadaraana wanogoe, e naga,

²¹Tea ni nap̃o wia waina ku dap̃ara ki nia natokoana maga ni Yudah, go napua maga ni Yerusalem, nimu ma tamamu maga, go nawota animu maga go tea maraki animu maga, go narei ni navanua, Yehovah e da midoa ki parati ki nia mau, go e da umai paki namidodoana aneana mau, kite?

²²Dapala waina Yehovah e mari sa moro dum̃ana soki a mau, nalakena natomariana sa animu maga, go nalakena tea mamaragokiana maga waina ku mari ra; nalakena tea wanogoe navanua animu e po pei maso maladi sikai doko, go tea ni namagaana sikai, go tea ni navasasakiana sikai, naatam̃oli e dika asa, dapala waina e doko naaleatia waia.

²³Nalakena ku dap̃ara ki tea ni nap̃o wia, go nalakena ku mari naleo sa dip̃a Yehovah, go ku da dogo parati ki nadaleo ni Yehovah mau, kite surata pae nawotaeana aneana mau, kite natawonakiana aneana maga mau, kite nanoasokisokiana aneana maga mau; nalakena tea wanogoe nasaana waia e pakilina ki mu, dapala waina e doko naaleatia waia.

²⁴Go Yeremiah e moro noa ki narei mamau puti, go ki nagoroi maga mamau puti, e naga, Kuga rogo navasaana ki Yehovah, nimu Yudah mamau waina ku doko navanua ni Ityipt;

²⁵Yehovah ki taua maga, Sup̃e ki Israel, e noa dapala nea, e naga, Nimu ma nagoroi animu maga ku mamau pasa ki nawokamu, go ki nam̃elearumu maga ku pakavuro e, doko do naga, Auga wo mari pataka ni nasaiana aginami maga waina au noa ra, naga auga tap̃ara ki tea ni nap̃o wia paki nawota nagoroi ni nakoroatelagi, go naga auga taki navituaana takiana maga paki nia: kuga lawosoki nasaiana animu maga, go kuga mari pataka ni nasaiana animu maga.

²⁶Nalakena tea wanogoe kuga rogo navasaana ki Yehovah, nimu Yudah mamau waina ku doko navanua ni Ityipt: kuga leo, kinau a pivisa pae nagisagu warua, Yehovah e noa e, naga nagisagu ega wo da moro pei tea noaana nawoka ni naatam̃oli maga ni Yudah te sikai kakada mau, usuraki navanua mamau ni Ityipt, doko do naga, Yehovah Sup̃e e mauri.

²⁷Kuga leo, kinau a do pavaigoro ra naga aga mari nasaana go ega ta pei nawiaana mau: go naatam̃oli maga mamau puti ni Yudah waina eu doko navanua ni Ityipt, euga wo pei tea maripuolikiana ki lova, go ki navitoloana, pa pa euga wo nopu.

²⁸Go tea maga waina euga wo sava dua ki lova, euga wo m̃elu dua ki navanua ni Ityipt po liliu paki navanua ni Yudah, euga visa maau; go namagovai mamau ni Yudah waina eu pei tea toropusiana doko, waina eu paki navanua ni Ityipt pano naga euga m̃enaki atatoko asa, euga wo atae seve navasaana maga waina euga wo du, e pe vei aginau kite e pe vei adeada.

²⁹Go tea waia ega wo manimu pei navaivaiana sikai, Yehovah e noa e, naga aga wo parati mu tokora waia, naga kuga atae naga navasaana aginau maga euga wo lawodu dip̃a mu raki nasaana:

³⁰Yehovah e noa dapala nea, e naga, Kuga leo, aga wo pitua ki Faraoh Hofra nawota ni Ityipt paki nam̃elearu ni tea kokona ki nia maga, go paki nam̃elearu ni tea maga waina eu do laaga namauriana aneana; ega tapala waina a pitua ki Sedekiah nawota ni Yudah paki nam̃elearu ni Nebukadnessar nawota ni Babelon, tea kokona ki nia, waina e laaga namauriana aneana.