Read Nguna Togoa Etafe North YEREMIAH 46 Bible Online

YEREMIAH 46 - Nguna Togoa Etafe North bible

YEREMIAH 46

¹Navasaana ki Yehovah waina e umai paki profeta Yeremiah nalo ni nalauna maga.

²Nalo ni Ityipt: nalo ni naatam̃oli maga ni navakalo ki Faraoh‐neko nawota ni Ityipt, waina e doko nadigi ni noaisara Eufrates doko Karkemish, waina Nebukadnessar nawota ni Babelon, e atugi a natau kevati ki Yehoiakim natu ni Yosiah, nawota ni Yudah, e naga.

³Kuga mari m̃ata ki sila go nakokoro, po disu paki m̃aladigi ki navakalo.

⁴Kuga mari m̃ata ki horse maga go kuga sakesaake ara, nimu naatam̃oli sakesaake horse maga, go kuga suni kalup̃au ni vatu animu maga po lawodugoro; kuga vakasa ki naio animu maga, kuga suni sugoro kovagoro maga ni vatu.

⁵Ekasana kinau a punusi a? Eu saram̃akoto, go eu sukasuka pano; go m̃aau adeada maga eu pei tea atugiana, go eu sava pano m̃araverave, eu da leo kitaku mau: namatakuana e doko daliviri, Yehovah e noa e.

⁶Tea sava m̃araverave ega ta sava pano mau, go naatam̃oli marimatua ega ta pei tea mautiana mau; doko taleva ni north nadigi ni noaisara Eufrates eu dapilagona po dowo.

⁷Sei waia waina e do sake dakiusi Naile, waina noai kakana maga eu pei tea duletuleakiana dapala noaisara maga?

⁸Ityipt e do sake dakiusi Naile, go noai kakana maga eu pei tea duletuleakiana dapala noaisara maga: go e naga, Aga wo sake pakilagi, aga wo dap̃augoro navanua; aga wo mari puoli ki natokoana go naatatoko kakana maga.

⁹Kuga sake pano horse maga O; go kuga tam̃atam̃alua kasua kariot maga O; go m̃aau maga euga tave pano: Kush go Put waina eu puati nakokoro; go Ludim waina eu pua p̃elua ki naasu.

¹⁰Nalakena naaleatia wanogoe e pei naaleatia ki Nawota, Yehovah ki taua maga, naaleatia sikai ni nasikosikoana, naga ega tum̃ana kokonagoro e m̃elu dua ki tea kokona ki nia maga: go lova ega wo gani dinomi po puka, go ega wo munu nadada po matamaloku asa: nalakena Yehovah, Yehovah ki taua maga, e do mari naviriana sikai navanua ni north nadigi ni noaisara Eufrates.

¹¹P̃a sake paki Cilead pano, po dape naroro lolo, nagoroi atara ni Ityipt O: ma naroro lolo visarasara anigo maga eu pei tea p̃alo mau; nalakena p̃a wo da pei tea maripauriana mau.

¹²Nalauna maga eu dogo narogorogoana nalo ni namaliereana anigo, go maramana e pura ki nakuapiosoana anigo: nalakena naatam̃oli marimatua e dapilagona dip̃a tea marimatua, ero paka sikai dowo, go ero dua dowo.

¹³Navasaana waina Yehovah e noa ki profeta Yeremiah asa, nalo ni Nebukadnessar nawota ni Babelon, takana waina ega wo umai po atugi navanua ni Ityipt, e naga.

¹⁴Kuga noasai a Ityipt, po dogorogo ki nia Mikdol, po dogorogo ki nia Nof go Tapanes: kuga naga, P̃a lawodu kasua, po mari m̃ata; nalakena lova e gani dinomi dalivirigoro ko.

¹⁵Ekasana tea kasua anigo maga eu pei tea sasara‐lua‐ana pano? Eu da lawodu mau, nalakena Yehovah e dielua ra pano.

¹⁶E mari tea laapa eu dapilagona, io, eu dum̃ada dapilagona ara: go eu naga, Tuga tuleana, go tuga moro liliu paki narei anigida, go paki navanua waina tu pakilina asa, m̃elu dua ki nariesokiana ni lova.

¹⁷Tokora wanogoe eu pioso, po naga, Faraoh nawota ni Ityipt e pei namarip̃araiana m̃oli sikai; e dape pele ragi tatutakiana.

¹⁸Kinau a mauri, Nawota waina nagisana e pei Yehovah ki taua maga e noa e, go dapala waina Tabor e doko m̃aleoputo ni tava maga, go dapala waina Karmel e doko nadigi ni natasi, dapala nogoe nae ega wo umai.

¹⁹Nagoroi atara waina ku doko Ityipt O, p̃a marisokisoki naga p̃a vei tea viragi‐luapavakotoana pano: nalakena Nof ega wo pei maso maladi sikai, go ega wo pei tea tap̃arakiana, naatam̃oli ega wo dika asa.

²⁰Ityipt e pei kau natuna goroi leom̃atakiana sikai; ma namarisakiana e po m̃elu north umai, e po pakilina ki nia.

²¹Go naatam̃oli vasadapuiana aneana maga m̃aleoputo kakana, eu dakiusi kau natuna maga ni kelu; nalakena nara ma eu sukasuka pano, eu mamau puti sava pano, eu da lawodu mau: nalakena naaleatia ni narogokitesaana adeada e pakilina ki da, ragi ni navarati‐raana.

²²Go nasaruruana kakana ega wo dakiusi m̃aata waina e do soka pano; nalakena tea kokona ki nia maga euga wo pei taua warua sikai ni naatam̃oli navakalo, go euga wo mari dip̃a e ki tagoto maga, dapala tea tae nakau maga.

²³Mala ni nakau aneana e mari sap̃o pei tea leousiusiana, ma nara euga wo daekotokotovi a, Yehovah e noa e; nalakena eu laapa liu midiri maga, go eu mari sap̃o pei tea veve‐atae‐ana.

²⁴Ityipt natuna nagoroi ega wo pei tea toropusiana paki namaliereana; ega wo pei tea vituakiana paki nam̃elearu ni narei maga ni north.

²⁵Yehovah ki taua maga, Sup̃e ki Israel, e noa dapala nea, e naga, Kuga leo, aga wo parati Amon ni No, go Faraoh, go Ityipt, nara ma sup̃e aneana maga, go nawota aneana maga: Faraoh nogo, go tea maga waina eu pavatu asa:

²⁶Go aga wo pitua ki da paki nam̃elearu ni tea maga waina eu laaga namauriana adeada, go paki nam̃elearu ni Nebukadnessar nawota ni Babelon, go paki nam̃elearu ni tea suasua aneana maga: go edaku ki tea wanogoe, naatam̃oli ega wo moro doko Ityipt, dapala waina eu doko naaleatia maga ni tuai, Yehovah e noa e.

²⁷Ma p̃a ta mataku mau, Yakob tea suasua aginau O, go p̃a ta m̃anaunau mau, Israel O: nalakena p̃a leo, aga wo pualua ko m̃elu dua ki uvea umai, go naworam̃a m̃elu dua ki navanua ni naviragilua‐pavakotoana adeada; go Yakob ega wo liliu, go ega wo doko dam̃ate doko, po doko p̃ia doko, go te naata ega wo da mari a ega mataku mau.

²⁸P̃a ta mataku mau, Yakob tea suasua aginau O, Yehovah e noa e; nalakena kinau a sikoti ko doko: nalakena aga wo mari puoli ki nalauna maga mamau puti waina a daperavera ki‐go usuraki ara, ma aga wo da mari puoli ki‐go mau; ma aga wo parati ko navaratiana leana, go aga wo da noa naga sogi e puoli ki‐go mau.