Read Nguna Togoa Etafe North YEREMIAH 47 Bible Online

YEREMIAH 47 - Nguna Togoa Etafe North bible

YEREMIAH 47

¹Navasaana ki Yehovah waina e umai paki profeta Yeremiah nalo ni Filistine maga, pea ki ragi waina Faraoh e atugi Casa.

²Yehovah e noa dapala nea, e naga, Kuga leo, noai maga eu do sake m̃elu north umai, go euga wo pei nap̃ap̃a noaisara lelep̃esi sikai, go ega wo sara peravera po dap̃augoro navanua go sara naleo waina eu doko asa, natokoana go tea maga waina eu doko asa: go naatam̃oli maga euga wo kuapioso, go naatatoko maga mamau puti ni navanua euga wo lalagaarova.

³Nalakena nasaruruana ni nasava‐dukituki‐ana ni tea kasua aneana maga, nalakena natam̃atam̃aluaana ni kariot aneana maga, go nasaruruana ni tea taliepu aneana maga, tamada maga eu da leo kitaku punusi natuda maga mau, nalakena nam̃elearuda maga eu manainai.

⁴Nalakena naaleatia waina ega wo umai naga ega mari puoli ki Filistine maga, go naga ega taelua m̃elu dua ki Tair go Sidon, sara tea silae waina eu pei tea toropusiana doko: nalakena Yehovah ega wo mari puoli ki Filistine maga mamau puti, namagovai kakada waina eu pei tea toropusiana doko navanua ni Kaftor.

⁵Nam̃asuaana e doko Casa; Ashkelon e pei tea tap̃olosiwokiana. Pa pa paki seve ragi kuga wo dum̃amu dovae nap̃okasimu, nimu namagovai ni Anakim waina ku pei tea toropusiana doko?

⁶Lova ki Yehovah O, naaleatia eu pisa eu ko puoli pa pa p̃a wo doko dorogo? P̃a tum̃am̃a sai ki‐go nala anigo; p̃a maromaro po du dorogo.

⁷Ma ega wo mariatae du dorogo dapale sava, ragi waina Yehovah e dua e natip̃akiana sikai waina ega mari patakana dip̃a Ashkelon, go dip̃a elau ni natasi tokora waina e noa e?