Read Nguna Togoa Etafe North YEREMIAH 48 Bible Online

YEREMIAH 48 - Nguna Togoa Etafe North bible

YEREMIAH 48

¹Nalo ni Moab. Yehovah ki taua maga, Sup̃e ki Israel, e noa dapala nea, e naga, Ai ki Nebo! Nalakena e makaka one; Kiriathaim e pei tea toropusiana paki namaliereana, e pei tea tape‐pavakotoana: Miskab e pinovinoi go e saram̃akoto.

²Narogoana ni Moab e nopu; doko Heshbon eu mari nasekeana dip̃a e, eu naga, Kuga umai, go tuga taelua e naga ega ta moro pei nalauna sikai mau. Go Naatam̃oli Roropa maga O, nimu ma kuga wo pei tea mariana kuga vunuta; lova ega wo kopasi mu.

³Nadaleo sikai ni nakuapiosoana e pei tea rogoana m̃elu Horonaim, e naga, Natapepavakotoana go namarisakiana warua!

⁴Moab e pei tea maripuolikiana; nakuapiosoana kakana e pei tea rogoana pano pa pa liliu Soar.

⁵Nalakena eu sake pae tokora ni nasakesakeana paki Luhith pano, eu do sake, eu do sake, eu do dagi; nalakena doko tokora ni nasiwosiwoana paki Horonaim, eu dogo nakuapiosoana ni namarisakiana.

⁶Kuga sava pano, po dum̃amu mautipauri namauriana animu, go kuga toko ega tapala nataputea waina e doko masop̃alo.

⁷Nalakena ku pavatu nawosiana anigo maga go naleo wia tauakiana anigo maga, nigo ma p̃a wo pei tea viragi‐luapavakotoana: go Kemosh ega wo pei tea viragi‐lua‐pavakotoana pano, nara ma tea viri aneana maga go tea maraki aneana maga euga mamau.

⁸Go tea maripavakoto ega wo darup̃a sara natokoana, go te natokoana sikai ega wo da pei tea mautiana mau; go nap̃aloa nae ma ega wo pano puoli, go malo matemate ega wo pei tea maripuolikiana; dapala waina Yehovah e noa sua e.

⁹Kuga tua Moab nalivaruna maga naga ega tiri po pano: natokoana kakana maga euga wo pei maso maladi sikai, naatam̃oli ega wo dika ara.

¹⁰Naata waina e do mari nawosiana ki Yehovah pae namarisoreana ega vei tea vasasakiana, go naata waina e do mauti lova aneana ki nada ega vei tea vasasakiana.

¹¹Moab e doko dam̃ate doko pae ragi ni navei‐natureai‐ana aneana pa pa, go e doko m̃oli doko, go e da pei tea takiana paki lasa go paki lasa mau, go e da pei tea viragi‐luapavakotoana pano mau: nalakena tea wanogoe nakatidogoana kakana e pataka sikai doko, go nasidogoana kakana e da panop̃ota mau.

¹²Nalakena tea wanogoe, kuga leo, naaleatia maga euga wo umai, Yehovah e noa e, naga aga wo dip̃aki lua pa punusi a tea taki maga, go nara euga wo daki nia; go euga wo daki lasa aneana maga pa pa euga tap̃a, po marip̃oraworae lasa aneana maga.

¹³Go Moab ega wo maliere nalakena Kemosh, dapala waina nasum̃a ni Israel eu maliere nalakena Beth‐el, waina eu pavatu asa.

¹⁴Nimu ku pasa pakavakae, ku naga, Au pei naatam̃oli marimatua maga, go naatam̃oli kasua maga ni navakalo.

¹⁵Ma Moab e pei tea vuti‐luapavakotoana, eu sake paki natokoana kakana maga pano, go natureai matadoaana kakana maga eu siwo paki namaripunueana pano, Nawota waina nagisana e pei Yehovah ki taua maga, nae e noa e.

¹⁶Namarisakiana ni Moab e pei m̃aladigi, go narogokitesaana aneana e do mari m̃araverave.

¹⁷Kuga tagisi a, nimu tea mamau puti waina ku doko dalivirigoro e, go nimu tea mamau puti waina ku atae narogoana kakana; kuga naga, Naap̃e kasua, tiko samasamaniana, e makoto!

¹⁸P̃a m̃elu dua ki nasamasamaniana anigo siwo umai, po doko natano garagara, naatatoko ni Dibon O; nalakena tea waina e mari pavakoto ki Moab e sake umai dip̃a ko, e mari puoli ki tokora kasua p̃aakagoroana anigo maga.

¹⁹P̃a lawodu napua lapa, naatatoko ni Aroer O, po leleogoro: p̃a vusuusu ki tea waina e do sava pano, go ki tea waina e pei tea mautiana; p̃a naga, Nasava waina e pakilina?

²⁰Moab e pei tea toropusiana paki namaliereana; nalakena e sapuraki one: kuga lalagaarova po dagi; kuga noasai a Arnon, naga Moab e sapuraki one.

²¹Go navasap̃otaeana e po umai doko malo matemate; go e doko Holon, go Yahsah, go Mefaath;

²²Go Dibon, go Nebo, go Beth‐diblataim;

²³Go Kiriathaim, go Beth‐kamul, go Bethmeon;

²⁴Go Kerioth, go Bosrah, go natokoana maga mamau puti ni navanua ni Moab, uvea go m̃aladigi.

²⁵Napati ni nap̃au ni Moab e pei tea taekotoviana, go naruna e makoto, Yehovah e noa e.

²⁶Kuga mari a ega matamaloku; nalakena e dum̃ana dape a e pakilagi dip̃a Yehovah: go Moab ega wo dum̃ana malulua ki nia naluaana aneana, go nae ega wo pei tea mari‐saudoa‐kiana.

²⁷Nalakena Israel e da pei tea ni namarisaudoakiana sikai paki‐go mau, kite? Nae e pei tea vap̃aiana e doko m̃aleoputo ni tea mari pavakoto maga, kite? Nalakena ragi waina ku pasa nalo kakana, ku ligiligi p̃au.

²⁸Kuga toropusi natokoana maga po doko vatu laketoko, nimu naatatoko maga ni Moab O; go kuga toko ega takiusi tokopea waina e mari vete aneana napatira maga.

²⁹Tu dogo sua narogorogoana nalo ni naleomadagaana ni Moab, e pei tea leomadaga warua; go nalo ni naveip̃op̃o‐vakilagiana aneana, go naleomadagaana aneana, go navakilagiliu‐ana aneana, go navakavakaeana ni nap̃op̃ona.

³⁰Kinau a atae namaritausuana aneana, Yehovah e noa e, naga e pei tea p̃alo; navasapakavakaeana aneana maga eu da mari te navatuna mau.

³¹Nalakena tea wanogoe aga wo lalagaarova nalo ni Moab; io, aga wo kuapioso nalo ni Moab mamau puti: aga wo susue nalo ni naatam̃oli maga ni Kir‐heres.

³²Vaine ni Sibmah O, aga wo dagisi ko ki natagisiana waina ega wo p̃arua liu natagisiana nalo ni Yaser: ara kakam̃a maga eu pea pei tea saikiana elagi ni natasi pano pa pa eu paraki natasi ni Yaser: tea mari pavakoto e darup̃a nawa matua anigo maga go nawa ni vaine anigo.

³³Nalaelaeaana go nasamasamaana ero pei tea tapeluaana pano m̃elu dua ki vanua ni namasu, go m̃elu dua ki navanua ni Moab; go a mari waine e nopu m̃oru ni navasokiana ni nawa ni vaine: te naata e da moro pasisoki ra pilake nararasaana mau; nararasaana adeada e da pei tea ni nalaelaeaana mau.

³⁴Heshbon go Elealeh ero kuapioso, pa pa liliu Yahas eu lua ki nadaleoda; pae Soar pano pa pa liliu Horonaim go Eklath‐shelishiyah: nalakena noai maga ni Nimrim eu dap̃a.

³⁵Go naata waina e do pitua ki navituaana maga tokora vakilagi, go naata waina e do dap̃ara ki tea ni nap̃o wia paki sup̃e aneana maga, aga wo daelua ra m̃elu dua ki Moab, Yehovah e noa e.

³⁶Nalakena tea wanogoe nap̃op̃ogu e do gi dakiusi lokore nalo ni Moab, go nap̃op̃ogu e do gi dakiusi lokore nalo ni naatam̃oli maga ni Kir‐heres: nalakena nasogolapaana waina eu dalua e, e pano puoli.

³⁷Nalakena eu sikasikai pei p̃au m̃asua, go nalolu ni nasida e pei tea masiluaana: go nam̃elearuda maga eu pei tea tovaeana, namaloda maga eu pei tea tasokiana ki nakulukulu ni sak.

³⁸Nalalagaarovaana e doko nap̃au ni nasum̃a maga mamau puti ni Moab, go napua kakana maga daliviri: nalakena kinau a mari p̃orae Moab dapala lasa sikai waina te naata e da midoa ki nia mau, Yehovah e noa e.

³⁹Ee, e pei tea sapuraki one! Eu do lalagaarova! Moab e atutaku nalakena namaliereana! Moab e po pei tea ni namarisaudoakiana sikai, go tea ni nasaram̃akotoana sikai paki tea mamau puti waina eu doko dalivirigoro e.

⁴⁰Nalakena Yehovah e noa dapala nea, e naga, Kuga leo, nae ega wo diri dapala ikila sikai, go ega wo sai ki nalivaruna maga dip̃a Moab.

⁴¹Kerioth e pei tea tape pavakotoana, go tokora kasua p̃aakagoroana maga eu saram̃akoto, go naaleatia wanogoe nap̃op̃o ni naatam̃oli marimatua maga ni Moab ega wo doko dapala nap̃op̃o ni nagoroi sikai waina e dogo navitinuana ni navisolaana.

⁴²Go Moab ega wo pei tea maripuolikiana, ega wo da moro pei nalauna sikai mau, nalakena e dum̃ana dape a pakilagi dip̃a Yehovah.

⁴³Namatakuana, go m̃orutano, go vaivai, eu doko kivea ki‐go, naatatoko ni Moab O, Yehovah e noa e.

⁴⁴Tea waina ega sava dua ki namatakuana, ega wo dowo paki m̃orutano; go tea waina ega sake m̃elu dua ki m̃orutano, ega wo pei tea vuasokiana ki vaivai: nalakena kinau aga wo mari natau ni navaratira‐ana ega wo pakilina ki nia, Moab nogo, Yehovah e noa e.

⁴⁵Tea maga waina eu sava pano, eu lawodu melu ni Heshbon, eu dika nakasuaana: ma nakapu vavaga sikai e dave m̃elu Heshbon, go mena ni nakapu sikai e dave m̃elu m̃aleoputo ni Sihon, go e gani dinomi narae ni Moab, go nam̃asua ni nap̃au ni tea leolagilagi natuna maga.

⁴⁶Ai ki‐go, Moab O! Narei ni Kemosh eu pei sap̃o: nalakena natum̃a naanoai maga eu pei tea viragi‐lua‐pavakotoana pano, go natum̃a nagoroi maga nara ma eu paki naviragi‐lua‐pavakotoana pano.

⁴⁷Ma kinau aga wo moro piragi liliua ki naviragi‐lua‐pavakotoana ni Moab naaleatia edaku maau maga, Yehovah e noa e. Navasaana ni navasap̃otaeana nalo ni Moab e nopu nea.