Read Nguna Togoa Etafe North YEREMIAH 49 Bible Online

YEREMIAH 49 - Nguna Togoa Etafe North bible

YEREMIAH 49

¹Nalo ni Ammon natuna maga. Yehovah e noa dapala nea, e naga, Israel e dika ki natuna naanoai, kite? E dika ki tea veanipioli, kite? Go ekasana Milkom e peanipioli ki Cad, go narei aneana eu doko natokoana kakana maga doko?

²Nalakena tea wanogoe kuga leo, naaleatia maga euga wo umai, Yehovah e noa e, go aga wo mari naviosoana sikai paki navakalo ega vei tea rogoana dip̃a Rabbah ni Ammon natuna maga; go ega wo pei taua makaka sikai, go natokoana kakana maga euga wo pei tea tap̃arakiana ki nakapu: ragi wanogoe Israel ega wo peanipioli ki tea maga waina eu pea peanipioli ki nia, Yehovah e noa e.

³P̃a lalagaarova Heshbon O, nalakena Ai e pei tea vuti‐lua‐pavakotoana; kuga tagi, Rabbah natuna nagoroi maga O, kuga tum̃amu dasoki mu ki nakulukulu ni sak: kuga susue, po dum̃amu dovae mu; nalakena Milkom ega wo pei tea viragi‐lua‐pavakotoana pano, nara ma tea viri aneana maga go tea maraki aneana maga euga mamau.

⁴Ekasana ku pakavakae nap̃aloa m̃anopunopu anigo, po pavatu nasogolapaana anigo, nagoroi atara O, waina ku dowo kitaku, doko do naga, Sei ega wo umai mari dip̃a au?

⁵P̃a leo, aga wo mari namatakuana ega wo darup̃a ko, Nawota, Yehovah ki taua maga e noa e, p̃a wo matau ki tea mamau puti waina eu doko dalivirigoro ko; go kuga wo pei tea kopasiluaana pano, sara naatam̃oli sikasikai kivea ki da, go tea waina ega viragi saisai ki tea surata sasap̃o, ega wo dika.

⁶Ma ragi edaku aga wo moro piragi liliua ki naviragi‐lua‐pavakotoana ni Ammon natuna maga, Yehovah e noa e.

⁷Nalo ni Edom. Yehovah ki taua maga e noa dapala nea, e naga, Namanumatuaana e da moro doko Teman mau, kite? Namidoakip̃otaeana e puoli ki tea midoaki atae, kite? Namanumatuaana adeada e pano puoli, kite?

⁸Kuga sava pano, kuga maradoa liliu, kuga dokoloku doko tokora maga ni natokolokuana, naatatoko maga ni Dedan O; nalakena aga wo mari narogokitesaana ega vakilina ki Esau, ragi waina aga wo parati a.

⁹Tea vai nawa ni vaine eu pe umai naga eu pe vai nawa ni vaine anigo, eu pe wo da doropusi nawa ni vaine seara eu pe ta doko mau, kite? Tea tape pavakoto maga eu pe umai p̃ogi, eu pe wo da dape pavakoto pa pa e pe vatakada, po doropusi te seara e pe tupele, kite?

¹⁰Ma kinau a awosi lua Esau e m̃alam̃ala, a mari pakasa ki tokora ni nasavasiliana aneana maga, go ega wo da mariatae dum̃ana dasuru ki nia mau: naworaworana e pei tea vuti‐luapavakotoana, nara ma taina maga, go tea ni m̃aladigi ki nia, go e puoli.

¹¹P̃a toropusi namalepu anigo maga euga toko, kinau aga wo mauti ra euga mauri; go nagoroi malepu anigo maga euga vavatu au.

¹²Nalakena Yehovah e noa dapala nea, e naga, P̃a leo, tea maga waina e da pei adeada naga euga munu lasa munu, euga wo munugi a; go nigo ku pei naata waina p̃a wo da pei tea varatiana mau, kite? P̃a wo da dika ki navaratiana mau, ma p̃a wo munugi a lomau.

¹³Nalakena kinau a pivisa pae nagisagu, Yehovah e noa e, naga Bosrah ega wo pei tea ni nasaram̃akotoana sikai, tea ni navasapinoaana sikai, maso maladi sikai, go tea ni navasasakiana sikai; go natokoana kakana maga mamau puti euga wo pei maso maladi maga doko pa pa ega tu du po du mau du.

¹⁴Kinau a dogo narogorogoana maga pae Yehovah, go tea tautauana sikai e pei tea tip̃akiluaana pano usuraki nalauna maga, doko do naga, Kuga tum̃amu piragi saisai ki mu, po umai mari dip̃a e, po duleana raki navakalo.

¹⁵Nalakena p̃a leo, kinau aga wo mari ko p̃a vei tea kiki sa m̃aleoputo ni nalauna maga, tea midoaki‐p̃alo‐kiana m̃aleoputo ni naatam̃oli maga.

¹⁶Go nalo ni namata‐kilakila‐ana anigo, navakilagiliu‐ana ni nap̃op̃om̃a e surue ko, nigo waina ku doko p̃alua maga ni vatu laketoko O, go waina ku mauti tokora vakilagi ni tava e pei anigo: ku pe mari vete anigo e pe toko elagi mau dapala ikila, ma a pe wo piragi lua ko m̃elu dua ki tokora wanogoe pakitano, Yehovah e noa e.

¹⁷Go Edom ega wo pei tea ni nasaram̃akotoana sikai: sara naata waina euga wo surata liu sa euga wo saram̃akoto asa, go euga wo mari saudoa ki nia nalakena namarisakiana kakana maga mamau puti waina e pei tea marisakiana asa.

¹⁸Ega tapala natap̃olosiwokiana ki Sodom go ki Comorrah go ki natokoana kakana maga m̃aladigi, Yehovah e noa e, ega tapala nogoe te naata ega ta doko tokora wanogoe doko mau, go naatam̃oli natuna maga te sikai kakada ega ta m̃enaki atatoko asa mau.

¹⁹Kuga leo, ega wo sake dakiusi laion sikai m̃elu dua ki namalasi ni Yordan umai dip̃a tokora tokoana kasua: ma aga wo mari a ega wo sava dua ki nia m̃araverave; go tea waina ega vei tea matadoaana, e pei nae waina aga wo lawo ki nia ega tap̃au sa: nalakena sei e doko waina e dakiusi au? Go sei ega wo maginau datuta ki ragi tatutakiana sikai? Go tea leoparatiki sei waina ega wo lawodugoro au?

²⁰Nalakena tea wanogoe kuga rogo namidoakip̃otaeana ki Yehovah, waina e midoaki p̃otae a dip̃a Edom: go namidoakisokiana aneana maga, waina e midoakisoki ra dip̃a naatatoko maga ni Teman: tea kirikiri maga ni navata adeada euga wo pei tea rosagi‐lua‐ana pano; tea ni loga adeada euga wo saram̃akoto nalo ni tea waina e pakilina ki da.

²¹Maramana e m̃anaunau nasaruruana ni narowoana adeada; nakuapiosoana sikai e doko, go nadaleona e pei tea rogoana Natasi Miala.

²²Kuga leo, tea sikai ega wo sake umai po diri dapala ikila, po sai ki nalivaruna maga dip̃a Bosrah: go nap̃op̃o ni m̃aau maga ni Edom naaleatia wanogoe, ega wo dakiusi nap̃op̃o ni nagoroi sikai waina e dogo navitinuana ni navisolaana.

²³Nalo ni Damaseko. Hamath go Arpad ero pinovinoi; nalakena ero dogo narogorogoana sa maga, go nap̃op̃oda e sara pano: ero pei tea duletuleakiana dakiusi natasi waina e mari sa doko dorogo mau.

²⁴Damaseko e po manainai, e dum̃ana doa e naga ega sava pano, go naruruuruana e puasoki a: narogokitesaana go nasusueana maga eu darup̃a e, e dapala nagoroi sikai waina e dogo navitinuana ni navisolaana.

²⁵Ai ki nia, waina e pea pei natokoana rogoana sikai natokoana ni nasamasamaana aginau, ma ragi waia e pei malepu doko!

²⁶Nalakena tea wanogoe natureai kakana maga euga wo dowo napua maga ni natokoana kakana, go naatam̃oli maga ni navakalo mamau puti euga wo pei tea taeluaana naaleatia wanogoe, Yehovah ki taua maga e noa e.

²⁷Go kinau aga wo dokoni nakapu sikai p̃aaka ni Damaseko, go ega wo gani dinomi nasum̃a vakilagi maga ki Ben‐hadad.

²⁸Nalo ni Kedar, go nalo ni namarakiana maga ni Hasor, waina Nebukadnessar nawota ni Babelon e atugi a. Yehovah e noa dapala nea, e naga, Kuga tuleana, kuga sake paki Kedar pano, po mari pavakoto naka ni ist.

²⁹Euga wo puti lua pavakoto tap̃aup̃au adeada maga go navata adeada maga; euga wo puti lua pavakoto nakulukulu taugoro p̃otae adeada maga, go naloriki adeada maga mamau puti, go kamel adeada maga: go euga wo kuapioso paki da, doko do naga, Namatakuana e doko daliviri.

³⁰Kuga sava pano, kuga vaki uvea, kuga tokoloku doko tokora maga ni natokolokuana, nimu naatatoko maga ni Hasor O, Yehovah e noa e; nalakena Nebukadnessar nawota ni Babelon e mari nasekeana dip̃a mu, go e midoaki p̃otae namidoaki‐p̃otaeana sikai dip̃a mu.

³¹Kuga tuleana, kuga sake pano po mari dip̃a nalauna sikai waina e doko dam̃ate doko, waina e doko p̃ia doko, Yehovah e noa e; waina e dika ki namata‐pua maga go ki tea walagoto maga, go waina e sikina doko.

³²Go kamel adeada maga euga wo pei tea vuti‐lua‐pavakotoana animu sikai, go navata maga ni katel adeada euga wo pei tea tapelua‐pavakotoana animu sikai: go tea maga waina eu alakotovi nalolu ni nap̃alakutuda, kinau aga wo daperavera ki da paki nalagi maga mamau puti; go aga wo piragi namarisakiana umai paki da pae sara tokora dalivirigoro ra, Yehovah e noa e.

³³Go Hasor ega wo pei tokora tokoana sikai ki koria mila maga, ega wo pei maso maladi sikai doko, pa pa ega tu mau du: te naata sikai ega wo da doko asa doko mau, go naatam̃oli natuna te sikai kakada ega wo da m̃enaki atatoko asa mau.

³⁴Navasaana ki Yehovah waina e umai paki profeta Yeremiah nalo ni Elam, doko ragi ni naatulakeana ni namaramaraana ki Sedekiah nawota ni Yudah,

³⁵e naga, Yehovah ki taua maga e noa dapala nea, e naga, Kuga leo, kinau aga wo mari kotovi naasu ni Elam, laketano ni namarimatuaana adeada.

³⁶Go aga wo piragi nalagi pati pae naweluki pati ni nakoroatelagi umai paki Elam, go aga wo sapura ki da paki nalagi mamau puti wanogoe; go nalauna sikai ega wo dika, waina tea kopasiluaana maga ni Elam euga wo da paki asa mau.

³⁷Go aga wo mari Elam ega wo m̃anaunau narae ni tea kokona ki da maga, go narae ni tea maga waina eu laaga namauriana adeada: go aga wo mari nasaana ega wo pakilina ki da, namaetoana vivitinu aginau nogo, Yehovah e noa e; go aga wo dip̃aki lua lova ega wo kopasi ra, pa pa ega wo mari puoli ki da:

³⁸Go aga wo lawo ki malo tasake aginau ega toko Elam, go aga wo mari puoli ki nawota adeada go tea maraki adeada maga m̃elu dua ki tokora wanogoe, Yehovah e noa e.

³⁹Ma ega wo pakilina naaleatia edaku maau maga, naga aga wo moro piragi liliua ki naviragi‐lua‐pavakotoana ki Elam, Yehovah e noa e.