Read Nguna Togoa Etafe North YEREMIAH 5 Bible Online

YEREMIAH 5 - Nguna Togoa Etafe North bible

YEREMIAH 5

¹Kuga sava duaduru napua maga ni Yerusalem, po punusi, po atae, po leousiusi tokora welewelea kakana maga, mase ku pe mariatae pap̃ai naatam̃oli sikai, kite tea sikai e pe toko waina e do mari tea waina e leana, waina e do laaga naveilomauana; go aga wo maneana midoakikorokoro.

²Go eu pe naga, Yehovah e mauri; ma eu pe vivisa pae nasorosoroana.

³Yehovah O, namatam̃a ero da do leo paki naveilomauana mau, kite? Ku atugi ra, ma eu da dogokitesa asa mau; ku mari puoli ki da, ma eu karai dape navaratipiseikiana: eu dum̃ada mari naraeda eu kasua liu vatu; eu karai naga euga midoakidoa.

⁴Go kinau a naga, E pei lomau, tea maga wanogoe eu pei tea tika maga: eu manumatavusa; nalakena eu da atae napua ki Yehovah mau, kite navasap̃otaeana ki Sup̃e adeada mau:

⁵Aga wo dum̃agu pa punusi naatam̃oli vakilagi maga, go aga wo pasa paki da; nalakena nara eu atae napua ki Yehovah, go navasap̃otaeana ki Sup̃e adeada. Ma nara ma eu mamau puti paka sikai mari kotovi nakau ni nanoa, po pua kotovi natali solisoki maga.

⁶Nalakena tea wanogoe laion sikai ega wo m̃elu namalasi umai, po mari punue ra, wulf sikai ni masop̃alo ega wo mari puoli ki da, leopard sikai ega wo pavaigoro dip̃a natokoana adeada maga, sara naata waina eu pe m̃elu dua ki da pano, eu pe wo pei tea kati‐p̃oraworaeana: nalakena natapiriana adeada maga eu laapa, go narowo‐kitakuana adeada maga eu disu po p̃arua.

⁷Ekasana aga wo manigo midoakikorokoro? Natum̃a maga eu doropusi au, po pivisa pae tea maga waina eu da pei sup̃e maga mau: a pagani ra go eu puka, ma eu maripele po dum̃ada saisai ki da pei taua maga paki nasum̃a maga ki nagoroi masausara maga.

⁸Eu kasua dapala horse anoai maga waina eu pei tea vaganiana eu puka: eu sikasikai piragisu paki nagoroi ki tea ni m̃aladigi ki da.

⁹Aga wo da mari ra navaratiana nalo ni naleo maga wanogoe mau, kite? Yehovah e noa e: go naatagu ega wo da dum̃ana mari nasikoana paki nalauna dapala nogoe sikai mau, kite?

¹⁰Kuga sake pano duaduru roara ni vaine aneana po mari puoli ki da; ma kuga ta mari puoli ki puti ra mau: kuga wasi lua arana maga: nalakena eu da pei tea ki Yehovah mau.

¹¹Nalakena nasum̃a ni Israel go nasum̃a ni Yudah eu mari malauweluki p̃arua liu dip̃a au, Yehovah e noa e.

¹²Eu pasa nasorosoroana nalo ni Yehovah, eu naga, E da pei nae mau; go nasaana ega wo da pa parati ki gida mau; go tuga wo da punusi lova kite navitoloana mau:

¹³Go profeta maga eu pei nalagi m̃oli, go navasaana e da doko ara mau: ega wo pei tea mariana paki da ega tapala nogoe.

¹⁴Nalakena tea wanogoe Yehovah Sup̃e ki taua maga e noa dapala nea, e naga, Nalakena ku noa navasaana wanogoe, p̃a leo, aga wo mari navasaana aginau maga euga wo pei nakapu sikai nawokam̃a, go narei waia euga wo pei nakau, go nakapu wanogoe ega wo gani dinomi ra.

¹⁵P̃a leo, aga wo mari nalauna sikai ega wo pae uvea umai dip̃a mu, nasum̃a ni Israel O, Yehovah e noa e: e pei nalauna vatoko sikai, e pei nalauna tuai sikai, nalauna sikai waina masileo adeada nigo ku da atae a mau, go ku da midoaki atae tea waina eu noa e mau.

¹⁶Nawokada e pei matigo wolagatiana sikai, eu mamau puti pei m̃aau maga.

¹⁷Go euga wo gani dinomi tea lolovaekiana anigo, go navinaga anigo; euga wo gani dinomi natum̃a naanoai maga go natum̃a nagoroi maga; euga wo gani dinomi navata maga ni shiip anigo go navata maga ni katel anigo; euga wo gani dinomi vaine anigo maga go napuliva anigo maga; go natokoana p̃aakagoroana anigo maga, waina ku pavatu ara, euga wo mari puoli ki da ki nawoka ni lova.

¹⁸Ma aga wo da mari puoli ki puti mu naaleatia maga wanogoe mau, Yehovah e noa e.

¹⁹Go ega wo pakilina, ragi waina euga wo pusuusu, po naga, Ekasana Yehovah Sup̃e anigida e mari naleo maga mamau puti wanogoe eu pakilina ki gida? P̃a wo noa ki da, p̃a naga, Dapala waina ku doropusi au, po magi sup̃e p̃ota maga suasua doko navanua animu, dapala nogoe kuga wo magi tea ni nalauna p̃ota maga suasua doko navanua sikai waina e da pei tea animu mau.

²⁰Kuga noasai tea waia nasum̃a ni Yakob, po dogorogo ki nia Yudah,

²¹kuga naga, Kuga rogo tea waia, narei manumatavusa O, waina ku dika ki namidoakiataeana; waina ku pilake namatamu maga, ma ku da leoatae mau; waina ku pilake nadaligamu maga, ma ku da dogoatae mau:

²²Ku da matau kinau mau, kite? Yehovah e noa e: Kuga wo da duruuru naraegu mau, kinau waina a lawo ki naworaone e kokoigoro natasi, pae natawonakiana sikai waina ega tu du po du mau du, naga e da mariatae liu sa pano mau? Go natavara kakana maga eu pe malaga, ma eu pe ta mariatae marimatua mau; eu pe tarere pano, ma eu pe ta mariatae liu sa pano mau.

²³Ma narei waia eu pei p̃op̃o kasua go p̃auluulu; eu dawasi po m̃elu pano.

²⁴Go eu da noa doko nap̃op̃oda mau naga, Tuga matau ki Yehovah Sup̃e anigida, waina e do pitua ki usa ragi kakana, usa vea go usa edaku; waina e do manigida pavaigoro wiik tatutakiana maga ni nalolovaeana.

²⁵Namarinaleotageleana animu maga eu mari naleo maga wanogoe eu pa dua ki mu pano, go namarinaleosaana animu maga eu mauti mu pa dua ki naleo wia maga.

²⁶Nalakena naatam̃oli sigisigileo maga eu pei tea vap̃aiana doko m̃aleoputo ni narei aginau: eu do palako dapala tea valako ki manu maga waina eu do kusugoro doko; eu lawo ki vaivai sikai, eu puasoki naatam̃oli maga.

²⁷Dapala nala waina e pura ki manu maga, dapala nogoe nasum̃a adeada maga eu pura ki namarisoreana: nalakena tea wanogoe eu po pakilagi, po disu ki nasogolapaana.

²⁸Go eu po m̃anopunopu, eu giregire: namariana maga ni nasigisigileoana adeada eu mari sa nopu mau: eu da pululu navululuana ki namalepu maga mau, ma eu disu p̃ia; go eu da mari navasap̃otaeana ki tea tika maga mau.

²⁹Aga wo da mari ra navaratiana nalo ni naleo maga wanogoe mau, kite? Yehovah e noa e: go naatagu ega wo da dum̃ana mari nasikoana paki nalauna dapala nogoe sikai mau, kite?

³⁰Tea ni namatakuana go ni nasaram̃akotoana e po pakilina navanua:

³¹Profeta maga eu do peanoasai nasorosoroana, go tea viri maga eu do dum̃ada karulua paki nam̃elearuda maga; go narei aginau eu masau p̃arua naga ega tapala nogoe doko: go kuga wo mari nasava ragi ni namatap̃ago edaku?