Read Nguna Togoa Etafe North YEREMIAH 50 Bible Online

YEREMIAH 50 - Nguna Togoa Etafe North bible

YEREMIAH 50

¹Navasaana waina Yehovah e pasa asa pae nawoka ni profeta Yeremiah nalo ni Babelon, nalo ni navanua ki naka ni Kaldea, e naga.

²Kuga noasai a usuraki nalauna maga po dogorogo ki nia, kuga sike lawo ki manututu sikai; kuga rogorogo ki nia, po da dasuru ki nia mau: kuga naga, Babelon e pei tea viragi‐lua‐pavakotoana, Bel e pei tea toropusiana paki namaliereana, Merodak e saram̃akoto; nasup̃e kakana maga eu pei tea toropusiana paki namaliereana, idolo kakana maga eu pei tea rakaiana.

³Nalakena nalauna sikai e pae north sake umai dip̃a e, waina ega wo mari navanua aneana ega vei maso maladi sikai, naatam̃oli ega wo dika asa: eu sava pano, eu puoli, naatam̃oli go nalo tuavati.

⁴Doko naaleatia maga wanogoe, go doko ragi wanogoe, Yehovah e noa e, Israel natuna maga euga wo umai, nara ma Yudah natuna maga euga mamau; euga wo umai, euga wo umai, euga wo kai, go euga wo laaga Yehovah Sup̃e adeada.

⁵Euga wo pusuusu nalo ni napua paki Sion, namatada maga euga wo leo paki nia, euga wo naga, Kuga umai, go tuga tum̃agida puluti Yehovah ki navasasokiana sikai waina ega tu du po du mau du, waina ega wo da pei tea maliokiana mau.

⁶Narei aginau eu pei shiip waina eu puoli: tea leo parati ki adeada maga eu piragi sasap̃o ki da, eu kakaro lua ra pano doko tava maga: eu pae tava warua paki tava sula, eu do pano, eu malio ki loga adeada.

⁷Tea mamau puti waina eu pap̃ai ra, eu gani dinomi ra: go tea kokona ki da maga eu naga, Kinami au da pei tap̃aro maga mau, nalakena nara eu mari naleo sa dip̃a Yehovah, dip̃a tokora tokoana ni naleanaana, Yehovah nogo, naleogoroana ki tamada maga.

⁸Kuga m̃elu dua ki m̃aleoputo ni Babelon po sava pano, go kuga tave m̃elu dua ki navanua ki naka ni Kaldea po pano, go kuga toko dapala naninani anoai maga kivea ki navata maga.

⁹Nalakena p̃a leo, aga wo surupugoni taua sikai ni nalauna warua maga m̃elu navanua ni north, po mari ra euga sake umai po mari dip̃a Babelon: go euga wo dum̃ada dutua ki da dip̃a e; go nae ega wo pei tea viragi‐lua‐pavakotoana m̃elu dua ki tokora wanogoe pano: nalua adeada maga euga wo dakiusi naatam̃oli marimatua atae p̃otae sikai; te seara euga wo da m̃alam̃ala aru liliu mau.

¹⁰Go Kaldea ega wo pei tea vuti‐lua‐pavakotoana sikai: tea maga waina eu puti lua pavakoto ki nia, euga wo puka asa, Yehovah e noa e.

¹¹Nalakena ku samasama, nalakena ku laelaea, nimu waina ku puti lua pavakoto ki tea veanipiolikiana aginau O, nalakena ku mari p̃aragoto dakiusi kau natuna goroi sikai doko nam̃enau, po kai dakiusi horse anoai kasua maga;

¹²Nalakena tea wanogoe p̃ilamu ega wo maliere p̃arua; nae waina e dape ko ega wo pinovinoi: kuga leo, nae waina e pei tea edaku maau ni nalauna maga, ega wo pei masop̃alo sikai, navanua garagara sikai, maso maladi sikai.

¹³Nalakena namaritausuana ki Yehovah, naatam̃oli ega wo dika asa, ega wo pei maso maladi doko: sara naata waina euga wo surata liu Babelon, euga wo saram̃akoto asa, po mari saudoa ki nia nalo ni namarisakiana kakana maga mamau puti.

¹⁴Kuga tum̃amu dutua ki mu dip̃a Babelon daliviri, nimu mamau puti waina ku pua p̃elua ki naasu; kuga tipe a, kuga ta mauti te nalua seara mau: nalakena e mari naleo sa dip̃a Yehovah.

¹⁵Kuga sike nararasaana sikai dip̃a e daliviri; e dum̃ana pitua ki nam̃elearuna; nakoro ni p̃aaka kakana maga eu pevera, p̃aaka kakana maga eu pei tea nadikiana pakitano: nalakena e pei nasikoana ki Yehovah; kuga kokonagoro e; dapala waina nae e dum̃ana mari a paki tea p̃ota maga, nimu ma kuga mari ega tapala nogoe paki nia.

¹⁶Kuga taelua tea sapuraki, go tea waina e puati tea tagaukotovi ragi ni nalolovaeana, m̃elu dua ki Babelon: nalakena lova ki tea riesoki, euga wo maradoa sara naata sikasikai paki narei adeada, go euga wo sava sara naata sikasikai paki navanua adeada.

¹⁷Israel e pei navata sikai ni shiip waina eu pei taperavera; laion maga eu kopasi lua ra pano: sala vea nawota ni Assiria e dinomi a; go sala edaku Nebukadnessar nawota ni Babelon wanogoe e mari kotokotovi navatuna maga.

¹⁸Nalakena tea wanogoe Yehovah ki taua maga, Sup̃e ki Israel e noa dapala nea, e naga, P̃a leo, kinau aga wo parati nawota ni Babelon go navanua aneana, dapala waina a pea parati nawota ni Assiria.

¹⁹Go aga wo moro piragi liliua ki Israel umai paki napega aneana, go ega wo ganikani doko Karmel go Bashan, go naatana ega wo maro tava maga ni Efraim go ni Cilead.

²⁰Doko naaleatia maga wanogoe, go doko ragi wanogoe, Yehovah e noa e, euga wo laaga namarinaleotageleana Israel, go ega wo dika asa; go euga wo laaga namarinaleosaana maga Yudah, go euga wo da pei tea vap̃aiana asa mau: nalakena aga wo midoakikorokoro tea maga waina a doropusi ra eu pei namagovai doko.

²¹P̃a sake pano dip̃a navanua ni Merataim, po marimari dip̃a e, go dip̃a naatatoko maga ni Pekod: p̃a mari punuvunue po mari puoli ki da, Yehovah e noa e, go p̃a mari ega vataka ni tea mamau puti waina a dip̃aki‐go asa.

²²Nasaruruana ni navakalo go ni namarisakiana warua, e pei tea rogoana navanua.

²³Tea tutuki maramana mamau e pei tea taekotoviana go e makoto! Babelon e po pei maso maladi sikai m̃aleoputo ni nalauna maga!

²⁴Kinau a lawo ki vaivai sikai raki‐go, go nigo ku pei tea vuasokiana asa, Babelon O, go ku da atae a mau: ku pei tea vap̃aiana, go ku pei tea vuasokiana, nalakena ku mari p̃auluulu dip̃a Yehovah.

²⁵Yehovah e p̃olagati nasum̃a ni nalikau aneana maga, go e piragi lua m̃elu dua ki nia nalikau maga ni namaritausuana aneana: nalakena Yehovah, Yehovah ki taua maga, e peani nawosiana sikai waina ega mari a navanua ki naka ni Kaldea.

²⁶P̃a vae kokoi ni uvea mau umai po mari dip̃a e, p̃a wolagati m̃agoreaga kakana maga: p̃a mari a ega makaka, po mari puoli ki nia: te seara kakana ega ta pei tea toropusiana doko mau.

²⁷P̃a mari punue kau natuna anoai aneana maga mamau puti; euga siwo pano paki namaripunueana: ai ki da! Nalakena naaleatia adeada e po do umai, ragi ni navarati‐ra‐ana.

²⁸Kuga rogo nadaleo ni tea maga waina eu sava pano, po m̃elu dua ki navanua ni Babelon naga euga rogorogo ki nasikoana ki Yehovah Sup̃e anigida Sion, nasikoana nalo ni nasum̃a tapu aneana,

²⁹eu naga, Kuga soso saisai ki tea maga waina eu puati naasu maga naga euga mari dip̃a Babelon: nimu mamau puti waina ku pua p̃elua ki naasu, kuga m̃enaki dalivirigoro e; te seara kakana euga ta sava pano mau: kuga lagati dua e ega vataka ni nawosiana aneana; pataka ni tea mamau puti waina nae e mari a, kuga moro mari ega tapala nogoe paki nia; nalakena e mari lagilagi dip̃a Yehovah, dip̃a Tea Tapu ki Israel.

³⁰Nalakena tea wanogoe natureai kakana maga euga wo dowo napua maga ni natokoana kakana, go naatam̃oli kakana maga mamau puti ni navakalo euga wo pei tea maripuolikiana naaleatia wanogoe, Yehovah e noa e.

³¹P̃a leo, aga wo mari dip̃a ko, nigo tea leomadaga O, Nawota, Yehovah ki taua maga e noa e: nalakena naaleatia anigo e po umai, naaleatia waina aga wo parati ko asa.

³²Go tea leomadaga ega wo dapilagona po dowo, go tea waina ega sike a ega moro duleana, ega wo dika: go aga wo dokoni nakapu sikai natokoana kakana maga, go ega wo gani dinomi tea mamau puti waina eu doko dalivirigoro e.

³³Yehovah ki taua maga e noa dapala nea, e naga, Israel natuna maga go Yudah natuna maga eu mamau puti pei tea riesokiana: tea maga mamau puti waina eu piragi lua pavakoto ki da, eu puasoki kasua ki da; eu karai suasua ki da naga euga vano.

³⁴Tea Taulua ra e kasua; Yehovah ki taua maga e pei nagisana: nae ega wo madeada pululu navululuana adeada, naga ega vitua ki natam̃ateana paki maramana, po mari naatatoko maga ni Babelon euga rogokitesa.

³⁵Lova sikai e doko naka ni Kaldea, Yehovah e noa e, go e doko naatatoko maga ni Babelon, go e doko tea maraki kakana maga, go naatam̃oli manumatua kakana maga.

³⁶Lova sikai e doko tea kikita maga, go euga wo mari manumatavusa: lova sikai e doko naatam̃oli marimatua kakana maga, go euga wo puoli.

³⁷Lova sikai e doko horse kakada maga, go e doko kariot kakada maga, go e doko taua warua ni naatam̃oli maga waina eu doko m̃aleoputo kakana, go euga wo dakiusi nagoroi maga: lova sikai e doko naleo wia masauniana kakana maga, go euga wo pei tea tape‐pavakotoana.

³⁸Lova sikai e doko noai kakana maga, go euga wo garagara po dap̃a: nalakena e pei navanua sikai ni nasup̃e taeana maga, go eu doropa nalo ni idolo maga.

³⁹Nalakena tea wanogoe nalo mila maga ni namalasi go koria mila maga euga wo doko Babelon doko, go ostris maga euga wo doko asa; go naatam̃oli ega wo dika asa pa pa po du mau du: naatam̃oli natuna ega wo da moro m̃enaki atatoko asa mau pae tagona paki tagona.

⁴⁰Dapala waina Sup̃e e dap̃olosiwo ki Sodom go Comorrah, go natoko ana maga ni m̃aladigi kakada, Yehovah e noa e; dapala nogoe naatam̃oli ega wo dika asa, go naatam̃oli natuna ega wo da m̃enaki atatoko asa mau.

⁴¹P̃a leo, narei sikai eu pae north umai; go nalauna warua sikai go nawota laapa euga wo pei tea surupugoniana m̃elu namatap̃ago maga ni maramana.

⁴²Euga wo puati naasu go naio; eu pei tea dodotika maga, go euga wo da maritadodomi mau; nadaleoda e do p̃agaaga dakiusi natasi, go euga wo sakesaake horse maga umai; dakiusi naatam̃oli sikai paki navakalo, euga wo pei tea tutuakiana dip̃a ko, sara naata sikasikai, Babelon natuna nagoroi O.

⁴³Nawota ni Babelon e dogo narogoana nalo kakada, go nam̃elearuna maga ero po manainai: narogokitesaana e puasoki a, go navitivitinuana dakiusi nagoroi sikai waina e dogo navitinuana ni navisolaana.

⁴⁴P̃a leo, dakiusi laion sikai waina e sake m̃elu namalasi ni Yordan umai dip̃a loga kasua ni shiip, aga wo mari ra euga wo m̃araverave sava dua ki nia; go aga wo lawo ki tea sikai waina aga wo matadoa e, naga ega vei nap̃auna: nalakena sei e dakiusi au? Go sei ega wo maginau datuta ki ragi tatutakiana sikai? Go tea leoparatiki sei waina ega wo lawodugoro au?

⁴⁵Nalakena tea wanogoe kuga rogo namidoakip̃otaeana ki Yehovah, waina e midoaki p̃otae a dip̃a Babelon; go namidoakisokiana aneana maga, waina e midoakisoki ra dip̃a navanua ki naka ni Kaldea: tea kirikiri maga ni navata adeada euga wo pei tea rosagi‐lua‐ana pano; tea ni loga adeada euga wo saram̃akoto nalo ni tea waina e pakilina ki da.

⁴⁶Maramana e m̃anaunau nasaruruana ni natapepavakotoana ni Babelon, go nakuapiosoana kakana e pei tea rogoana usuraki nalauna maga.