Read Nguna Togoa Etafe North YEREMIAH 51 Bible Online

YEREMIAH 51 - Nguna Togoa Etafe North bible

YEREMIAH 51

¹Yehovah e noa dapala nea, e naga, Kuga leo, aga wo pulevule nalagi marisasaki sikai ega mari dip̃a Babelon, go dip̃a naatatoko maga ni Kaldea.

²Go aga wo dip̃aki lua tea silake maga, waina euga wo nive a; go euga wo mari navanua aneana ega wo p̃alo: ai ki nia daliviri naaleatia ni nasaana wanogoe.

³Tea tape naasu ega vua p̃elua ki naasu aneana, go tea waina e suni sugoro ni vatu ega tuleana: kuga ta mari malemale paki natureai kakana maga mau; kuga mari puoli ki taua kakana maga mamau puti.

⁴Go dapala nogoe tea atugiana maga euga wo dowo navanua ki naka ni Kaldea, go tea maga waina eu puri sasama ara napua maga ni natokoana.

⁵Nalakena Sup̃e ki Israel go ki Yudah, Yehovah ki taua maga, e da doropusi ra mau; ma navanua ki naka ni Kaldea e pura ki natap̃aroana dip̃a Tea Tapu ki Israel.

⁶Kuga m̃elu dua ki m̃aleoputo ni Babelon po sava pano, po dum̃amu mauti namauriana animu, sara naata sikasikai kakamu; kuga ta pei tea taeluaana namarinaleotageleana kakana mau: nalakena e pei ragi ni nasikoana ki Yehovah; nae ega wo lagati dua e navitua‐dip̃aana sikai.

⁷Babelon e pei lasa munu sikai ni kold doko nam̃elearu ni Yehovah, go e mari maramana mamau e matamaloku asa: nalauna maga eu munu waine kakana; nalakena tea wanogoe nalauna maga eu doropa.

⁸Babelon e dowo m̃araverave; go e mawora: kuga lalagaarova asa; kuga maneana dape naroro lolo pano raki navitivitinuana aneana, mase e pe mariatae pei tea maripauriana asa.

⁹Tu masauna naga tuga mari pauri Babelon, ma e mari sap̃o pei tea maripauriana: tuga toropusi a, go tuga vano sara naata sikasikai paki navanua anigida: nalakena navasap̃otaeana aneana e pei tea tauakiana pa pa paki nakoroatelagi, go e pei tea tapeana sake pa pa paki elagi mau.

¹⁰Yehovah e mari namarinaleoleanaana anigida e dave umai: kuga umai, go tuga noasai nawosiana ki Yehovah Sup̃e anigida Sion.

¹¹Kuga vakali nalua maga; kuga vakavuro nala kakada maga: Yehovah e pulevule naata ni nawota maga ki naka ni Media; nalakena namidoakisokiana aneana e dip̃a Babelon, naga ega mari puoli ki nia: nalakena e pei nasikoana ki Yehovah, e do kokonagoro nasum̃a tapu aneana.

¹²Kuga sike lawo ki manututu sikai dip̃a p̃aaka maga ni Babelon, kuga mari tea leleogoro maga euga kasua, kuga lawo ki tea leleogoro maga naliada, kuga mari m̃ata ki tea kusugoro maga: nalakena Yehovah e midoaki soki po mari pataka ni tea waina e noa e nalo ni naatatoko maga ni Babelon.

¹³Nigo waina ku sakesaake doko noai laapa O, tea sogolapa ki naleo wia masauniana maga, naaleatia edaku maau anigo e po umai, nalolo ni namauriana anigo e pei tea marikotoviana.

¹⁴Yehovah ki taua maga e dum̃ana pivisa pae nagisana, po naga, Kinau aga wo mari ko p̃a wo pura ki naatam̃oli maga, euga wo laapa dapala uraasi maga; go euga wo sike nararasaana sikai dip̃a ko.

¹⁵Nae e mari maramana doko namarimatuaana aneana, nae e lawoki‐laketoko asa doko namanumatuaana aneana, go doko namidoakiatae‐ana aneana e sai ki nakoroatelagi maga:

¹⁶Ragi waina e do lua ki nadaleona, nasaruruana ni noai maga e doko nakoroatelagi maga, go e do mari namavu maga eu sake pae namatap̃ago maga ni maramana; e do magi usa mari navila maga, go e do piragi nalagi e dave m̃elu dua ki nasum̃a aneana maga ni naleo tauakiana maga.

¹⁷Sara naatam̃oli eu pei lala puti, eu dika naataeana; sara naatam̃oli mataisau ni kold eu pei tea toropusiana paki namaliereana nalakena nasup̃e taeana adeada maga: nalakena nasup̃e takiana adeada maga eu mamau puti pei nasorosoroana, go te namero e da doko ara mau.

¹⁸Eu pei tea p̃alo, nawosiana sikai ni namidoakisap̃oana: doko ragi ni namaridogo‐ra‐ana, euga wo pano puoli.

¹⁹Tea veanip̃otaeana ki Yakob e da dakiusi tea maga wanogoe mau; nalakena nae e pei tea tawonaki sara naleo mamau puti; go Israel e pei naworawora ni tea veanipioli‐kiana aneana: Yehovah ki taua maga e pei nagisana.

²⁰Nigo ku pei tagoto ni navakalo aginau go nalikau aginau maga: go p̃a wo maginau p̃oka p̃oraworae nalauna maga; go p̃a wo maginau mari puoli ki namarakiana maga;

²¹Go p̃a wo maginau p̃oka p̃oraworae horse go naata waina e sakesaake asa; go p̃a wo maginau p̃oka p̃oraworae kariot go naata waina e sakesaake asa;

²²Go p̃a wo maginau p̃oka p̃oraworae naatam̃oli, naanoai go nagoroi; go p̃a wo maginau p̃oka p̃oraworae namariki go naatam̃oli kasua; go p̃a wo maginau p̃oka p̃oraworae natureai go naatara;

²³Go p̃a wo maginau p̃oka p̃oraworae tea leoparatiki go navata aneana; go p̃a wo maginau p̃oka p̃oraworae tea sisi natano, go oks aneana maga; go p̃a wo maginau p̃oka p̃oraworae tea maramara maga go tasiga maga.

²⁴Go aga wo lagati dua Babelon go naatatoko maga mamau puti ni Kaldea namariana sa adeada mamau puti waina eu mari a Sion doko namatam̃a, Yehovah e noa e.

²⁵P̃a leo, kinau a mari dip̃a ko, tava marisasaki O, waina ku do mari sa sa ki maramana mamau, Yehovah e noa e: go aga wo sai ki nam̃elearugu dip̃a ko, po malulua ki‐go m̃elu dua ki vatutoko maga pakitano, go aga wo mari ko p̃a vei tava sikai waina nakapu e gani a.

²⁶Go euga wo da dape te vatu sikai kiam̃a naga ega vei tea ni naweluki mau, kite te vatu sikai naga ega vei tea ni laketano maga mau; ma p̃a wo pei maso maladi doko pa pa po du mau du, Yehovah e noa e.

²⁷Kuga sike lawo ki manututu sikai maramana, kuga sui paiga usuraki nalauna maga, kuga mari m̃ata ki nalauna maga dip̃a e, kuga soso saisai ki namarakiana maga ni Ararat dip̃a e, go ni Minni, go ni Ashkenas: kuga vasa dawona ki tea maraki sikai dip̃a e; kuga mari horse maga euga sake umai dakiusi taua maga ni midiri.

²⁸Kuga mari m̃ata ki nalauna maga naga euga mari navakalo dip̃a e, nawota maga ki naka ni Media, tea maraki kakada maga, go tasiga kakada maga mamau puti, go navanua maga mamau puti waina eu doko etano ki naveinawotaana adeada.

²⁹Go maramana ega wo duruuru, po pitivitinu: nalakena namidoaki‐p̃otae‐ana maga ki Yehovah euga wo pei tea vakavuroana dip̃a Babelon, naga euga mari navanua ni Babelon ega vei maso maladi sikai, naatam̃oli ega tika asa.

³⁰Naatam̃oli marimatua maga ni Babelon eu makoto ki namarimariana, eu doko tokora kasua p̃aakagoroana adeada maga doko; nakasuaana adeada e pano puoli; eu pei nagoroi maga: tokora tokoana kakana maga eu do soro; tea walagoto kakana maga eu pei tea marikotoviana.

³¹Tea tape navasaana sikai e do sava dausi tea tape navasaana sikai, go tea tautauana sikai e do sava dausi tea tautauana sikai, naga euga noakisai nawota ni Babelon naga natokoana aneana e pei tea marimatuakiana daliviri:

³²Tokora waina eu duagoto noaisara maga asa, eu pei tea tape pavakotoana, nap̃araerae maga eu pei tea tap̃arakiana ki nakapu, go naatam̃oli maga ni navakalo eu m̃anaunau.

³³Nalakena Yehovah ki taua maga, Sup̃e ki Israel, e noa dapala nea, e naga, Babelon natuna nagoroi e dakiusi malo wokalesue sikai doko ragi kakana waina eu do p̃oka lesue asa; ragi kiki e ko puoli, go aura waina ega vei tea tagaukotoviana asa, ega wo umai.

³⁴Nebukadnessar nawota ni Babelon e dinomi au, e mari p̃oroworosi au, e mari au a pei lasa munu sikai waina e p̃alo, e dinomi au dapala drakon sikai, e dum̃ana mari nap̃elena e puka ki tea wialua aginau maga; go e nadi kinau pano.

³⁵Namaripavakotoana waina eu mari a paki nau go paki namatarau aginau, ega wo doko Babelon, naatatoko ni Sion e noa e; go nadagu ega wo doko naatatoko maga ni Kaldea, Yerusalem e noa e.

³⁶Nalakena tea wanogoe Yehovah e noa dapala nea, e naga, P̃a leo, aga wo pululu navululuana anigo, po manigo mari nasikoana; go aga wo mari natasi kakana ega wo garagara, po mari namata noai kakana ega wo dap̃a.

³⁷Go Babelon ega wo pei taua ni tea makaka maga, ega wo pei tokora sikai waina koria mila maga euga toko asa, ega wo pei tea ni nasaram̃akotoana sikai, go tea ni namarisaudoakiana sikai, naatam̃oli ega tika asa.

³⁸Eu do uru dakiusi laion tureai maga; eu do uru dakiusi laion natuna maga.

³⁹Ragi ni navitinuana adeada, aga wo madeada mari nakaniana, go aga wo mari ra euga matamaloku, naga euga laelaea, po maturu namaturuana waina e doko mau doko, po da moro darapa mau, Yehovah e noa e.

⁴⁰Aga wo piragi ra euga siwo paki namaripunueana pano, dakiusi shiip natuna maga, go dakiusi shiip anoai maga go naninani anoai maga.

⁴¹Ai ki Sheshak, nalakena e dowo! Nasamasamaana ni maramana mamau e pei tea dododaoana! Babelon e po pei maso maladi sikai m̃aleoputo ni nalauna maga!

⁴²Natasi e puka sake po donigoro Babelon ki napeao kakana maga.

⁴³Natokoana kakana maga eu po pei maso maladi sikai, navanua garagara sikai, go masop̃alo sikai, navanua sikai waina naatam̃oli e dika asa, go waina naatam̃oli natuna e da surata asa mau.

⁴⁴Go aga wo mari navasap̃otaeana paki Bel waina e doko Babelon, go aga wo mari a ega lua ki tea waina e dinomi a, go nalauna maga euga wo da moro sara‐daua‐ki asa mau: io, p̃aaka ni Babelon e dowo.

⁴⁵Narei aginau O, kuga tave m̃elu m̃aleoputo kakana po pano, go kuga tum̃amu mauti mu sara naata kakamu pa dua ki namaetoana vivitinu ki Yehovah.

⁴⁶Go nap̃op̃omu ega ta manainai mau, go kuga ta mataku nalo ni navasa‐lagati‐ana waina ega vei tea rogoana navanua mau; nalakena navasa‐lagati‐ana sikai ega wo pakilina natau sikai, go edaku ki tea wanogoe navasa‐lagatiana sikai ega wo moro pakilina natau p̃ota sikai, go namaripavakotoana ega wo doko navanua, tea maramara ega wo mari dip̃a tea maramara.

⁴⁷Nalakena tea wanogoe, kuga leo, naaleatia maga euga wo umai, go aga wo mari navasap̃otaeana paki nasup̃e taeana maga ni Babelon, go navanua mamau kakana ega wo pei tea toropusiana paki namaliereana, go tea maripunueana kakana maga mamau puti euga wo dowo m̃aleoputo kakana.

⁴⁸Ragi wanogoe nakoroatelagi maga go maramana, go tea mamau puti waina eu doko ara doko, euga wo kola‐laelaea nalo ni Babelon; nalakena tea mari pavakoto maga euga wo pae north umai po mari dip̃a e, Yehovah e noa e.

⁴⁹Dapala waina naatam̃oli laapa eu pei tea atugiana eu dowo usuraki maramana mamau nalakena Babelon, dapala nogoe Babelon nae ma ega wo dowo nalakena naka ni Israel waina eu pei tea atugiana eu dowo.

⁵⁰Nimu waina ku sava m̃elu dua ki lova, kuga vano, kuga ta du dorogo mau! Kuga midoaki Yehovah navanua ni uvea, go Yerusalem ega wo umai paki namidodoana animu.

⁵¹Au pei tea toropusiana paki namaliereana, nalakena eu dogo navasapinoaana; nadododaoana ni naraegami e dap̃augoro gami: nalakena tea ni nalauna p̃ota eu paki ekopu ni tokora tapu maga ni nasum̃a ki Yehovah.

⁵²Nalakena tea wanogoe kuga leo, naaleatia maga euga wo umai, Yehovah e noa e, go aga wo mari navasap̃otaeana paki nasup̃e taeana kakana maga; go tea atugiana maga euga wo gi usuraki navanua kakana mamau.

⁵³Babelon e pe sake paki nakoroatelagi, go tokora kasua vakilagi kakana e pe vei tea p̃aakagoroana, ma tea tape‐pavakoto maga euga wo darup̃a e pae natip̃akiana aginau, Yehovah e noa e.

⁵⁴Kuga rogo nadaleo ni nakuapiosoana waina e m̃elu Babelon, go nasaruruana ni namarisakiana warua waina e m̃elu navanua ki naka ni Kaldea!

⁵⁵Nalakena Yehovah e mari sa sa ki Babelon, go e mari puoli ki nadaleo warua m̃elu dua ki nia pano: napeao kakana maga eu p̃agaana dakiusi noai warua maga, nasaruruana ni nadaleoda e pei tea sikeana;

⁵⁶Nalakena tea mari pavakoto e po paraki nia, Babelon nogo, go m̃aau kakana maga eu pei tea tape‐pavakotoana, naasu adeada maga eu pei tea marikotokotoviana; nalakena Yehovah Sup̃e ni navitua‐dip̃aana maga, ega wo lagati pitua lomau.

⁵⁷Go aga wo mari tea maraki kakana maga go naatam̃oli manumatua kakana maga euga wo matamaloku, nara ma tea maramara kakana maga, go tasiga kakana maga, go naatam̃oli marimatua maga ni navakalo kakana maga; euga wo maturu namaturuana waina e doko mau doko, po da darapa mau. Nawota waina nagisana e pei Yehovah ki taua maga, e noa e.

⁵⁸Yehovah ki taua maga e noa dapala nea, e naga, P̃aaka welewelea ni Babelon ega wo pei tea tap̃olosiwokiana, go namata‐pua varau pakilagi kakana maga euga wo pei tea tap̃arakiana ki nakapu; dapala nogoe nawosi‐mawosaana ki narei maga ega wo pei tea m̃oli, nawosiwosiana ki nalauna maga ega wo pei tea tap̃arakiana ki nakapu.

⁵⁹Navasaana waina profeta Yeremiah e dip̃aki Seraiah natu ni Neriah, natu ni Maaseiah asa, ragi waina e paki Babelon pano sikoti Sedekiah nawota ni Yudah doko natau kevati ni namaramaraana aneana, go Seraiah wanogoe e pei tasiga sikai.

⁶⁰Go Yeremiah e midiri doko tusi sikai nasaana mamau puti waina e naga euga wo pakilina ki Babelon, navasaana maga mamau puti wanogoe waina eu pei tea midiriana nalo ni Babelon.

⁶¹Go Yeremiah e noa ki Seraiah, e naga, Ragi waina p̃a vaki Babelon, p̃a vavaigoro po peve navasaana maga mamau puti waia, P̃a naga,

⁶²Yehovah O, ku noa sua nalo ni tokora waia naga p̃a wo daelua e, dapala waina te seara euga wo da mauri doko asa doko mau, naatam̃oli kite nalo tuavati, go naga ega wo pei maso maladi doko pa pa ega tu mau du.

⁶³Go ega wo doko, ragi waina p̃a wo peve tusi waia pa pa ega nopu, go p̃a likoti vatu sikai asa, po nadi ki nia paki m̃aleoputo ni Eufrates:

⁶⁴Go p̃a naga, Ega tapala nogoe Babelon ega wo diro, go ega wo da moro duleana mau nalakena nasaana waina kinau aga wo piragi a umai paki nia. Navasaana maga ki Yeremiah e nopu nea.