Read Nguna Togoa Etafe North YEREMIAH 52 Bible Online

YEREMIAH 52 - Nguna Togoa Etafe North bible

YEREMIAH 52

¹Sedekiah e pei tea ni natau rualima dua tamate sikai ragi waina e pae asa maramara; go e maramara Yerusalem natau rualima sikai tamate sikai: go p̃ilana nagisana Hamutal, e pei Yeremiah ni Libnah natuna nagoroi.

²Go e mari tea waina e sa namata ni Yehovah, pataka sikai ma tea mamau puti waina Yehoiakim e pea mari a.

³Go tea wanogoe e pakilina Yerusalem go Yudah nalakena namaetoana ki Yehovah, pa pa e kopasi lua ra m̃elu dua ki naraena pano: go Sedekiah e mari p̃auluulu dip̃a nawota ni Babelon.

⁴Go e pakilina natau keloveti ni namaramaraana aneana, atelagi kerualima sikai kakana, nakup̃a kerualima ni atelagi wanogoe, naga Nebukadnessar nawota ni Babelon e umai, nara ma taua ni navakalo aneana mamau, po mari dip̃a Yerusalem, po m̃enakigoro e; go eu davagi p̃aaka maga dip̃a e dalivirigoro e.

⁵Go eu kelugoro natokoana wanogoe doko pa pa paki natau kerualima sikai tamate sikai ki nawota Sedekiah.

⁶Go doko atelagi kevati, nakup̃a keloveti ni atelagi wanogoe, navitoloana e p̃arua liu natokoana, go navinaga agi narei ni navanua e dika.

⁷Go malo mawora sikai e pei tea mariana p̃aaka ni natokoana, go naatam̃oli maga ni navakalo mamau puti eu sava pano, eu m̃elu dua ki natokoana pano p̃ogi pae napua ni namata‐pua waina e doko namawota ni p̃aaka dua kakana, waina e doko m̃aladigi ki roara ki nawota; (go naka ni Kaldea eu kelugoro natokoana daliviri;) go eu pae napua ni Arabah po pano.

⁸Ma naatam̃oli maga ni navakalo ki naka ni Kaldea eu sava dausi nawota, po pa parati ki Sedekiah malo matemate maga ni Yeriko; go naatam̃oli maga ni navakalo aneana mamau puti eu pei tea taperaverakiana m̃elu dua ki nia pano.

⁹Go eu pua pavakoto nawota, po piragi lua e pano paki Riblah doko navanua ni Hamath pa punusi nawota ni Babelon; go nae e mari navasap̃otaeana dip̃a e.

¹⁰Go nawota ni Babelon e atugi Sedekiah natuna naanoai maga kivea ki namatana: go e moro atugi tea maraki maga mamau puti ni Yudah doko Riblah.

¹¹Go e asiri lua namata ni Sedekiah; go nawota ni Babelon e solisoki a ki tea moti maga, po piragi lua e pano paki Babelon, po doropusi a paki nasum̃a ni navavaigoroana, go e doko asa doko pa pa paki naaleatia ni namateana aneana.

¹²Go doko atelagi kelima, nakup̃a kerualima ni atelagi wanogoe, waina e pei natau kerualima sikai tamate loveti ki nawota Nebukadnessar, nawota ni Babelon, Nebusaradan nap̃au ni tea vavaigoro maga, waina eu lawodu nap̃irikia ni nawota ni Babelon, e umai paki Yerusalem:

¹³Go e dap̃ara ki nasum̃a ki Yehovah, go nasum̃a ki nawota; go nasum̃a maga mamau puti ni Yerusalem, go nasum̃a vakilagi maga mamau puti, e dap̃ara ki da ki nakapu.

¹⁴Go naatam̃oli maga mamau puti ni navakalo ki naka ni Kaldea, waina eu sikoti nap̃au ni tea vavaigoro maga, eu mari p̃oraworae p̃aaka maga mamau puti ni Yerusalem daliviri.

¹⁵Go Nebusaradan nap̃au ni tea vavaigoro maga e piragi lua pavakoto tea tika maga ni narei seara kakada, go namagovai ni narei maga waina eu pei tea toropusiana eu doko natokoana doko, go tea maga waina eu dowo pano paki nawota ni Babelon, go tea laapa ni taua warua waina eu pei tea toropusiana doko.

¹⁶Ma Nebusaradan nap̃au ni tea vavaigoro maga e doropusi tea tika maga ni navanua seara kakada eu doko, naga euga vei tea wosiwosi maga roara maga ni vaine, go tea wosiwosi maga ni natano.

¹⁷Go tip̃a maga ni brass waina eu doko ekopu ni nasum̃a ki Yehovah, go laketano maga go lasa takiana warua ni noai waina eu doko ekopu ni nasum̃a ki Yehovah, naka ni Kaldea eu mari p̃oroworosi ra, po dape lua pavakoto brass kakada maga paki Babelon pano.

¹⁸Go pot maga, go savel maga, go siloa ni meru maga, go besin maga, go spun maga, go lasa maga mamau puti ni brass waina eu mari nawosiana ni nasuasuaana asa, tea maga mamau puti wanogoe eu dape lua pavakoto ara pano.

¹⁹Go lasa munu maga, go pan maga ni nakapu vavaga, go besin maga, go pota maga, go nakau ni nasulu maga, go spun maga, go boul maga; sara naleo mamau puti waina eu pei tea mariana ki kold, go sara naleo mamau puti waina eu pei tea mariana ki silver, nap̃au ni tea vavaigoro maga e dape lua pavakoto ara pano.

²⁰Tip̃a dua, lasa warua ni noai waina, go oks takiana rualima sikai tamate dua waina eu doko etano ni laketano maga, waina nawota Solomon e mari ra naga euga toko ekopu ni nasum̃a ki Yehovah: brass ni lasa maga mamau puti wanogoe e mari sap̃o pei tea rowogi‐atae‐ana.

²¹Go nalo ni tip̃a dua wanogoe, navarapakilagiana ni tip̃a maga sikasikai e pei kubit rualima sikai tamate latolu; go namea totowo ni kubit rualima sikai tamate dua e dalivirigoro e; go namatoluana kakana e pei nakini pati: go nap̃alauna e p̃ap̃aga.

²²Go nap̃auna e pei brass; go navaraupakilagiana ni nap̃au ni tip̃a maga sikasikai e pei kubit lima, go tea turuturua, go pomekranet maga e doko nap̃au ni tip̃a daliviri, eu mamau puti pei tea mariana ki brass: go tip̃a kerua e moro pataka sikai.

²³Go pomekranet rualima loveti tamate latesa eu doko nadigi ni tea turuturua; pomekranet maga mamau puti waina eu doko tea turuturua wanogoe daliviri, eu pei p̃onotia sikai.

²⁴Go nap̃au ni tea vavaigoro maga e piragi lua Seraiah tea viri warua liu, go Sefaniah kerua kakana, go tea vavaigoro dolu ni namata:

²⁵Go e piragi lua m̃elu dua ki natokoana atavau sikai waina e pei tea lawokiana dap̃au naatam̃oli maga ni navakalo; go naatam̃oli maga waina eu lawodu nap̃irika ni nawota eu larua kakada waina eu pei tea vap̃aiana natokoana, go tea midiri ki tea maraki taua maga ni navakalo, waina e piragi saisai ki narei ni navanua, go narei ni navanua naatam̃oli rualima latesa kakada waina eu pei tea vap̃aiana doko m̃aleoputo ni natokoana.

²⁶Go Nebusaradan nap̃au ni tea vavaigoro maga e piragi lua pavakoto ara pano paki Riblah pa punusi nawota ni Babelon.

²⁷Go nawota ni Babelon e atugi ra, po doropusi ra paki namateana Riblah, doko navanua ni Hamath. Go dapala nogoe Yudah e pei tea viragi‐lua‐pavakotoana m̃elu dua ki navanua aneana pano.

²⁸Go tea maga waia eu pei naatam̃oli maga waina Nebukadnessar e piragi lua pavakoto ara pano: doko natau kelarua naka ni Yudea naatam̃oli manu dolu go rualima takuna dua tamate dolu:

²⁹Go doko natau kerualima sikai tamate latolu ki Nebukadnessar, e piragi lua pavakoto naatam̃oli p̃onotia latolu rualima takuna dolu tamate dua m̃elu dua ki Yerusalem pano:

³⁰Go doko natau kerualima dua tamate dolu ki Nebukadnessar, Nebusaradan nap̃au ni tea vavaigoro maga e piragi lua pavakoto naka ni Yudea naatam̃oli p̃onotia larua rualima takuna pati tamate lima; naatam̃oli mamau puti wanogoe eu pei manu pati go p̃onotia latesa.

³¹Go e pakilina natau kerualima dolu tamate larua ni naviragi‐luapavakotoana ki Yehoiakin nawota ni Yudah, atelagi kerualima sikai tamate dua kakana, nakup̃a kerualima dua tamate lima ni atelagi wanogoe, naga Evil‐merodak nawota ni Babelon, doko natau vea ni namaramaraana aneana, e moro sike nap̃au ni Yehoiakin nawota ni Yudah, po piragi lua e m̃elu dua ki nasum̃a ni navavaigoroana;

³²Go e pasa matemate paki nia, po dua e malo tasake sikai waina e pakilagi liu malo tasake maga ki nawota maga waina eu mamau doko Babelon doko.

³³Go Yehoiakin e sawo lua sugoro aneana maga waina e suni ra nasum̃a ni navavaigoroana, go e ganikani wede ni nakaniana ki nawota pitip̃atip̃a, sara naaleatia ni namauriana aneana.

³⁴Go nawota ni Babelon e dua e navinaga pitip̃atip̃a, e dua e matele sikasikai sara naaleatia pa pa paki naaleatia ni namateana aneana, sara naaleatia ni namauriana aneana.