Read Nguna Togoa Etafe North YEREMIAH 6 Bible Online

YEREMIAH 6 - Nguna Togoa Etafe North bible

YEREMIAH 6

¹Kuga sava m̃elu dua ki m̃aleoputo ni Yerusalem pano raki namautiana, nimu Benyamin natuna maga O, go kuga sui paiga Tekoa, po sike navaivaiana sikai doko Beth‐hakerem: nalakena nasaana ega wo pakilina m̃elu north, namarisakiana warua liu sikai.

²Tea leom̃atakiana go matemate, Sion natuna nagoroi nogo, aga wo daelua e.

³Tea leoparatiki shiip maga go navata adeada maga euga wo umai punusi a; euga wo sike tap̃aup̃au adeada maga dip̃a e daliviri; euga wo sikasikai ganikani tokora adeada.

⁴Tuga mari m̃ata naga tuga mari navakalo dip̃a e; kuga tuleana, go tuga sake pano po mari dip̃a e aleati matua. Ai ki gida! Nalakena naaleatia e do pano, nalakena melu maga ni ragi melu e do disu parau.

⁵Kuga tuleana, go tuga sake pano po mari dip̃a e p̃ogi, go tuga mari sa ki nasum̃a vakilagi kakana maga.

⁶Nalakena Yehovah ki taua maga e noa dapala nea, e naga, Kuga taekotokotovi nakau kakana maga, po nadi ki natauakiana sikai dip̃a Yerusalem: e pei natokoana wanogoe waina ega wo pei tea varatiana; nariesokiana mamau e doko m̃aleoputo kakana usuraki.

⁷Dapala waina namata noai e do putaputa ki noai kakana maga, dapala nogoe nae e do putaputa ki nasigisigileoana kakana: namaripavakotoana go namarisakiana ero pei tea rogoana nap̃alauna; narogokitesaana go wotu maga eu doko naraegu pitip̃atip̃a.

⁸P̃a vei tea vasakorokoroana, Yerusalem O, mase naatagu e pe vei tea vaku‐dakatiana m̃elu dua ki‐go; mase a pe mari ko ku pe vei maso maladi sikai, navanua sikai waina naatam̃oli e da doko asa doko mau.

⁹Yehovah ki taua maga e noa dapala nea, e naga, Euga wo pivila namagovai waina e pei tea toropusiana doko Israel dapala vaine sikai: nam̃elearum̃a ega liliu dakiusi tea vai nawa ni vaine paki nala maga.

¹⁰Aga wo pasa paki sei po dua e navasakorokoroana, naga euga rogo? P̃a leo, nadaligada e da pei tea tovadaviviana mau, go eu da mariatae daki dorogo mau: p̃a leo, navasaana ki Yehovah e pei navasapinoaana sikai paki da; eu da maro asa mau.

¹¹Nalakena tea wanogoe kinau a pura ki namaritausuana aginau; a mawosa nasokiana aginau: aga wo ligisi a paki piakirikiri maga napua ni natokoana, go paki taua maga ni natureai maga euga mamau: nalakena naatam̃oli sikoti anagoroi eroga wo dua pei tea vuatiana pano, go tea matua sikoti tea waina e pura ki naaleatia maga.

¹²Go nasum̃a adeada maga euga wo pei tea vituakiana paki tea p̃ota maga, nara ma vanua adeada maga go adagoroi maga euga mamau: nalakena aga wo sai ki nam̃elearugu dip̃a naatatoko maga ni navanua, Yehovah e noa e.

¹³Nalakena pae tea vakitano kakada pa pa paki tea vakilagi kakada, eu mamau puti pei tea vituakiana paki namatam̃aguraana; go pae profeta kakada pa pa paki tea viri kakada, eu mamau puti mari malauweluki.

¹⁴Eu midoa ki m̃oli ki wotu maga ki narei aginau, eu naga, Natam̃ateana, natam̃ateana; ragi waina natam̃ateana e dika.

¹⁵Eu maliere ragi waina eu mari tea mamaragokiana, kite? Ee, eu da maliere mau, go namatada eu da mariatae soro mimiala mau: nalakena tea wanogoe euga wo dowo sikoti tea maga waina eu dowo: doko ragi waina aga wo parati ra, euga wo pei tea tap̃olosiwokiana, Yehovah e noa e.

¹⁶Yehovah e noa dapala nea, e naga, Kuga lawodu napua dawasi ra maga, po leo, po pusuusu nalo ni napua maga ni tuai, seve tea kakada e pei napua wia, go kuga surata asa, go kuga wo dum̃amu manimu pap̃ai namaromaroana: ma eu naga, Auga wo da surata asa mau.

¹⁷Go a lawo ki tea leleogoro maga eu pavaigoro mu, a naga, Kuga taki dorogo paki nadaleo ni paiga; ma eu naga, Auga wo da daki dorogo asa mau.

¹⁸Nalakena tea wanogoe kuga rogo, nalauna maga O, po atae, nasaisaiana O, tea waina ega wo pakilina ki da.

¹⁹P̃a taki dorogo, maramana O; p̃a leo, aga wo mari nasaana ega wo pakilina ki narei waia, nawa ni namidoakip̃aiana adeada maga, nalakena eu da dogo parati ki navasaana aginau maga mau; kite nawotaeana aginau, ma eu dip̃adoa e.

²⁰Libano waina e do maginau pae Sheba umai, ega wo mari tea wia nasava, go kalamo lolo waina e pae navanua sikai ni uvea umai? Navituaana tap̃arakiana animu maga eu da pei tea midoakim̃atakiana mau, go naviriana animu maga a da maro ara mau.

²¹Nalakena tea wanogoe Yehovah e noa dapala nea, e naga, P̃a leo, aga wo nadi ki tea tapilagonaana maga kivea ki narae ni narei waia: go tamada maga go natuda maga euga wo mamau puti dapilagona ara; tea ni m̃aladigi ki da go tamatada eroga wo pano puoli.

²²Yehovah e noa dapala nea, e naga, P̃a leo, narei sikai eu do pae navanua ni north umai; go nalauna warua sikai ega wo pei tea surupugoniana ega tuleana m̃elu namatap̃ago edaku maga ni maramana.

²³Eu puati naasu go naio; eu pei tea dodotika maga, go eu da dodomi naatam̃oli mau; nadaleoda e p̃agaana dakiusi nap̃agaagaana ni natasi, go eu sakesaake horse maga; eu pei tea tutuakiana dapala naatam̃oli sikai maau naga euga mari navakalo dip̃a ko, Sion natuna nagoroi O.

²⁴Au dogo narogoana kakana; nam̃elearugami maga eu po manainai: narogokitesaana e puasoki gami, go navitinuana dapala navitinuana ni nagoroi visola sikai.

²⁵P̃a ta dave pano paki vanua, kite surata napua mau; nalakena lova ki tea kokona, go namatakuana eu doko daliviri.

²⁶Narei aginau natuna nagoroi O, p̃a tum̃am̃a dasoki ko ki nakulukulu ni sak, po malulu natano‐apu: p̃a tum̃am̃a mari natagiana, dapala e pe vei nalo ni natum̃a naanoai sikedau, natagiana waina e p̃arua p̃arua liu; nalakena tea mari pavakoto ega wo m̃araverave pa parati ki gida.

²⁷A lawo ki‐go ku pei tea maridogo sikai m̃aleoputo ni narei aginau; naga p̃a atae po maridogo ra napua adeada.

²⁸Eu pei taua vei p̃auluulu p̃arua, doko do surasurata ki navasapinoaana maga; eu mamau puti pei tea mari malauweluki maga.

²⁹Nive maga eu do nivenive kasua; led e m̃elu dua ki nakapu pei tea mamau: eu mari usi m̃oli ki nia; nalakena tea sigisigileo maga eu da pei tea mariluaana mau.

³⁰Naatam̃oli maga euga wo soso ra ki natae ni silver, nalakena Yehovah e dip̃adoa ra.