Read Nguna Togoa Etafe North YEREMIAH 7 Bible Online

YEREMIAH 7 - Nguna Togoa Etafe North bible

YEREMIAH 7

¹Navasaana waina e pae Yehovah umai paki Yeremiah,

²e naga, P̃a lawodu roara ni nasum̃a ki Yehovah, po dogorogo ki navasaana waia asa, p̃a naga, Kuga rogo navasaana ki Yehovah, nimu tea mamau puti ni Yudah, waina ku sili namata‐pua maga waia naga kuga lotu ki Yehovah.

³Yehovah ki taua maga, Sup̃e ki Israel, e noa dapala nea, e naga, Kuga midoakidoa pa dua ki napua animu maga go pa dua ki natomariana animu maga, naga aga toko sikoti mu doko tokora waia.

⁴Kuga ta pavatu navasaana maga ni nasorosoroana mau, doko do naga, Tea waia e pei nasum̃a tapu ki Yehovah, nasum̃a tapu ki Yehovah, nasum̃a tapu ki Yehovah.

⁵Nalakena ku pe midoakidoa lomau pa dua ki napua animu maga go pa dua ki natomariana animu maga; ku pe mari leana ki navasap̃otaeana namawota ni naatam̃oli go ni tea ni m̃aladigi ki nia;

⁶Ku pe ta diesoki nam̃enaki, kite namatapesu, kite nagoroi malepu, po da daki nada tautau tokora waia mau, kite surata dausi sup̃e p̃ota maga mau, po da dum̃amu pei tea marisakiana asa mau:

⁷Kinau a pe wo suasua ki mu naga kuga toko tokora waia doko, doko navanua waina a dua tamamu maga asa, pae ragi ni tuai go pa pa ega tu mau du.

⁸Kuga leo, ku pavatu navasaana maga ni nasorosoroana, waina eu da mariatae manimu mari tea wia mau.

⁹Kuga wo panako, po maripunue, po maripele, po pivisa sorosoro, po dap̃ara ki tea ni nap̃o wia paki Baal, po surata dausi sup̃e p̃ota maga waina ku da atae ra mau,

¹⁰Po umai po lawodu naraegu nasum̃a waia, waina e pei tea sosoana ki nagisagu, po naga, Au pei tea vualuaana; dapala waina kuga moro mari tea mamaragokiana maga mamau puti wanogoe, kite?

¹¹Nasum̃a waia, waina e pei tea sosoana ki nagisagu, e po pei valea sikai ki tea tapepavakoto maga namatamu maga, kite? Kuga leo, kinau a dum̃agu punusi a, Yehovah e noa e.

¹²Ma kuga vano po paki tokora aginau waina e pea doko Shiloh, tokora waina a mari nagisagu e doko asa sala vea, po punusi tea waina a mari a paki nia nalakena nasigisigileoana ki narei aginau Israel.

¹³Go sala waia, nalakena ku mari nawosiana maga mamau puti wanogoe, Yehovah e noa e, go a pasa paki mu pitip̃atip̃a, ma ku da daki dorogo paki nau mau; go a pioso paki mu, ma ku da pasadara au mau;

¹⁴Nalakena tea wanogoe aga wo mari paki nasum̃a waia, waina e pei tea sosoana ki nagisagu, go waina ku pavatu asa, go paki tokora waina a dua mu asa, nimu ma tamamu maga, aga wo mari paki nia ega tapala waina a pea mari a paki Shiloh.

¹⁵Go aga wo mari puoli ki mu m̃elu dua ki namatagu, dapala waina a pea mari puoli ki taimu maga mamau puti, naworawora mamau puti ni Efraim.

¹⁶Nalakena tea wanogoe p̃a ta magi narei waia pavara mau, kite madeada sike naviosoana kite natapasavasaana mau, kite mari natarotaroana paki nau mau: nalakena kinau aga wo da dogo ko mau.

¹⁷Ku da punusi tea waina eu do mari a natokoana maga ni Yudah go napua maga ni Yerusalem, kite?

¹⁸Natuda maga eu p̃owota, go tamada maga eu dokoni nakapu, go nagoroi maga eu saradoa flaur, naga euga mari keke maga paki nawota nagoroi ni nakoroatelagi, go naga euga taki navituaana takiana maga paki sup̃e p̃ota maga, naga euga mari au aga maeto.

¹⁹Ma eu mari au a maeto, kite? Yehovah e noa e. Eu da dum̃ada mari ra eu maeto mau, naga eu pinovinoi asa, kite?

²⁰Nalakena tea wanogoe Yehovah Sup̃e e noa dapala nea, e naga, P̃a leo, namaetoana aginau go namaritausuana aginau eroga wo pei tea takiana paki tokora waia, paki naatam̃oli, go paki nalo tuavati, go paki nakau maga ni vanua, go paki nawa ni natano; go ega wo pavaga, go ega wo da pei tea vuepunueana mau.

²¹Yehovah ki taua maga, Sup̃e ki Israel, e noa dapala nea, e naga, Kuga sokari naviriana animu maga ki navituaana tap̃arakiana animu maga, go kuga kani nap̃okasi.

²²Nalakena doko naaleatia waina a piragi lua ra m̃elu dua ki navanua ni Ityipt umai, kinau a da pasa paki tamamu maga kite dip̃aki da asa nalo ni navituaana tap̃arakiana maga kite naviriana maga mau:

²³Ma naleo waia a dip̃aki da asa, a naga, Kuga taki dorogo paki nadaleogu, go aga wo pei Sup̃e animu, go kuga wo pei narei aginau: go kuga surata napua mamau waina a dip̃aki mu asa, naga kuga toko p̃ia doko.

²⁴Ma eu da dogo parati kinau mau, kite daki nadaligada mau, ma eu surata pae namidoakip̃otaeana adeada maga go pae nakasuaana ni nap̃op̃osaana adeada, go eu sukasuka liliu, po da disu pano p̃ia mau.

²⁵Pae naaleatia maga waina tamamu maga eu m̃elu dua ki navanua ni Ityipt umai pa pa paki naaleatia waia, kinau a dip̃aki lua puti tea suasua aginau profeta maga pa punusi mu, a dip̃aki lua ra pano pitip̃atip̃a:

²⁶Ma eu da dogo parati kinau mau, kite daki nadaligada mau, ma eu dum̃ada mari nanoada e kasua: eu mari tea waina e sa p̃arua liu tea ki tamada maga.

²⁷Nalakena tea wanogoe p̃a wo pasa paki da ki navasaana maga mamau puti wanogoe; ma euga wo da daki dorogo paki‐go mau: go p̃a wo pioso paki da; ma euga wo da pasadara ko mau.

²⁸Go p̃a wo noa ki da naga, Tea waia e pei nalauna waina e da dogo parati ki nadaleo ni Yehovah Sup̃e adeada mau, kite suasua dape natapavanauana mau: naveilomauana e pano puoli, e pei tea taeluaana pa dua ki nawokada.

²⁹P̃a alati kotovi nalolu ni nam̃asuam̃a, Yerusalem O, po nadi ki nia pano, po sike natagiana sikai tokora vakilagi maga; nalakena Yehovah e dip̃adoa po doropusi tagona ni namaritausuana aneana.

³⁰Nalakena Yudah natuna maga eu mari tea waina e sa namatagu, Yehovah e noa e; eu lawo ki tea mamaragokiana adeada maga ekopu ni nasum̃a waina e pei tea sosoana ki nagisagu, po mari a e pei tea m̃oli.

³¹Go eu davagi tokora vakilagi maga ni Tofeth, waina e doko nap̃aloa ni Hinnom natuna naanoai, naga euga tap̃ara ki natuda naanoai maga go natuda nagoroi maga asa, euga vei navituaana tap̃arakiana maga; waina kinau a da pitip̃aki asa mau, kite midoa ki nia namidodoana aginau mau.

³²Nalakena tea wanogoe kuga leo, naaleatia maga euga wo umai, Yehovah e noa e, go ega wo da moro pei tea sosoana ki Tofeth mau, kite ki Nap̃aloa ki Hinnom natuna naanoai mau, ma ega wo pei tea sosoana ki Nap̃aloa ni Namaripunueana: nalakena euga wo ova ki doko Tofeth pa pa namalopa kakana ega wo dika.

³³Go nap̃atoko mate maga ni narei waia euga wo pei navinaga ki manu maga ni namalopa, go ki nalo tuavati maga ni maramana; go te naata ega wo da kopasi lua ra pano mau.

³⁴Go aga wo mari nadaleo ni nalaelaeaana go nadaleo ni nasamasamaana ega wo makoto m̃elu dua ki natokoana maga ni Yudah, go m̃elu dua ki napua maga ni Yerusalem, nadaleo ni tea vitawiri go nadaleo ni tea laki: nalakena navanua ega wo pei maso maladi sikai.