Read Nguna Togoa Etafe North YEREMIAH 8 Bible Online

YEREMIAH 8 - Nguna Togoa Etafe North bible

YEREMIAH 8

¹Doko ragi wanogoe, Yehovah e noa e, navatu maga ni nawota maga ni Yudah, go navatu maga ni tea maraki kakada maga, go navatu maga ni tea viri maga, go navatu maga ni profeta maga, go navatu maga ni naatatoko maga ni Yerusalem, euga wo pei tea viragiana m̃elu dua ki matigoda maga umai:

²Go euga wo daperavera ki da narae ni elo, go ni atelagi, go ni taua mamau ni nakoroatelagi, waina eu dodomi ra, go waina eu madeada suasua, go waina eu surata dausi ra, go waina eu pusuusu ki da, go waina eu lotu ki da: euga wo da pei tea sara‐dauakiana mau, kite pei tea ovakiana mau; euga wo pei natap̃ata doko narae ni maramana.

³Go namagovai mamau ni naworawora sa wanogoe, waina ega wo pei tea toropusiana doko tokora maga mamau puti waina a kopasi lua ra paki asa, ega wo matadoa namateana p̃arua liu namauriana, Yehovah ki taua maga e noa e.

⁴Go p̃a noa ki da, p̃a naga, Yehovah e noa dapala nea, e naga, Naatam̃oli maga euga wo dowo, po da moro duleana mau, kite? Tea sikai ega wo maradoa pano po da moro maradoa liliu mau, kite?

⁵Go ekasana narei waia ni Yerusalem eu dowo kitaku narowo‐kitakuana pitip̃atip̃a? Eu puasoki kasua ki namarisoreana, eu karai naga euga liliu.

⁶A daki dorogo po dogo, ma eu da pasa nalomauana mau: te naata sikai e da dum̃ana midoakidoa pa dua ki nasigisigileoana aneana mau, doko da noa naga, Kinau a mari nasava? Eu mamau puti sava dausi napua adeada pano, dapala horse sikai waina e do sava kasua paki navakalo.

⁷Ova waina e doko elagi mau e atae ragi tatutakiana aneana maga; go turi go manu mataika go manu kapataika eu pavaigoro ragi ni naumaiana adeada; ma narei aginau eu da atae natawonakiana ki Yehovah mau.

⁸Dapale sava ku noa naga, Au manumatua, go nawotaeana ki Yehovah e sikoti gami doko? Ma kuga leo, pen sorosoro ki tea midiri maga e mari a e pei nasorosoroana sikai.

⁹Naatam̃oli manumatua maga euga wo pei tea toropusiana paki namaliereana, euga wo saram̃akoto po pei tea surueana: p̃a leo, eu dip̃adoa navasaana ki Yehovah; go seve namanumatuaana e doko ara?

¹⁰Nalakena tea wanogoe aga wo pitua ki adagoroi maga paki tea p̃ota maga, go vanua adeada maga paki tea maga waina euga wo peanipioli ki da: nalakena sara naata kakada pae tea vakitano pa pa paki tea vakilagi, eu pei tea vituakiana paki namatam̃aguraana, pae profeta pa pa paki tea viri, eu mamau puti mari malauweluki.

¹¹Go eu midoa ki m̃oli ki wotu ki narei aginau natuna nagoroi, eu naga, Natam̃ateana, natam̃ateana; ragi waina natam̃ateana e dika.

¹²Eu maliere ragi waina eu mari tea mamaragokiana, kite? Ee, eu da maliere mau, go namatada maga eu da mariatae soro mimiala mau: nalakena tea wanogoe euga wo dowo sikoti tea maga waina eu dowo: ragi waina aga varati ra, euga wo pei tea tap̃olosiwokiana, Yehovah e noa e.

¹³Aga wo mari puoli ki da, Yehovah e noa e: vaine ega wo da pitua ki nawana mau, go napuliva ega wo da dau mau, go nauluna ega wo pevera; go naleo maga waina a dua ra asa, euga wo m̃elu dua ki da po pano puoli.

¹⁴Ekasana tu doko m̃oli? Kuga tum̃amu saisai ki mu, go tuga vaki natokoana p̃aakagoroana maga, go tuga mate puoli tokora wanogoe: nalakena Yehovah Sup̃e anigida e mari gida tuga mate puoli, po dua gida noai kokona naga tuga munugi a, nalakena tu mari naleo sa dip̃a Yehovah.

¹⁵Tu leogoro natam̃ateana, ma tea wia e da umai mau; go ki ragi sikai ni namaripauriana, go p̃a leo, narogokitesaana!

¹⁶Naviragisuana ni horse aneana maga e pei tea rogoana m̃elu Dan: navanua mamau e duruuru nalakena nadaleo ni nap̃iriana ni tea kasua aneana maga; nalakena eu po umai, go eu po dinomi navanua go tea mamau puti waina e doko asa doko; natokoana go tea maga waina eu doko asa doko.

¹⁷Nalakena kuga leo, aga wo dip̃aki lua m̃aata maga, adder maga paki m̃aleoputo kakamu, waina euga wo da dogo nadaleo ni tea vasa‐talakolako mau; go euga wo kati mu, Yehovah e noa e.

¹⁸Ako, a pe mariatae dum̃agu pasa pakavakale au naga a pe ta dogokitesa mau, e pe wia! Nap̃op̃ogu e sirinopu nap̃alaugu.

¹⁹Kuga leo, nadaleo ni naviosoana ki narei aginau natuna nagoroi e pei tea rogoana pae navarauana go pae naweleweleana mamau ni navanua, e naga, Yehovah e da doko Sion mau, kite? Nawota kakana e da doko asa doko mau, kite? Ekasana eu mari au a maeto ki nasup̃e taeana adeada maga, go ki idolo vanop̃ota adeada maga?

²⁰Ragi ni nalolovaeana e pano sua, ragi ni navivitinuana e po nopu, go tu da pei tea mautiana mau.

²¹Nalakena narogokitesaana ki narei aginau natuna nagoroi, kinau ma a pei tea mariana a dogokitesa: kinau a susue; nasaram̃akotoana e puasoki au.

²²Naroro lolo e dika Cilead, kite? Tea maripauri e dika asa, kite? Go ekasana nawiaana ni narei aginau natuna nagoroi e da pei tea maripauriana mau?