Read Nguna Togoa Etafe North YEREMIAH 9 Bible Online

YEREMIAH 9 - Nguna Togoa Etafe North bible

YEREMIAH 9

¹Ako, nap̃augu e pe vei noai maga, go namatagu ero pe vei namata noai sikai ni naririmata maga, a pe mariatae dagisi tea maripunueana maga ni narei aginau natuna nagoroi aleati go p̃ogi!

²Ako, a pe vei talakea ni nasum̃a sikai masop̃alo, tokora sikai waina naatam̃oli maga waina eu do surata napua eu pe m̃enaki asa; a pe mariatae doropusi narei aginau, po m̃elu dua ki da pano! Nalakena eu pei taua sikai ki tea maripele maga, nasaisaiana sikai ki naatam̃oli malauweluki maga.

³Go eu do pua p̃elua ki namenada dakiusi naasu sikai, naga euga vasa nasorosoroana; go eu atum̃aki kasua navanua, ma e da pei nalo ni naveilomauana mau: nalakena eu do mari tea waina e sa, po moro do mari tea waina e sa, go eu da atae au mau, Yehovah e noa e.

⁴Kuga matamatua ki tea ni m̃aladigi ki mu sara naata kakamu, go kuga ta pavatu taimu maga sikai kakada mau: nalakena tamataida maga euga wo dum̃ada dielua ra, go tea ni m̃aladigi ki da euga wo surasurata doko do pasapinoa.

⁵Go euga wo dum̃ada surue ra, sara naata paki tea ni m̃aladigi ki nia, go euga wo da pasa nalomauana mau: eu pasa pisei ki namenada naga ega vasa ki nasorosoroana; eu dum̃ada mari ra eu mawosa, doko do mari namarinaleotageleana.

⁶Tokora tokoana anigo e doko m̃aleoputo ni namarisoreana; nalakena namarisoreana, eu karai naga euga atae au, Yehovah e noa e.

⁷Nalakena tea wanogoe Yehovah ki taua maga e noa dapala nea, e naga, P̃a leo, aga wo mari dautau ki da, po maridogo ra; nalakena a pe wo mari nasava nalo ni narei aginau natuna nagoroi?

⁸Namenada e pei nalua sikai ni namateana; e do pasa namarisoreana: tea sikai e do pasa natam̃ateana paki tea ni m̃aladigi ki nia ki nawokana, ma e do kusugoro e doko nap̃op̃ona.

⁹Aga wo da parati ra mau nalo ni naleo maga wanogoe, kite? Yehovah e noa e: naatagu ega wo da mari nasikoana mau paki nalauna dapala nogoe sikai, kite?

¹⁰Kuga sike natagiana sikai go nalalagaarovaana nalo ni tava maga, go nasusueana sikai nalo ni napega maga ni masop̃alo, nalakena eu pei maso maladi doko, dapala waina te naata e da surata duaduru asa mau; go namuaana ni katel e da pei tea rogoana asa mau; manu maga ni namalopa go nalo tuavati maga eu sava pano po puoli.

¹¹Go aga wo mari Yerusalem ega wo pei taua makaka sikai, tokora sikai waina koria mila maga euga toko asa; go aga wo mari natokoana maga ni Yudah euga vei maso maladi sikai, naatam̃oli ega tika ara.

¹²Sei e pei naatam̃oli manumatua waina e mariatae midoaki atae tea wanogoe? Go naatam̃oli sei waina nawoka ni Yehovah e pasa paki nia, naga e mariatae noasai a? Ekasana navanua e makaka po pei maso maladi one, dakiusi masop̃alo sikai, dapala waina te naata e da surata duaduru asa mau?

¹³Go Yehovah e naga, Nalakena eu doropusi nawotaeana aginau waina a lawo ki nia naraeda, go eu da dogo parati ki nadaleogu mau, kite surata patakana mau;

¹⁴Ma eu surata dausi namidoakip̃aiana sa ni nap̃op̃oda, go eu dausi Baal maga, waina tamada maga eu pasa pisei ki da asa:

¹⁵Nalakena tea wanogoe Yehovah ki taua maga, Sup̃e ki Israel, e noa dapala nea, e naga, P̃a leo, aga wo pagani narei waia ki nakokonae, po dua ra noai kokona naga euga munugi a.

¹⁶Go aga wo daperavera ki da m̃aleoputo ni nalauna maga, waina nara ma tamada maga eu da pea atae ra mau: go aga wo dip̃aki lua lova ega wo kopasi lua ra, pa pa aga wo mari puoli ki da.

¹⁷Yehovah ki taua maga e noa dapala nea, e naga, Kuga midoakiusiusi, po soso nagoroi maga waina eu do lalagaarova, naga euga umai; po pitip̃aki naga nagoroi atae m̃ataki maga euga umai:

¹⁸go euga wo mari m̃araverave, po sike nalalagaarovaana nalo kakagida, naga naririmatagida maga euga vevera, go naga namatagida maga euga sara siwo ki noai maga.

¹⁹Nalakena nadaleo ni nalalagaarovaana e pei tea rogoana m̃elu Sion, e naga, Ai ki gida, tu po puoli! Tu pinovinoi p̃arua, nalakena tu doropusi navanua, nalakena tokora tokoana anigida maga eu nadi ki lua gida pano.

²⁰Ma kuga rogo navasaana ki Yehovah, nimu nagoroi maga O, go nadaligamu ega tapesoki navasaana ni nawokana, go kuga vasa pisei ki natumu nagoroi maga nalalagaarovaana, go tea ni m̃aladigi ki mu ki nasusueana.

²¹Nalakena namateana e sili umai namata leoduru anigida maga, e paki ekopu ni nasum̃a warua anigida; naga ega taelua piakirikiri anigida maga m̃elu dua ki napua maga, go natureai maga m̃elu dua ki tokora welewelea maga.

²²Kuga vasa po naga, Yehovah e noa dapala nea, e naga, Nap̃atoko mate maga ni naatam̃oli maga euga wo dowo dapala natap̃ata doko vanua welewelea, go dapala napu waina tea tagaukotovi e doropusi a e doko, go te naata sikai ega wo da pila daua ki da mau.

²³Yehovah e noa dapala nea, e naga, Naatam̃oli manumatua ega ta pakavakae namanumatuaana aneana mau, go naatam̃oli marimatua ega ta pakavakae namarimatuaana aneana mau, naatam̃oli sogolapa ega ta pakavakae nasogolapaana aneana mau:

²⁴Ma tea waina e pakavakae ega vakavakae tea waia, naga ega midoaki atae, po atae au, naga kinau a pei Yehovah waina a do mari nadodomiana, navasap̃otaeana, go naleanaana doko maramana: nalakena tea maga wanogoe kinau a maro ara, Yehovah e noa e.

²⁵P̃a leo, naaleatia maga euga wo umai, Yehovah e noa e, go aga wo parati tea maga mamau puti waina eu pei tea tovadaviviana nap̃okasi, ma eu da pei tea tovadaviviana nap̃op̃o mau;

²⁶Ityipt, go Yudah, go Edom, go Ammon natuna maga, go Moab, go tea maga mamau puti waina eu doko masop̃alo doko, waina eu alakotovi nalolu ni nap̃alakutuda: nalakena nalauna maga mamau puti wanogoe eu da pei tea tovadaviviana mau, go nasum̃a mamau ni Israel eu da pei tea tovadaviviana nap̃op̃oda mau.