Read Nguna Togoa Etafe North NATAGISIANA MAGA 1 Bible Online

NATAGISIANA MAGA 1 - Nguna Togoa Etafe North bible

NATAGISIANA MAGA 1

¹Aii natokoana e po pei maso maladi doko, Waina e pea pura ki naatam̃oli sala vea! Nae e po dakiusi nagoroi malepu sikai! Tea waina e pea pei tea warua m̃aleoputo ni nalauna maga, Go tea maraki nagoroi m̃aleoputo ni navanua maga, E po pei tea ni nawosiana ni nasautoga!

²E dagi p̃arua p̃ogi, go naririmatana maga eu doko napupuna maga; Tea dodomi a maga sikai kakada e dika waina ega vasa pakavakale a: Tana ri maga eu maraka mari malauweluki paki nia. Eu po pei tea kokona ki nia maga.

³Yudah e pei tea viragi‐luapavakotoana pano nalakena narogokitesaana, Go nalakena navei‐naviti‐ana warua; E doko m̃aleoputo ni nalauna maga doko, e da pap̃ai te namaromaroana mau: Tea kopalele asa maga eu pa parati ki nia namawota ni nariesokiana maga.

⁴Napua maga ni Sion eu do lalagaarova nalakena te naata e da umai paki nasaisaiana tatutakiana maga mau; Namata‐pua kakana maga eu pei maso maladi, tea viri kakana maga eu do gi: Nagoroi atara kakana maga eu dogokitesa, go nae e dum̃ana doko nakokonaana doko.

⁵Tea maga waina eu do diesoki a eu po pei nap̃au, Tea kokona ki nia maga eu doko dam̃ate; Nalakena Yehovah e mari a e dogokitesa, Nalakena nalapalapaana ni natapiriana kakana maga: Natuna vusavusa maga eu pei tea viragi‐lua‐pavakotoana, Narae ni tea kokona ki nia maga.

⁶Go natatap̃auana ki Sion natuna nagoroi e m̃elu dua ki nia pano po puoli: Tea maraki kakana maga eu po dapala hart maga waina eu da pap̃ai te malo kanikani mau, Go eu sava pa dua ki narae ni tea sava dausi ra, nakasuaana e dika.

⁷Ragi ni nariesoki‐ra‐ana go narogokitesaana aneana, Yerusalem e midoa ki naleo masauniana maga waina eu doko naaleatia maga ni tuai: Narei kakana eu dowo paki nam̃elearu ni tea kokona, Go tea waina ega silae a e dika, Tea kokona maga eu punusi a, Go eu pasa saudoa ki maso maladi kakana maga.

⁸Yerusalem e mari naleo sa warua; Nalakena tea wanogoe e po pei naleo p̃alo sikai: Tea maga waina eu pea dodomadagani a sala vea, Eu po midoa ki p̃alo ki nia, Nalakena eu punusi nam̃alam̃alaana kakana: Go e do dum̃ana gi, po do sukasuka pano.

⁹Naloaana kakana e doko narum̃a ni sugoro kakana maga; E da midoa ki ragi edaku kakana maga mau; Nalakena tea wanogoe e dowo dapala e pe vei tea ni namagaana; E dika ki tea vasa pakavakale a: P̃a leo punusi narogokitesaana aginau, Yehovah O; Nalakena tea kokona e do darasa.

¹⁰Tea kokona e nadi ki nam̃elearuna paki naleo tauakiana wia kakana maga: Nalakena e punusi naga nalauna maga eu paki ekopu ni tokora tapu kakana, Tea maga waina ku dip̃aki da naga euga ta sili paki nasaisaiana anigo mau.

¹¹Narei kakana maga eu do gi, eu do laaga navinaga; Eu pitua ki naleo tauakiana wia kakada maga raki navinaga, Naga ega vaka mauri ki naatada: P̃a leo, Yehovah O, po leo punusi a; Nalakena a po pei tea midoakip̃alo‐kiana.

¹²E da pei te navatuna paki mu mau, Nimu mamau puti waina ku liu sa pano, kite? Kuga leo, po punusi te nasusueana sikai e pe toko waina e dakiusi nasusueana aginau, waina e do pei tea mariana paki nau. Waina Yehovah e mari au a dogokitesa asa, Naaleatia ni namaetoana pivitinu aneana.

¹³E dip̃aki lua nakapu vavaga pae elagi umai paki navatugu maga, go e kasua liu ra: E p̃elesa ki kup̃ena sikai raki nam̃elegu maga, e mari au a liliu pano; E mari au a sikigu doko go a dogokitesa naaleatia mamau.

¹⁴Nakau nanoa ni natapiriana aginau maga, e pei tea soli‐saisai‐kiana doko nam̃elearuna; Eu pei tea mari‐saisai‐kiana, eu sake paki nanoagu; e mari nakasuaana aginau e dapilagona: Yehovah e pitua ki nau paki nam̃elearuda maga, go a mari sa lawodugoro ra mau.

¹⁵Yehovah e mari naatam̃oli kasua aginau maga, eu pei tea midoaki‐dao‐ana m̃aleoputo kakagu; E soso saisai ki nasaisaiana tatutakiana sikai dip̃a au, naga ega mari p̃oraworae natureai aginau maga: Yehovah e pasi soki Yudah nagoroi atara, Dapala e pe mari a doko m̃oru ni navasokiana ni nawa ni vaine.

¹⁶Nalakena tea maga wanogoe a do dagi; Namatagu, namatagu e do sara siwo ki naririmata maga; Nalakena tea vasa pakavakale waina ega vaka mauri ki naatagu e du uvea ki nau: Natugu maga eu sikida doko, nalakena tea kokona e mari matua ki da.

¹⁷Sion e sai ki nam̃elearuna maga; tea vasapakavakale a e dika; Yehovah e pitip̃aki dip̃a nalo ni Yakob, Naga tea maga waina eu dalivirigoro e euga vei tea kokona ki nia maga: Yerusalem e doko m̃aleoputo kakada dapala naleo loa sikai.

¹⁸Yehovah e leana; ma kinau a mari p̃auluulu dip̃a natip̃akiana aneana: Kuga rogo, a pavara ni mu asa, nimu narei maga mamau puti, Kuga leo punusi nasusueana aginau: Nagoroi atara aginau maga go natureai aginau maga, Eu pei tea viragi‐lua‐pavakotoana pano.

¹⁹A pioso paki tea dodomiana aginau maga, Ma nara eu piragi sasap̃o ki nau: Tea viri aginau maga go tea matua aginau maga, Eu marodua ki nameroda natokoana, Ragi waina eu laaga navinaga naga euga vaka mauri ki naatada.

²⁰P̃a leo, Yehovah O; nalakena a pei tea riesokiana; Namaritagu maga eu m̃anaunau; Nap̃op̃ogu e pei tea m̃oli‐dawonakiana nap̃alaugu; Nalakena a mari navei‐p̃auluuluana warua: Etaku lova e do mari puoli, Ekopu namateana e doko.

²¹Eu dogo sua naga a do gi; Tea waina ega vasa pakavakale au e dika; Tea kokona ki nau maga eu dogo narogokitesaana aginau; Eu laelaea nalakena nigo ku mari a: P̃a mari naaleatia waina ku dogorogo ki nia ega vakilina, Go nara euga wo pei tea takiusi au.

²²Nasigisigileoana adeada ega mamau doko kivea ki‐go; Go p̃a mari paki da ega tapala waina ku mari a paki nau, Nalakena natapiriana aginau maga mamau puti: Nalakena nagiana aginau eu laapa, go nap̃op̃ogu e manainai.