Read Nguna Togoa Etafe North NATAGISIANA MAGA 2 Bible Online

NATAGISIANA MAGA 2 - Nguna Togoa Etafe North bible

NATAGISIANA MAGA 2

¹Yehovah e dap̃augoro Sion natuna nagoroi ki napopouru sikai namaetoana aneana! E mari natatap̃auana ni Israel naga e pae nakoroatelagi dowo paki maramana. Go e da midoa ki malo vasiana ni nam̃elena naaleatia ni namaetoana aneana mau.

²Yehovah e maro dip̃a tokora tokoana maga mamau puti ki Yakob, go e da mari nadodomiana mau; E mari p̃oraworae p̃aaka maga ki Yakob natuna nagoroi namaritausuana aneana; e mari ra eu makaka one: E mari namarakiana go tea maraki kakana maga naga eu pei tea dododaoana.

³E dae lua sara napati ni nap̃au ni Israel, namaritausuana vivitinu aneana; E dosa liliua ki nam̃elearuna ni matua m̃elu dua ki narae ni tea kokona: Go e dap̃ara ki Yakob dapala mena ni nakapu sikai, waina e do ganikani daliviri.

⁴E pua p̃elu ki naasu aneana dapala tea kokona sikai, E lawo ki nia doko nam̃elearuna ni matua dapala walup̃ota sikai; Go e atugi tea leom̃atakiana maga tap̃aup̃au ki Sion natuna nagoroi; E daki lua namaritausuana aneana dapala nakapu vavaga.

⁵Yehovah e po dapala tea kokona sikai, e po maro dip̃a Israel; E po maro dip̃a nasum̃a vakilagi kakana maga, e po mari puoli ki p̃aaka kakana maga: Go e po mari nasusueana go nalalagaarovaana, e p̃arua doko Yudah natuna nagoroi.

⁶Go e dape lua pavakoto tap̃aup̃au aneana, dapala e pe vei tea ni roara sikai; E mari sa sa ki tokora ni nasaisaiana aneana: Yehovah e mari nasaisaiana tatutakiana go sabbath, naga eu pei tea maliokiana Sion, Go e dip̃a doa nawota go tea viri, navivitinuana ni namaetoana aneana.

⁷Yehovah e mari saudoa ki wede ni naviriana aneana, E mamarago ki tokora tapu aneana, E pitua ki paki nam̃elearu ni tea kokona, Ki p̃aaka maga ni nasum̃a vakilagi kakana maga: Eu mari p̃arai ekopu ni nasum̃a ki Yehovah, Dapala naaleatia ni nasaisaiana tatutakiana sikai.

⁸Yehovah e midoa ki nia naga ega rakai p̃aaka ki Sion natuna nagoroi; E sai ki namea totowo, e da dosa liliua ki nam̃elearuna pa dua ki namarisakiana mau: Ma e mari tokora ni navaivaiana go p̃aaka naga ero lalagaarova; ero dua manainai.

⁹Namata‐pua kakana maga eu liliu paki natano; E dakai po mari p̃oraworae tea walagoto kakana maga: Nawota kakana go tea maraki kakana maga eu doko m̃aleoputo Ni nalauna maga waina eu dika ki nawotaeana; Profeta kakana maga eu da pap̃ai te navunusiana m̃elu Yehovah mau.

¹⁰Tea matua maga ki Sion natuna nagoroi eu dasake doko natano, eu punuta doko; Eu doropusi nam̃otam̃ota e doko nap̃auda; eu dum̃ada dasoki ra ki nakulukulu ni sak: Nagoroi atara maga ni Yerusalem eu kusu ki nap̃auda paki natano.

¹¹Namatagu maga ero sirinopu ki naririmata maga, Namaritagu maga eu m̃anaunau, Nadanikapugu e pei tea takiana natano, Nalakena namarisakiana ki narei aginau natuna nagoroi; Nalakena piakirikiri maga go tea susu maga, Namatada eu maligo tokora welewelea maga ni natokoana.

¹²Eu noa ki p̃ilada, eu naga, Korn go waine wai? Ragi waina namatada eu maligo dapala tea vei wotu maga napua maga ni natokoana, Ragi waina naatada e pei tea takiluaana pano paki narum̃a ni p̃ilada.

¹³Aga manigo noa nasava, ku pitotowo ma sei, Yerusalem natuna nagoroi O? Aga noa naga ku pataka sikai ma nasava, Naga aga vasa pakavakale ko, Sion natuna nagoroi atara O? Nalakena malo mawora anigo e p̃arua dapala natasi: Sei e mariatae mautipauri ko?

¹⁴Profeta anigo maga eu manigo kikita nakikitaana maga, ni nap̃aloana go naveilalaana; Go eu da mari pakasa ki namarinaleotageleana anigo mau, naga p̃a vei tea viragi‐liliua‐kiana: Ma eu manigo punusi navunusiana maga ni nap̃aloana, Go naleo maga waina eu puadoa ko.

¹⁵Tea maga mamau puti waina eu liu sa pano, eu dapap̃osawosa paki‐go; Eu pasa saudoa po ligiligi p̃au paki Yerusalem natuna nagoroi, eu naga, Tea waia e pei natokoana waina eu pea soso e ki tea leom̃atakiana ni navakilagiana, nalaelaeaana ni maramana mamau, kite?

¹⁶Tea kokona ki‐go maga mamau puti eu maga p̃elewelea ki nawokada paki‐go; Eu pasa saudoa po kati napatida; eu naga, Au po dodomi a; Tea waia e pei naaleatia waina au leogoro asa; Au po pap̃ai a, au po punusi a.

¹⁷Yehovah e po mari tea waina e midoa ki p̃otae a, E po pakavuro navasaana aneana; Dapala waina e pitip̃aki asa naaleatia maga ni tuai, E po mari sa sa ki, nadodomiana e dika: E po mari tea kokona e laelaea dap̃au ko, E po sike pakilagi ki napati ni nap̃au ni tea mari dip̃a ko maga.

¹⁸P̃a kua pioso paki Yehovah, Sion natuna nagoroi O! Naririmata maga euga sara siwo dakiusi noaisara sikai, aleati go p̃ogi! P̃a ta dum̃am̃a dua ko ragi ni namaromaroana mau; Atolu matam̃a ega ta sirinopu mau.

¹⁹P̃a tuleana, p̃a kua pioso p̃ogi, ragi ni naatulakeana ni navavaigoroana maga! P̃a taki lua nap̃op̃om̃a dakiusi noai kivea ki narae ni Yehovah! P̃a tarasike nam̃elearum̃a maga paki nia, Po pavara ni a raki namauriana ki piakirikiri vusavusa anigo maga, Waina eu do matekimala nalakena navitoloana, Doko nap̃au ni sara napua maga ni natokoana.

²⁰P̃a leo, Yehovah O, po leo punusi tea maga waina ku mari dapala nogoe paki da! Nagoroi maga euga wo gani nawa ni nap̃eleda, Natuda maga waina eu salesalea ki da, kite? Tea viri go profeta euga wo pei tea atugiana, Tokora tapu ki Yehovah, kite?

²¹Natureai go namariki eu one natano, napua maga ni natokoana; Nagoroi atara aginau maga go natureai aginau maga eu dowo ki lova: Ku atugi ra naaleatia ni namaetoana anigo; ku mari punuvunue ra, nadodomiana e dika.

²²Ku do soso saisai ki namatakuana aginau maga dalivirigoro au, Dapala e pe vei naaleatia ni nasaisaiana tatutakiana sikai, Go tea waina e sava pano kite pei tea mautiana, naaleatia ni namaetoana ki Yehovah, e dika: Tea maga waina a salesalea ki da po pakale ra, tea kokona ki nau e mari puoli ki da.