Read Nguna Togoa Etafe North NATAGISIANA MAGA 3 Bible Online

NATAGISIANA MAGA 3 - Nguna Togoa Etafe North bible

NATAGISIANA MAGA 3

¹Kinau a pei naatam̃oli waina a punusi narogokitesaana, Etano ni tiko ni namaritausuana aneana.

²E maraki au, po mari au a surata namaligo, Namarama e dika.

³E dum̃ana mari nam̃elearuna e do mari dip̃a au Paka laapa naaleatia mamau.

⁴E mari nap̃okasigu go nawiligu ero duai; E mari p̃oroworosi navatugu maga.

⁵E kelugoro au, po kokoro p̃onoti au Ki nakokonaana go ki narogokitesana.

⁶E mari au a doko tokora maligo maga, Dapala tea mate tuai maga.

⁷E p̃aakagoro au, naga a mari sap̃o dave; E mari tea moti soki au ni airon e madaga doko au.

⁸Go ragi waina a do kua pioso, po do pioso raki nasilaeana, E do kokoro dua ki natapasavasaana aginau.

⁹E dugoro napua aginau maga ki vatu taeana, E mari au a do dawasi pae napua tagele maga.

¹⁰E kusugoro au one tokora ni nakusugoroana dakiusi bear, Dakiusi laion waina e one tokora ni natokolokuana.

¹¹E mari au a liliu m̃elu dua ki napua aginau maga, po pua p̃oraworae au; E mari au a sikigu doko.

¹²E pua p̃elu ki naasu aneana, Po lawo ki nau a pei wotu sikai raki nalua aneana.

¹³E mari nalua maga ni p̃olaga aneana Eu lulu nap̃elekevatugu maga.

¹⁴A po pei tea mari‐saudoa‐kiana ki narei aginau maga mamau puti; Go a pei nalegaana adeada naaleatia mamau.

¹⁵E mari au a pura ki nakokonaana, E mari au a dawosa ki nakokonae.

¹⁶E mari p̃ori napatigu ki nakirikiri, Po donigoro au ki natano‐apu.

¹⁷Go ku mari naatagu e madu uvea ki natam̃ateana; A malio ki natoko‐p̃ia‐ana.

¹⁸Go a naga, Nakasuaana aginau e pano puoli, Go naleogoroana aginau doko Yehovah e nopu.

¹⁹P̃a midoa ki narogokitesaana aginau go navasaraana aginau, Nakokonaana, go nakokonae.

²⁰Naatagu e do midoa ki nia pitip̃atip̃a, Go e do kolo pakitano doko au.

²¹Tea waia a midoa ki parati ki nia nap̃op̃ogu, Nalakena tea wanogoe a ko do leogoro.

²²Nadodomiana ki Yehovah ega wo da makoto mau, Namaritadodomiana aneana maga euga wo da nopu mau.

²³Eu pau sara malip̃ogi; Naveilomauana anigo e p̃arua.

²⁴Yehovah e pei matele aginau, naatagu e noa e; Nalakena tea wanogoe aga wo leogoro asa.

²⁵Yehovah e p̃ia paki tea maga waina eu do leogoro asa, Paki naatana waina e do laaga asa.

²⁶E pei tea wia naga naatam̃oli ega toko dam̃ate doko, Po do leogoro namautipauriana ki Yehovah.

²⁷E pei tea wia naga naatam̃oli ega tapetape nakau ni nanoa Ragi ni navei‐natureai‐ana aneana.

²⁸Ega masikinia doko po punuta, Nalakena Sup̃e e doropusi a e one asa.

²⁹Ega toropusi nawokana ega toko nam̃otam̃ota ni natano; Mase naleogoroana e pe toko.

³⁰Ega vitua ki nap̃orona paki tea waina e dapagi a; Ega vei tea vakavuroana ki navasapinoaana.

³¹Nalakena Yehovah ega wo da dip̃adoa Pa pa ega tu du po du mau du.

³²E pe mari narogokitesaana e pe vakilina, Ma e pe wo mari namaritadodomiana pae nalapalapaana ni nadodomiana aneana maga.

³³Nalakena ega wo da dakaraka mari sa ki mau, Kite mari naatam̃oli natuna maga euga susue mau.

³⁴Naga ega vasi soki tea soliana maga mamau puti ni navanua,

³⁵Naga ega vuadoa naleanaana ki naatam̃oli kivea ki narae ni Tea Vakilagi Mau,

³⁶Naga ega lim̃adoa naatam̃oli navululuana aneana, Yehovah e da suasua asa mau.

³⁷E pei sei waina e pitip̃aki, go e pakilina, E pe ta pei Yehovah waina e pasa dawona ki nia?

³⁸Tea sa go tea wia ero da dua puti m̃elu Nawoka ni Tea Vakilagi Mau, kite?

³⁹Nalakena nasava naatam̃oli mauri ega vasadip̃a Navaratiana ni namarinaleosaana aneana maga?

⁴⁰Tuga maridogo po leousiusi napua anigida maga, Po moro maradoa liliu punusi Yehovah.

⁴¹Tuga sike nap̃op̃ogida po darasike nam̃elearugida maga Paki Sup̃e waina e doko nakoroatelagi maga.

⁴²Au mari natapiriana po mari p̃auluulu; Go ku da maginau midoakikorokoro mau.

⁴³Ku dum̃am̃a kulutigoro ko ki namaetoana, po kopasi gami; Ku mari punuvunue, nadodomiana e dika.

⁴⁴Ku dum̃am̃a kovagoro ko ki napopouru sikai, Naga natapasavasaana aginami ega ta duaduru mau.

⁴⁵Ku mari gami au dapala nasam̃a go nasogosogo M̃aleoputo ni narei maga.

⁴⁶Tea kokona ki gami maga mamau puti Eu maga p̃elewelea ki nawokada dip̃a gami.

⁴⁷Namatakuana go m̃orutano ero pakilina ki gami, Navei‐maso‐maladi‐ana go namarisakiana.

⁴⁸Namatagu e do sara siwo ki naririmata maga, Nalakena namarisakiana ki narei aginau natuna nagoroi.

⁴⁹Namatagu ega wo sara siwo, po da makoto mau, Ega wo sara siwo pitip̃atip̃a,

⁵⁰Pa pa Yehovah ega wo leo siwo pae nakoroatelagi, Po leo punusi a.

⁵¹Namatagu e do mari nap̃op̃ogu e dogokitesa, Nalakena natokoana aginau natuna nagoroi maga.

⁵²Tea kokona ki nau maga eu palako ki nau, Dapala manu sikai, nalakena e dika.

⁵³Eu nadi ki nau paki m̃orutano naga aga mate, Po doropusi vatu sikai e doko au.

⁵⁴Noai maga eu dap̃augoro nap̃augu; A naga, A po pei tea taeluaana pano.

⁵⁵A pioso paki nagisam̃a, Yehovah O, Pae m̃orutano ni epua maga.

⁵⁶Ku dogo nadaleogu; p̃a ta dasuru ki nadaligam̃a Paki navavaraniana aginau mau.

⁵⁷Ku umai paki m̃aladigi ki nau naaleatia waina a pioso paki‐go: Ku naga, P̃a ta mataku mau.

⁵⁸Yehovah O, ku pululu navululuana aginau; Ku daulua namauriana aginau.

⁵⁹Yehovah O, ku punusi namarisa‐kinau‐ana; P̃a vasap̃otae navululuana aginau.

⁶⁰Ku punusi nasikosikoana adeada maga, Go namidoaki‐p̃otae‐ana adeada maga dip̃a au.

⁶¹Ku dogo navasapinoaana adeada, Yehovah O, Go namidoaki‐p̃otae‐ana adeada maga dip̃a au;

⁶²Navasaana maga ki tea maga waina eu duleana dip̃a au, Go namidoaki‐p̃otae‐ana adeada dip̃a au naaleatia mamau.

⁶³P̃a vunusi natokotanoana adeada, go natuleanaana adeada, Kinau a pei nalegaana adeada.

⁶⁴P̃a wo lagati dua ra navitua‐dip̃aana sikai, Yehovah O, Ega tapala namariana ni nam̃elearuda maga.

⁶⁵P̃a wo dua ra nakasuaana ni nap̃op̃oda, Ega vae navasasakiana anigo paki da.

⁶⁶P̃a wo sava dausi ra namaetoana, po mari puoli ki da M̃elu dua ki etano ni nakoroatelagi maga ki Yehovah.