Read Nguna Togoa Etafe North NATAGISIANA MAGA 4 Bible Online

NATAGISIANA MAGA 4 - Nguna Togoa Etafe North bible

NATAGISIANA MAGA 4

¹Kold e po disu maliere, kold wia lua e po panop̃ota! Vatu tapu maga eu pei tea taperaverakiana doko nap̃au ni sara napua maga ni natokoana.

²Sion natuna naanoai maga waina eu p̃ia p̃arua liu, Waina eu pitotowo ma kold tautau, Eu pei tea midoakiana naga eu dapala lasa maga ni naruku, Nawosiana ni nam̃elearu ni tea mari lasa ni naruku!

³Koria mila maga eu do pitua ki susu, Eu do pakasusu ki tea vusavusa adeada maga: Ma narei aginau natuna nagoroi e po pei tea vivilosi, Dapala ostris maga ni masop̃alo.

⁴Namena ni tea susu e puluti namagana nalakena namadouana: Piakirikiri maga eu datago navinaga, Ma te naata e da dua ra asa mau.

⁵Tea maga waina eu gani navinaga wia liu sala vea, Eu saram̃akoto napua maga ni natokoana sala waia: Tea maga waina eu suni tea suniana miala kesakesa sala vea, Eu do diesokisoki doko natap̃ata maga.

⁶Nalakena navaratiana ni namarinaleotageleana ki narei aginau natuna nagoroi, E p̃arua liu navaratiana ni namarinaleotageleana ni Sodom, Waina e pei tea tap̃olosiwo‐ki‐ana dapala ragi ni nawilimatana sikai, Go te nam̃elearu e da dowo asa mau.

⁷Tea maraki kakana maga eu dautau liu sno, eu dare liu milk, Nap̃atokoda eu miala liu rubi maga, Natakiusiana kakada e dakiusi safir sikai:

⁸Naleopunusiana kakada e loa liu nam̃elevara sikai; Eu da pei tea leo‐atae‐ana napua maga mau: Nawilida e puluti navatuda maga; E kokolo, e po dakiusi nakau sikai.

⁹Tea maga waina eu mate ki lova, Eu p̃ia liu tea maga waina eu mate ki navitoloana; Nalakena nara euga wo sirinopu, Eu pei tea vuri‐sai‐ana nalakena natikaana ni nawa ni vanua.

¹⁰Nam̃elearu ni nagoroi susue maga eu dum̃ada peni natuda maga; Eu pei navinaga adeada ragi ni namarisakiana ki narei aginau natuna nagoroi.

¹¹Yehovah e po pakavuro namaritausuana aneana, E po daki lua namaetoana vivitinu aneana; Go e po dokoni nakapu sikai Sion, Waina e gani dinomi laketano kakana maga.

¹²Nawota maga ni maramana eu da saralomau mau, Kite tea maga mamau puti waina eu doko asa doko, Naga tea mari dip̃a go tea kokona, Euga sili namata‐pua maga ni Yerusalem.

¹³E pei nalakena namarinaleosaana maga ki profeta kakana maga, Go namarinaleotageleana maga ki tea viri kakana maga, Waina eu daki nada ni tea leana maga m̃aleoputo kakana.

¹⁴Eu surata pasara napua maga ni natokoana dapala tea kesa maga, Eu pei tea mariana eu loa ki nada, Dapala waina naatam̃oli maga euga ta kisidogo tea suniana adeada maga mau.

¹⁵Eu pioso paki da, po naga, Kuga vano, tea loa! Kuga vano, kuga vano, kuga ta kisidogo mau: Nalakena eu po pei tea sava pano go tea vanovano maga, Naatam̃oli maga eu do noa m̃aleoputo ni nalauna maga, eu naga, Euga wo da moro doko nea mau.

¹⁶Namaetoana ki Yehovah e po dap̃otawotae ra; Ega wo da moro midoa ki da mau: Eu da matau ki tea viri maga mau, Eu da dodomadagani tea matua maga mau.

¹⁷Namatagami maga eu do sirinopu, Doko do leogoro p̃alo raki nasilaeana: Naleleogoroana aginami au do leogoro raki nalauna sikai, Waina e mari sap̃o mautipauri mau.

¹⁸Eu kopasi navasiana aginami maga, Dapala waina au mari sa surata tokora welewelea aginami maga mau: Namateana aginami e pei m̃aladigi, Naaleatia aginami maga eu pei tea vakavuroana; Nalakena namateana aginami e po umai.

¹⁹Tea sava dausi gami maga eu sava kasua liu ikila maga ni namalopa: Eu kopasi lua gami doko tava maga, eu kusugoro gami doko masop̃alo.

²⁰Namero ni namauriana aginami, tea vuvuraikiana ki Yehovah, E pei tea vuati‐lua‐ana pano doko m̃orutano adeada maga; Waina a noa nalo kakana naga, Etano ni meluna auga wo mauri doko m̃aleoputo ni nalauna maga.

²¹P̃a laelaea po samasama, Edom natuna nagoroi O, Waina ku doko navanua ni Us doko: Lasa munu ega wo pei tea vituakiana paki‐go; P̃a wo matamaloku, po dum̃am̃a mari ko p̃a m̃alam̃ala.

²²Navaratiana ni namarinaleotageleana anigo e po nopu, Sion natuna nagoroi O; Ega wo da moro piragi lua pavakoto ki‐go pano mau: Ma ega wo parati ko namarinaleotageleana anigo, Edom natuna nagoroi O; Ega wo mari pakasa ki namarinaleosaana anigo maga.