Read Nguna Togoa Etafe North NATAGISIANA MAGA 5 Bible Online

NATAGISIANA MAGA 5 - Nguna Togoa Etafe North bible

NATAGISIANA MAGA 5

¹Yehovah O, p̃a midoa ki tea waina e pakilina ki gami, P̃a leo, po punusi navasadaogami‐ana.

²Tea veaniana aginami e pei tea vituakiana paki nam̃enaki maga, Nasum̃a aginami maga paki tea ni navanua p̃ota maga.

³Au pei namalepu maga, tamagami e dika, P̃ilagami eu dakiusi nagoroi malepu maga.

⁴Au pakotovi noai munuana aginami; Nakapu aginami e pei tea soriana paki gami.

⁵Tea sava dausi gami maga eu doko nanoagami: Au mawosa, go au dika ki namaromaroana.

⁶Au pitua ki nam̃elearugami paki Ityipt, Go paki Assiria, naga auga veani navinaga.

⁷Tamagami maga eu mari naleo sa, po puoli; Go kinami au dapetape namarinaleotageleana adeada maga.

⁸Tea suasua maga eu maramara dap̃au gami: Tea waina ega vualua gami m̃elu dua ki nam̃elearuda e dika.

⁹Au dape navinaga aginami pilake namatakuana nalo ni namauriana aginami, Nalakena lova ni masop̃alo.

¹⁰Nawiligami e pivitinu dapala upu ni nakapu sikai, Nalakena navivitinuana vavaga ni navitoloana.

¹¹Eu dape pavakoto nagoroi maga ni Sion, Go nagoroi atara maga ni natokoana maga ni Yudah.

¹²Tea maraki maga eu pei tea likoti‐dau‐ana pae nam̃elearuda; Tea matua maga eu da pei tea dodomadaganiana mau.

¹³Natureai maga eu do mani, Go piakirikiri maga eu pei tea tae nakapu.

¹⁴Tea matua maga eu puoli namata‐pua, Natureai maga eu makoto ki nalegaana adeada.

¹⁵Nalaelaeaana ni nap̃op̃ogami e nopu; Nakatakataana aginami e pei tea roaana po pei nalalagaarovaana.

¹⁶Vauvau e dowo m̃elu dua ki nap̃augami: Awi ki gami! Nalakena au mari naleo sa.

¹⁷Nalakena tea wanogoe nap̃op̃ogami e matekimala, Nalakena naleo maga wanogoe namatagami maga eu sirinopu.

¹⁸Nalakena tava Sion waina e pei maso maladi doko; Koria mila maga eu do surata asa.

¹⁹Ma nigo, Yehovah O, ku do dasake po pei nawota pa pa ega tu du po du mau du; Malo tasake anigo e doko pae tagona paki tagona.

²⁰Ekasana ku malio ki gami pa pa, Po doropusi gami ragi varau sa?

²¹P̃a viragi gami auga liliu paki‐go, Yehovah O, Go auga wo pei tea viragi‐liliuakiana; P̃a mari pau ki naaleatia aginami maga, Euga moro dakiusi ragi ni tuai.

²²Mase ku pe tip̃adoa gami, Ku pe maeto p̃arua dip̃a gami, kite?