Read Nguna Togoa Etafe North ESEKIEL 1 Bible Online

ESEKIEL 1 - Nguna Togoa Etafe North bible

ESEKIEL 1

¹Go e pakilina natau kerualima dolu, atelagi kevati kakana, nakup̃a kelima ni atelagi wanogoe, ragi waina a doko m̃aleoputo ni tea viragilua‐pavakotoana maga nadigi ni noaisara Kebar, naga nakoroatelagi maga eu pamawota, go a punusi navunusiana maga ki Sup̃e.

²Doko nakup̃a kelima ni atelagi, waina e pei natau kelima ni naviragi‐luapavakotoana ki nawota Yehoiakin,

³Navasaana ki Yehovah e umai paki Esekiel tea viri, natu ni Busi, doko navanua ki naka ni Kaldea nadigi ni noaisara Kebar; go nam̃elearu ni Yehovah e doko asa tokora wanogoe.

⁴Go kinau a leo, go kuga leo, suitaviro sikai e m̃elu north umai, napopouru warua sikai, e pilake nakapu waina e do pila pitip̃atip̃a, go nalagaana sikai e dalivirigoro e, go tea waina e m̃elu m̃aleoputo kakana, e pei tea vunusiana e dakiusi brass lidalida, e m̃elu m̃aleoputo ni nakapu wanogoe.

⁵Go tea waina e m̃elu m̃aleoputo kakana e pei tea vunusiana e dakiusi nalo mauri pati. Go natakiusiana kakada eu dakiusi natakiusiana ni naatam̃oli.

⁶Go eu pilake narae pativati sarasara ra, go eu peani nalivaru pativati sarasara ra.

⁷Go natuada maga eu leana; go nam̃ele natuada e dakiusi nam̃ele natua ni kau natuna sikai: go eu dakiusi brass waina e lidalida dapala e pe vei tea veniana upu ni nakapu.

⁸Go nam̃elearuda eu dakiusi nam̃elearu ni naatam̃oli sikai, eu doko etano ni nalivaruda nap̃irikiada pati: go nara pati wanogoe naraeda go nalivaruda eu dapala nea:

⁹Nalivaruda maga eu dum̃ada dip̃a dogo ra; eu da maradoa mau ragi waina eu pano; eu leana pano sikasikai sarasara ra paki kivea.

¹⁰Go naraeda eu pei tea vunusiana eu dakiusi narae ni naatam̃oli sikai; go nara pati wanogoe eu sikasikai peani narae ni laion sikai taleva ni matua sarasara ra; go nara pati wanogoe eu sikasikai peani narae ni oks sikai taleva ni mawiri sarasara ra; go nara pati wanogoe eu sikasikai peani narae ni ikila sikai sarasara ra.

¹¹Go naraeda go nalivaruda maga eu pamawota elagi; go nalivaruda duarua sarasara ra eu dum̃ada dip̃a dogo ra, go nalivaruda duarua eu dum̃ada kovagoro nap̃atokoda.

¹²Go eu leana pano paki kivea sikasikai sarasara ra: tokora waina naatana e naga euga vaki asa, tokora wanogoe nara eu paki asa pano; eu da maradoa mau ragi waina eu do pano.

¹³Go nalo mauri maga wanogoe eu pei tea vunusiana eu dakiusi nam̃elevara maga ni nakapu waina e do soro, eu dakiusi nasulu maga ni nakapu; e do sake go e do siwo namawota ni nalo mauri maga wanogoe: go nakapu wanogoe e marama p̃ia, go navila e do pila m̃elu nakapu wanogoe.

¹⁴Go nalo mauri maga wanogoe eu sava pano go eu sava liliu, go navunusiana kakada e dapala nalagaana ni navila.

¹⁵Go a leo punusi nalo mauri maga wanogoe, go p̃a leo, tea taliepu sikai e doko natano nap̃irikia ni nalo mauri maga wanogoe sikasikai sarasara ra.

¹⁶Go tea taliepu maga wanogoe go nawosiana kakada eu pei tea vunusiana eu dapala berul sikai: go nara pati wanogoe eu pitotowo: go navunusiana kakada go nawosiana kakada e dapala e pe vei tea taliepu sikai nap̃alau ni tea taliepu sikai.

¹⁷Ragi waina eu do pano, eu pano paki te matele adeada sikai waina naraeda eu pe leo paki asa: eu da maradoa mau ragi waina eu do pano.

¹⁸Go tea tasoki kakada maga eu p̃arua go eu pei tea mataukiana; go nara pati wanogoe tea tasoki kakada maga eu peani namatada maga dalivirigoro ra.

¹⁹Go ragi waina nalo mauri maga wanogoe eu do pano, tea taliepu maga nara ma eu do pano nap̃irikiada: go ragi waina nalo mauri maga wanogoe eu do pei tea tapeana sake m̃elu dua ki natano, tea taliepu maga nara ma eu do sake.

²⁰Tokora waina naatana e naga euga vaki asa pano, tokora wanogoe eu paki asa pano; nalakena naata ni nalo mauri wanogoe e doko tea taliepu maga:

²¹Ragi waina nalo mauri maga wanogoe eu pano, tea taliepu maga nara ma eu pano; go ragi waina nalo mauri maga wanogoe eu du dorogo, tea taliepu maga nara ma eu du dorogo; go ragi waina nalo mauri maga wanogoe eu pei tea tapeana sake, tea taliepu maga nara ma eu sake: nalakena naata ni nalo mauri wanogoe e doko tea taliepu maga.

²²Go tea waina e pei tea vunusiana e dapala namalopa sikai, e doko elagi ki nap̃au ni nalo mauri wanogoe, e dakiusi krustalo mataukiana, e pei tea vitosiana dap̃augoro nap̃auda.

²³Go etano ni namalopa wanogoe, nalivaruda maga eu pei tea vitosiana pano, eu dum̃ada dip̃a dogo ra, go nalivaruda duarua ero kovagoro nap̃atokoda sikasikai sarasara ra.

²⁴Go ragi waina eu do pano, a dogo nasaruruana ni nalivaruda e dakiusi nasaruruana ni noai warua maga, dakiusi nadaleo ni Tea Kasua Mau, nasaruruana sikai ni namarip̃araiana dakiusi nasaruruana ni taua warua sikai: ragi waina eu du dorogo, eu doro nalivaruda maga.

²⁵Go nadaleo sikai e doko elagi ni namalopa wanogoe waina e dap̃augoro nap̃auda: ragi waina eu du dorogo, eu doro nalivaruda maga.

²⁶Go tea waina e pei tea vunusiana e dakiusi malo tasake sikai e doko elagi ni namalopa waina e dap̃augoro nap̃auda, e dakiusi vatu safir sikai: go tea waina e pei tea vunusiana e dakiusi naatam̃oli sikai e sakesaake doko tea waina e pei tea vunusiana e dakiusi malo tasake.

²⁷Go a punusi a e lidalida dapala brass, dapala navunusiana ni nakapu vavaga nap̃alauna go dalivirigoro e, pae tea waina e pei tea vunusiana e dapala namalona go pakilagi; go pae tea waina e pei tea vunusiana e dapala namalona go pakitano, a punusi a e dapala e pe vei nakapu vavaga, go namaramalagaana e dalivirigoro e.

²⁸Go navunusiana ni namaramalagaana waina e doko daliviri, e dapala navunusiana ni asoara waina e doko napopouru naaleatia ni usa. Tea wanogoe e pei tea vunusiana e dakiusi nasamasamaana ni Yehovah. Go ragi waina a punusi a, a dowo dap̃olosiwo, go a dogo nadaleo ni tea sikai waina e pasa.