Read Nguna Togoa Etafe North ESEKIEL 10 Bible Online

ESEKIEL 10 - Nguna Togoa Etafe North bible

ESEKIEL 10

¹Go a leo, go p̃a leo, tea waina e pei tea vunusiana e dapala vatu safir sikai e pakilina namalopa waina e doko elagi ki nap̃au ni kerub maga, e pei tea vunusiana e dakiusi malo tasake sikai.

²Go e pasa paki naatam̃oli waina e pei tea sugoroana ki linen, e naga, P̃a vaki namawota ni tea taliepu maga waina eu do dalitaliepu, etano ki kerub maga, po dape lua nam̃elevara maga ni nakapu m̃elu namawota ni kerub maga, nam̃elearum̃a dua eroga wo pura asa, go p̃a meseura ki da paki natokoana. Go e pano doko namatagu.

³Go kerub maga wanogoe eu lawodu taleva ni matua ni nasum̃a, ragi waina naatam̃oli wanogoe e pano; go napopouru e pakavuro roara ni m̃aleoputo.

⁴Go nasamasamaana ni Yehovah e sake pa dua ki kerub maga, po lawodu elagi ki tea tuasila ni nasum̃a; go nasum̃a e pura ki napopouru wanogoe, go roara e pura ki nalagaana ni nasamasamaana ni Yehovah.

⁵Go nasaruruana ni kerub maga nalivaruda maga e pei tea rogoana roara ni katama, e dakiusi nadaleo ni Sup̃e Tea Kasua Mau ragi waina e pasa.

⁶Go e pakilina, ragi waina e dip̃aki naatam̃oli waina e pei tea sugoroana ki linen, doko do naga, P̃a tape lua nakapu vavaga m̃elu namawota ni tea taliepu maga waina eu do dalitaliepu, m̃elu namawota ni kerub maga, e pakilina naga e pano, po lawodu nap̃irikia ni tea taliepu sikai.

⁷Go kerub sikai e sai ki nam̃elearuna m̃elu namawota ni kerub maga paki nakapu waina e doko namawota ni kerub maga, po dape kovai a, po doropusi a paki nam̃elearu ni naatam̃oli waina e pei tea sugoroana ki linen, go nae e dape a po dave pano.

⁸Go tea waina e pei tea vunusiana e dapala nam̃elearu ni naatam̃oli sikai, e pakilina ki kerub maga etano ki nalivaruda maga.

⁹Go a leo, go p̃a leo, tea taliepu pati nap̃irikia ni kerub maga, tea taliepu sikai nap̃irikia ni kerub sikai, sikasikai sarasara ra: go e pei tea vunusiana naga tea taliepu maga wanogoe eu dapala berul sikai.

¹⁰Go nalo ni navunusiana kakada, nara pati wanogoe eu pitotowo, e dapala e pe vei tea taliepu sikai nap̃alau ni tea taliepu sikai.

¹¹Ragi waina eu do pano, eu pano paki te matele adeada sikai waina naraeda eu leo paki asa: eu da maradoa mau ragi waina eu pano, ma eu dausi nap̃auda paki tokora waina e leo paki asa; eu da maradoa mau ragi waina eu pano.

¹²Go tea tasoki kakada maga, go tea tip̃asoki kakada maga, go tea taliepu maga eu peani namatada maga dalivirigoro ra, nara pati wanogoe.

¹³Go nalo ni tea taliepu maga wanogoe, eu pei tea sosoana ki tea taliepu maga waina eu do dalitaliepu, go kinau a dogo e.

¹⁴Go eu pilake narae pativati sarasara ra: go narae vea e pei narae ni kerub, go narae kerua e pei narae ni naatam̃oli sikai, go narae ketolu e pei narae ni laion sikai, go kevati e pei narae ni ikila sikai.

¹⁵Go kerub maga wanogoe eu sake pakilagi: tea wanogoe e pei nalo mauri waina a punusi a nadigi ni noaisara Kebar.

¹⁶Go ragi waina kerub maga eu pano, tea taliepu maga nara ma eu pano nap̃irikiada: go ragi waina kerub maga eu sike nalivaruda maga naga euga sake pakilagi m̃elu dua ki natano, tea taliepu maga eu da maradoa m̃elu dua ki nap̃irikiada pano mau.

¹⁷Ragi waina kerub maga eu du dorogo, tea taliepu maga nara ma eu du dorogo, go ragi waina kerub maga eu sake pakilagi, tea taliepu maga nara ma eu sake sikoti ra: nalakena naata ni nalo mauri wanogoe e doko tea taliepu maga.

¹⁸Go nasamasamaana ni Yehovah e dave m̃elu dua ki elagi ki tea tuasila ni nasum̃a, po pano po lawodu elagi ki kerub maga.

¹⁹Go kerub maga eu sike nalivaruda maga, po sake m̃elu dua ki natano naga euga vano, go tea taliepu maga nara ma eu sake pakilagi, go kinau a punusi a: go eu du namata duaduru ni namata‐pua paki elo sake ni nasum̃a ki Yehovah; go nasamasamaana ni Sup̃e ki Israel e dap̃augoro ra.

²⁰Tea wanogoe e pei nalo mauri waina a punusi a e doko etano ki Sup̃e ki Israel nadigi ni noaisara Kebar; go a atae naga nara eu pei kerub maga.

²¹Eu pilake narae pativati sarasara ra, go eu peani nalivaru pativati sarasara ra, go tea waina e pei tea vunusiana e dakiusi nam̃elearu maga ni naatam̃oli sikai, e doko etano ki nalivaruda maga sikasikai sarasara ra.

²²Go nalo ni naraeda, eu pei tea vunusiana naga eu pei narae maga waina a punusi ra nadigi ni noaisara Kebar, go eu leana pano, eu da maradoa mau.