Read Nguna Togoa Etafe North ESEKIEL 11 Bible Online

ESEKIEL 11 - Nguna Togoa Etafe North bible

ESEKIEL 11

¹Go naatana e dape au sake, po piragi au umai paki namata‐pua ni taleva ni elo sake ni nasum̃a ki Yehovah, waina e leo paki elo sake: go p̃a leo, naatam̃oli rualima dua tamate lima eu doko namata duaduru ni namata‐pua wanogoe; go a punusi Yaasaniah natu ni Assur, go Pelatiah natu ni Benaiah, tea maraki maga ki narei, ero doko m̃aleoputo kakada.

²Go Yehovah e noa ki nau, e naga, Naatam̃oli natuna, tea maga waia eu pei naatam̃oli maga waina eu do midoaki p̃ai namarinaleotageleana, go waina eu do pitua ki namidoakip̃otaeana sa natokoana waia:

³Waina eu naga, Tuga wo da moro davagi nasum̃a maga ragi kiki, kite? Natokoana waia e pei lasa veniana, go nigida tu pei nap̃okasi.

⁴Nalakena tea wanogoe, p̃a veanoasai dip̃a ra, naatam̃oli natuna O, p̃a veanoasai.

⁵Go Naatana ni Yehovah e puvua umai doko au, go e noa ki nau, e naga, P̃a vasa po naga, Yehovah e noa dapala nea, e naga, Nimu ku noa dapala nogoe, nasum̃a ni Israel O; nalakena kinau a atae tea waina e umai paki namidodoana animu.

⁶Nimu ku mari punue naatam̃oli laapa natokoana waia, go ku pakavuro napua kakana maga ki tea maripunueana maga.

⁷Nalakena tea wanogoe Yehovah Sup̃e e noa dapala nea, e naga, Tea maripunueana animu maga waina ku mari ra eu dowo one m̃aleoputo kakana, nara eu pei nap̃okasi, go natokoana waia e pei lasa veniana: ma nimu kuga wo pei tea viragi‐lua‐ana m̃elu dua ki m̃aleoputo kakana pano.

⁸Ku matau ki lova; go kinau aga wo mari lova ega wo pa parati ki mu, Yehovah Sup̃e e noa e.

⁹Go aga wo piragi lua mu m̃elu dua ki m̃aleoputo kakana, po pitua ki mu paki nam̃elearu ni tea ni nalauna p̃ota maga, go aga wo mari navasap̃otaeana maga m̃aleoputo kakamu.

¹⁰Kuga wo dowo ki lova; kinau aga wo pasap̃otae mu kokoi ni Israel; go kuga wo atae naga kinau a pei Yehovah.

¹¹Natokoana waia ega wo da pei lasa veniana animu mau, go nimu kuga wo da pei nap̃okasi m̃aleoputo kakana mau; kinau aga wo pasap̃otae mu kokoi ni Israel;

¹²Go kuga wo atae naga kinau a pei Yehovah: nalakena ku da surata natawonakiana aginau maga mau, go ku da mari pataka ni navasap̃otaeana aginau maga mau, ma ku mari pataka ni navasaparati‐kiana maga ki nalauna maga waina eu dalivirigoro mu.

¹³Go e pakilina, ragi waina a peanoasai, naga Pelatiah natu ni Benaiah e mate. Go a dowo dap̃olosiwo, po pioso ki nadaleo kasua sikai, po naga, Yehovah Sup̃e O! P̃a wo mari puoli ki puti namagovai ni Israel waina eu pei tea toropusiana doko, kite?

¹⁴Go navasaana ki Yehovah e umai paki nau,

¹⁵po naga, Naatam̃oli natuna, naatatoko maga ni Yerusalem eu noa ki taim̃a maga, taim̃a maga tea ni m̃aladigi ki‐go, go ki nasum̃a mamau ni Israel tea mamau puti kakada, eu naga, Nimu ku doko uvea ki Yehovah; navanua waia e pei tea vituakiana paki gami naga ega vei tea veaniana sikai:

¹⁶Nalakena tea wanogoe p̃a naga, Yehovah Sup̃e e noa dapala nea, e naga, Kinau a disua ki lua ra pano paki uvea m̃aleoputo ni nalauna maga, go a daperavera ki da usuraki navanua maga, ma aga wo madeada pei tokora ni nasavasiliana sikai ragi kiki doko navanua maga waina eu paki ara pano.

¹⁷Nalakena tea wanogoe p̃a naga, Yehovah Sup̃e e noa dapala nea, e naga, Kinau aga wo saisai ki mu m̃elu narei maga, po piragi saisai ki mu m̃elu navanua maga waina ku pei tea taperaverakiana usuraki ara, go aga wo dua mu navanua ni Israel.

¹⁸Go euga wo umai paki asa, go euga wo mari puoli ki naleo karaikitaana kakana maga mamau puti, go ki tea mamaragokiana kakana maga mamau puti m̃elu dua ki nia pano.

¹⁹Go aga wo dua ra p̃op̃o sikai maau, go aga wo mari pau ki naatana laketoko nap̃alauda; go aga wo dape lua p̃op̃o ni vatu m̃elu dua ki nap̃okasida, go aga wo dua ra p̃op̃o sikai ni nap̃okasi:

²⁰Naga euga surata natawonakiana aginau maga, po pavaigoro navasa‐parati‐kiana aginau maga, po mari pataka da: go euga wo pei narei aginau, go kinau aga wo pei Sup̃e adeada.

²¹Ma nalo ni tea maga waina nap̃op̃oda e do surata dausi nap̃op̃o ni naleo karaikitaana adeada maga go tea mamaragokiana adeada maga, kinau aga wo liliua ki napua adeada ega wo liliu paki nap̃auda, Yehovah Sup̃e e noa e.

²²Go kerub maga eu sike nalivaruda maga, go tea taliepu maga eu doko nap̃irikiada; go nasamasamaana ni Sup̃e ki Israel e dap̃augoro ra.

²³Go nasamasamaana ni Yehovah e sake m̃elu dua ki m̃aleoputo ni natokoana po pakilagi, po lawodu nam̃asua ni tava waina e doko taleva ni elo sake ni natokoana.

²⁴Go naatana e dape au sake, po piragi au doko navunusiana maga ki Sup̃e paki Kaldea pano punusi tea maga ni naviragi‐luapavakotoana. Go navunusiana waina a punusi a e m̃elu dua ki nau po sake pano.

²⁵Go a pasa paki tea maga ni naviragi‐lua‐pavakotoana, po noa ki da ki naleo maga mamau puti waina Yehovah e pisei ki nau asa.