Read Nguna Togoa Etafe North ESEKIEL 12 Bible Online

ESEKIEL 12 - Nguna Togoa Etafe North bible

ESEKIEL 12

¹Navasaana ki Yehovah e moro umai paki nau,

²po naga, Naatam̃oli natuna, ku doko m̃aleoputo ni nasum̃a vei p̃auluulu sikai, waina eu pilake namatada naga euga vunusi, ma eu da punusi mau, waina eu pilake nadaligada naga euga rogo, ma eu da dogo mau; nalakena eu pei nasum̃a vei p̃auluulu sikai.

³Nalakena tea wanogoe, nigo naatam̃oli natuna, p̃a marisokisoki naloriki anigo maga dakiusi naloriki maga ki tea viragi‐lua‐pavakotoana sikai, go p̃a surata pano aleati doko namatada; go p̃a m̃elu dua ki kiam̃a pano po paki tokora p̃ota sikai doko namatada: mase eu pe wo midoakiusiusi a po atae naga eu pei nasum̃a vei p̃auluulu sikai.

⁴Go p̃a viragi lua naloriki anigo maga aleati doko namatada dapala tum̃ana ki tea viragi‐lua‐pavakotoana: go p̃a tum̃am̃a m̃elu pano ragi melu doko namatada, dakiusi naatam̃oli waina e paki naviragi‐lua‐pavakotoana pano.

⁵P̃a kili darave p̃aaka namatada, go p̃a tave m̃elu asa po pano.

⁶P̃a tapetape tum̃ana anigo napaum̃a doko namatada, po dape a pano p̃ogi; p̃a kalutigoro namatam̃a, naga p̃a wo da punusi navanua mau: nalakena kinau a lawo ki‐go ku pei navaivaiana sikai agi nasum̃a ni Israel.

⁷Go a mari dapala waina a pei tea tip̃akiana asa: a marisokisoki naloriki aginau maga aleati, e dapala tum̃ana ki tea viragi‐lua‐pavakotoana sikai, go ragi melu a kili darave p̃aaka ki nam̃elearugu; a dape tum̃ana aginau p̃ogi, po ova e doko napaugu, po surata pano doko namatada.

⁸Go malip̃ogi navasaana ki Yehovah e umai paki nau,

⁹po naga, Naatam̃oli natuna, nasum̃a ni Israel, nasum̃a vei p̃auluulu waina, eu da noa ki‐go naga ku do mari nasava, kite?

¹⁰P̃a noa ki da, p̃a naga, Yehovah Sup̃e e noa dapala nea, e naga, Naveanoasaiana waia e pei nalo ni tea maraki ni Yerusalem, go nalo ni tea mamau puti ni nasum̃a ni Israel waina eu doko asa doko.

¹¹P̃a naga, Kinau a pei navaivaiana kakamu sikai: dapala waina kinau a mari a, dapala nogoe ega wo pei tea mariana paki da: euga wo pei tea kopasiluaana pano, euga wo paki naviragi‐luapavakotoana.

¹²Tea maraki adeada ega wo dapetape tum̃ana aneana napauna doko namaligo, go ega wo surata pano: ega wo kili darave p̃aaka po pae asa pano: ega wo kalutigoro naraena, naga ega wo da leo punusi navanua mau.

¹³Kinau aga wo p̃elesa ki vaivai aginau, go ega wo pei tea vuagoroana ki vaivai aginau: go aga wo piragi a umai paki Babelon, paki navanua ki naka ni Kaldea, ma ega wo da punusi a mau; ma ega wo mate tokora wanogoe.

¹⁴Go aga wo daperavera paki sara nalagi ki tea mamau puti waina eu doko dalivirigoro e, tea silae aneana maga go taua ni navakalo aneana maga mamau puti; go aga wo sai lua lova edaku ki da.

¹⁵Go euga wo atae naga kinau a pei Yehovah, ragi waina aga wo daperavera ki da usuraki nalauna maga, po sapura ki da duaduru navanua maga.

¹⁶Ma aga wo doropusi te seara kakada euga wo pei tea mautiana m̃elu dua ki lova, m̃elu dua ki navitoloana, go m̃elu dua ki nasasanaana sa; naga euga noasai tea mamaragokiana adeada maga mamau puti m̃aleoputo ni nalauna maga waina euga wo paki ara pano; go euga wo atae naga kinau a pei Yehovah.

¹⁷Go navasaana ki Yehovah e moro umai paki nau,

¹⁸po naga, Naatam̃oli natuna, p̃a kani navinaga anigo naruruuruana, po munu noai anigo nasaram̃akotoana go namatakuana;

¹⁹Go p̃a noa ki narei ni navanua, p̃a naga, Yehovah Sup̃e e noa dapala nea nalo ni naatatoko maga ni Yerusalem go ni navanua ni Israel, e naga, Euga wo gani navinaga adeada ki namatakuana, po munu noai adeada ki nasaram̃akotoana, nalakena navanua adeada ega wo pei tea awosiluaana ki tea mamau puti waina eu doko asa, nalakena namaripavakotoana ki tea mamau puti waina eu doko asa doko.

²⁰Go natokoana maga waina naatam̃oli maga eu doko ara euga wo makaka, go navanua ega wo pei maso maladi sikai; go kuga wo atae naga kinau a pei Yehovah.

²¹Go navasaana ki Yehovah e umai paki nau,

²²po naga, Naatam̃oli natuna, nasava e pei naluluakia waia nalo ni navanua ni Israel, waina e naga, Naaleatia maga eu sokari naaleatia maga, go sara naveanoasaiana eu dika?

²³Nalakena tea wanogoe p̃a noa ki da, p̃a naga, Yehovah Sup̃e e noa dapala nea, e naga, Aga wo mari naluluakia waia ega makoto, go euga wo da moro noa naga e pei naluluakia sikai Israel mau; ma p̃a noa ki da, p̃a naga, Naaleatia maga eu pei m̃aladigi, go sara naveanoasaiana euga wo pei tea vakavuroana.

²⁴Nalakena te navunusiana p̃alo, kite te naveanoasaiana sorosoro ega wo da moro doko nasum̃a ni Israel mau.

²⁵Nalakena kinau a pei Yehovah; kinau aga wo pasa, go navasaana waina aga wo pasa asa, ega wo pei tea vakavuroana; ega wo da moro daliali mau: nalakena doko naaleatia animu maga, nasum̃a vei p̃auluulu O, aga wo pasa navasaana wanogoe, go aga wo mari a, Yehovah Sup̃e e noa e.

²⁶Go navasaana ki Yehovah e moro umai paki nau,

²⁷po naga, Naatam̃oli natuna, p̃a leo, nara ni nasum̃a ni Israel eu naga, Naveanoasaiana waina e punusi a, e pei tea ni naaleatia laapa waina euga wo umai, go e do peanoasai nalo ni ragi maga waina eu doko uvea.

²⁸Nalakena tea wanogoe p̃a noa ki da, p̃a naga, Yehovah Sup̃e e noa dapala nea, e naga, Te seara ni navasaana aginau ega wo da moro daliali mau, ma navasaana waina aga wo pasa asa, ega wo pei tea vakavuroana, Yehovah Sup̃e e noa e.