Read Nguna Togoa Etafe North ESEKIEL 14 Bible Online

ESEKIEL 14 - Nguna Togoa Etafe North bible

ESEKIEL 14

¹Go tea matua maga ni Israel te seara kakada eu rumai punusi au, go eu doko natano naraegu.

²Go navasaana ki Yehovah e umai paki nau,

³po naga, Naatam̃oli natuna, naatam̃oli maga waia eu sike lawo ki idolo adeada maga doko nap̃op̃oda, go eu doropusi tea tapilagonaana ni namarinaleotageleana adeada kivea ki naraeda: e pei tea wia naga kinau aga vei tea vusuusukiana pae ara, kite?

⁴Nalakena tea wanogoe p̃a vasa paki da, go p̃a noa ki da, p̃a naga, Yehovah Sup̃e e noa dapala nea, e naga, Sara naatam̃oli ni nasum̃a ni Israel waina eu sike lawo ki idolo adeada maga doko nap̃op̃oda, go waina eu doropusi tea tapilagonaana ni namarinaleotageleana adeada kivea ki naraeda, go eu rumai punusi profeta; kinau Yehovah aga wo dum̃agu pasadara ra nalakena nalaapaana ni idolo adeada maga;

⁵Naga aga vuasoki nap̃op̃o ni nasum̃a ni Israel, waina eu doropusi au nalakena idolo adeada maga.

⁶Nalakena tea wanogoe p̃a noa ki nasum̃a ni Israel, p̃a naga, Yehovah Sup̃e e noa dapala nea, e naga, Kuga midoakidoa, po dum̃amu maradoa m̃elu dua ki idolo animu maga; go kuga roa naraemu pa dua ki tea mamaragokiana animu maga mamau puti.

⁷Nalakena sara naatam̃oli ni nasum̃a ni Israel, kite ni tea ni nalauna p̃ota maga waina eu m̃enaki doko Israel, waina eu doropusi au po sike lawo ki idolo adeada maga doko nap̃op̃oda, po doropusi tea tapilagonaana ni namarinaleotageleana adeada kivea ki naraeda, po umai punusi profeta naga euga vusuusu ki nia nalo kakagu; kinau Yehovah aga wo dum̃agu pasadara ra:

⁸Go aga wo lawo ki naraegu ega tip̃a naatam̃oli wanogoe, go aga wo mari a ega vei tea ni nasaram̃akotoana sikai, go ega vei navaivaiana sikai go naluluakia sikai, go aga wo daelua e m̃elu dua ki m̃aleoputo ni narei aginau; go kuga wo atae naga kinau a pei Yehovah.

⁹Go waina profeta e pe vei tea surueana go e pe vasa ki te navasaana sikai, e pe vei kinau Yehovah waina a pe surue profeta wanogoe, go aga wo sai ki nam̃elearugu dip̃a e, go aga wo mari puoli ki nia m̃elu dua ki m̃aleoputo ni narei aginau Israel.

¹⁰Go eroga wo dapetape navaratiana adeada: navaratiana ki profeta ega wo dakiusi navaratiana ki tea waina e pusuusu ki nia;

¹¹Naga nasum̃a ni Israel ega ta moro sasap̃o m̃elu dua kinau pano mau, kite moro dum̃ada mari ra euga vei tea mamaragokiana ki natapiriana adeada maga mau; ma naga euga vei narei aginau, go kinau aga vei Sup̃e adeada, Yehovah Sup̃e e noa e.

¹²Go navasaana ki Yehovah e umai paki nau, po naga,

¹³Naatam̃oli natuna, navanua sikai e pe mari naleo sa dip̃a au, e pe mari nasorosoroana paki nau, go kinau a pe sai ki nam̃elearugu dip̃a e, po mari p̃ori tiko ni navinaga kakana, po dip̃aki lua navitoloana paki asa, po daelua m̃elu dua ki nia naatam̃oli go nalo tuavati;

¹⁴Go naatam̃oli dolu waia, Noah, Daniel, go Yob, eu pe toko asa doko, namauriana ni naatam̃oli dolu wanogoe eu sikida eu pe mariatae pei tea vualuaana nalakena namarinaleoleanaana adeada, Yehovah Sup̃e e noa e.

¹⁵Kinau a pe mari nalo mila maga eu pe surata duaduru navanua wanogoe, go eu pe mari sa ki nia, dapala waina e pe vei maso maladi doko, dapala waina te naata sikai e pe ta mariatae surata duagoto asa mau nalakena nalo mila maga wanogoe;

¹⁶Kinau a mauri, Yehovah Sup̃e e noa e, go naatam̃oli dolu wanogoe eu pe toko asa doko, ma eu pe ta mariatae pualua piakirikiri naanoai kite piakirikiri nagoroi mau; nara sikida eu pe mariatae pei tea vualuaana, ma navanua e pe wo pei maso maladi doko.

¹⁷Kite a pe viragi lova sikai umai dip̃a navanua wanogoe, po naga, Lova, p̃a vano usuraki navanua; go a pe taelua m̃elu dua ki nia naatam̃oli go nalo tuavati;

¹⁸Kinau a mauri, Yehovah Sup̃e e noa e, go naatam̃oli dolu wanogoe eu pe toko asa doko, ma eu pe ta mariatae pualua piakirikiri naanoai kite piakirikiri nagoroi mau, ma nara sikida eu pe mariatae pei tea vualuaana.

¹⁹Kite a pe tip̃aki lua nasasanaana sa sikai paki navanua wanogoe, po daki lua namaritausuana aginau asa, po daelua m̃elu dua ki nia naatam̃oli go nalo tuavati:

²⁰Kinau a mauri, Yehovah Sup̃e e noa e, go Noah, Daniel, go Yob eu pe toko asa doko, ma eu pe ta mariatae pualua piakiki naanoai kite piakiki nagoroi mau; nara sikida eu pe mariatae pei tea vualuaana pae namarinaleoleanaana adeada.

²¹Nalakena Yehovah Sup̃e e noa dapala nea, e naga, Ma ega wo p̃arua do liu ragi waina aga wo dip̃aki lua navasap̃otaeana madaga pati aginau dip̃a Yerusalem, lova, go navitoloana, go nalo mila maga, go nasasanaana sa, naga aga taelua m̃elu dua ki nia naatam̃oli go nalo tuavati!

²²Ma p̃a leo, namagovai sikai ega wo pei tea mautiana asa waina ega wo pei tea viragiana m̃elu asa pano, piakirikiri naanoai maga go piakirikiri nagoroi maga: p̃a leo, euga wo m̃elu pano punusi mu, go kuga wo punusi napua adeada go natomariana adeada maga: go kuga wo pei tea vasapakavakaleana nalo ni nasaana wanogoe waina a mari a e pakilina ki Yerusalem, nalo ni tea mamau puti waina a piragi ra umai dip̃a e.

²³Go euga wo pasa pakavakale mu, ragi waina kuga wo punusi napua adeada, go natomariana adeada maga: go kuga wo atae naga a da mari tea mamau puti wanogoe waina a mari ra asa, nalakena e dika, Yehovah Sup̃e e noa e.