Read Nguna Togoa Etafe North ESEKIEL 16 Bible Online

ESEKIEL 16 - Nguna Togoa Etafe North bible

ESEKIEL 16

¹Go navasaana ki Yehovah e moro umai paki nau, po naga,

²Naatam̃oli natuna, p̃a mari Yerusalem naga ega tum̃ana atae tea mamaragokiana kakana maga,

³Go p̃a naga, Yehovah Sup̃e e noa dapala nea paki Yerusalem, e naga, Navakilinaana anigo go navanua atatoko anigo e pei navanua ki naka ni Kanaan; tamam̃a e pei tea ni naworawora ni Amor, go p̃ilam̃a e pei tea ni naworawora ni Heth.

⁴Go nalo ni navakilinaana anigo, doko naaleatia waina ku pakilina asa, naputom̃a e da pei tea tae‐kotoviana mau, go eu da pure ko ki noai mau naga euga mari ko p̃a tautau; eu da salasala ko ki natasimena mau, kite pivisi ko ki nakulukulu mau.

⁵Te namata sikai e da dodomi ko mau, naga ega mari naleo maga wanogoe te sikai kakada paki‐go, naga ega maritadodomi ko; ma ku pei tea nadikiana paki etaku, nalakena ku pei tea mamaragokiana naaleatia waina ku pakilina asa.

⁶Go ragi waina a surata liu ko, po punusi ko ku malulu nadam̃a, a noa ki‐go, a naga, P̃a mauri, doko nadam̃a.

⁷A pakale ko, go ku atum̃aki dakiusi tea lawoana sikai ni vanua, go ku disu po p̃arua, po pei naatara; nasusum̃a ero pakilina, go nalolu ni nap̃aum̃a e parau; ma ku m̃alam̃ala doko, po dika ki sugoro.

⁸Go ragi waina a surata liu ko, po leo punusi ko, p̃a leo, a punusi naga e manigo pei natau ni nalakiana; go a p̃elesa ki tea suniana aginau dap̃augoro ko, po kulutigoro nam̃alam̃alaana anigo: go a pasasokisoki paki‐go, po mari navasasokiana sikai paki‐go, go ku po pei aginau, Yehovah Sup̃e e noa e.

⁹Go a pure ko ki noai; a sarue lua nadam̃a m̃elu dua ki‐go, go a puvurai ki‐go ki naroro.

¹⁰Go a sugoro ko ki sugoro ni nawosiana ki tea turi‐midiria, po dua ko nam̃elevasiana maga ni nawili ni siil, go a dasoki ko ki linen wia, po kulutigoro ko ki silk.

¹¹Go a dekei ki‐go ki naleo maga ni narekeikiana, go a sara ki lela maga narum̃a maga go ki namori sikai nanoam̃a.

¹²Go a sara ki rig sikai nadigi ni nagisum̃a, go tea vakadaliga maga nadaligam̃a maga, go a sawa ki tagotop̃au leom̃atakiana sikai nap̃aum̃a.

¹³Ku pei tea rekeikiana ki kold go ki silver; go tea suniana anigo e pei tea ni linen wia, go ni silk, go ni nawosiana ki tea turi‐midiria; ku gani nam̃aladua ni whiit, go honi, go naroro; go ku pei raewia liu, go ku pei tea tapeana sake paki navei‐nawota‐ana.

¹⁴Go narogoana nalo kakam̃a e pano usuraki nalauna maga nalakena navei‐raewia‐ana anigo; nalakena e p̃ialua, nalakena natatap̃auana waina a sawa ki nia ako, Yehovah Sup̃e e noa e.

¹⁵Ma nigo ku dum̃am̃a pavatu naveiraewia‐ana anigo, go ku maripele nalakena narogoana nalo kakam̃a, po daki lua namasausaraana anigo maga paki sara naata waina eu surata liu pano; e pei adeada.

¹⁶Go ku dape kovai tea suniana anigo, po dum̃am̃a manigo mari tokora vakilagi maga asa, waina eu pei tea rekeikiana ki tea oraorana visarasara maga, go ku maripele tokora wanogoe: tea waina e dakiusi a e da pea pei tea vunusiana sala vea mau, go ega wo da moro pei tea vunusiana sala edaku mau.

¹⁷Go ku dape naleo wia maga ni narekeikiana ni kold aginau go ni silver aginau, waina a dua ko asa, po dum̃am̃a manigo mari nunu maga ni naatam̃oli po maripele ara;

¹⁸Go ku dape tea suniana anigo maga ni nawosiana ki tea turi‐midiria, po kulutigoro ra asa, go ku lawo ki naroro aginau go tea ni nap̃o wia aginau naraeda.

¹⁹Go navinaga aginau waina a dua ko asa, nam̃aladua ni whiit, go naroro, go honi, waina a pagani ko asa, ku lawo ki nia naraeda naga ega vei tea ni nap̃o lolo, Yehovah Sup̃e e noa e.

²⁰Go ku dape natum̃a naanoai maga go natum̃a nagoroi maga, waina ku maginau dape ra, go ku pitua ki da paki tea maga wanogoe naga euga vei navituaana tap̃arakiana maga. Namaripeleana anigo maga eu pei tea m̃oli,

²¹Naga ku mari punue natugu maga, po pitua ki da eu pei navituaana tap̃arakiana sikai paki da, kite?

²²Go doko tea mamaragokiana anigo maga mamau puti go namaripeleana anigo maga, ku da midoaki naaleatia maga ni navei‐naatara‐ana anigo mau, ragi waina ku m̃alam̃ala doko, po dika ki sugoro, go ku malulu nadam̃a.

²³Go e pakilina edaku ki nasigisigileoana anigo maga mamau puti, (ai, ai ki‐go! Yehovah Sup̃e e noa e,)

²⁴E pakilina naga ku manigo davagi tokora tapu sikai, go ku manigo davagi tokora vakilagi sikai sara napua maga ni natokoana.

²⁵Ku davagi tokora vakilagi anigo nap̃au ni sara napua, go ku mari navei‐raewia‐ana anigo e pei tea mamaragokiana sikai, go ku p̃otae natuam̃a paki sara naata waina eu liu pano, po maripele p̃arua liu.

²⁶Go ku moro maripele paki naka ni Ityipt, tea ni m̃aladigi ki‐go maga, tea masausara maga; go ku maripele p̃arua liu, po mari au a maeto.

²⁷Nalakena tea wanogoe, p̃a leo, kinau a sai ki nam̃elearugu dip̃a ko, go a mari matele anigo e pakitano, po pitua ki‐go paki namasauana ki tea kokona ki‐go maga, Filistine natuna nagoroi maga, waina eu maliere namasausaraana anigo waina ku mari a:

²⁸Go ku moro maripele paki naka ni Assiria, nalakena ku mari sa puka asa mau; io, ku moro maripele paki da, ma ku da puka asa mau.

²⁹Go ku moro sokari namaripeleana anigo paki naka ni Kanaan, go paki naka ni Kaldea; ma ku da puka asa mau.

³⁰Nap̃op̃om̃a e manainai, Yehovah Sup̃e e noa e, nalakena ku mari naleo maga mamau puti wanogoe, nawosiana ki nagoroi masausara marilagilagi sikai;

³¹Nalakena ku davagi tokora tapu anigo nap̃au ni sara napua, go ku mari tokora vakilagi anigo sara napua ni natokoana; ma ku da mari dapala nagoroi masausara sikai mau, nalakena ku midoa ki p̃alo ki namoriana kakana.

³²Ma ku mari dapala nagoroi laki sikai waina e maripele paki tea p̃ota, ma e karaikita anawota!

³³Nara eu dua nagoroi masausara maga nadodomiana maga: ma nigo ku dua tea dodomi ko maga mamau puti nadodomiana anigo maga, po sai ki ruku paki da naga euga vae sara tokora umai punusi ko nalakena namasausaraana anigo maga.

³⁴Dapala nogoe ku mari panop̃ota ki nagoroi maga namaripeleana anigo maga, nalakena te naata sikai e da dausi ko naga ega maripele mau: go nalakena nigo ku pakotovi ra, go nara eu da dua ko namoriana mau, nalakena tea wanogoe ku mari panop̃ota.

³⁵Nalakena tea wanogoe, nagoroi masausara O, p̃a rogo navasaana ki Yehovah:

³⁶Yehovah Sup̃e e noa dapala nea, e naga, Nalakena tea ni namaliereana anigo e doko lina, go nam̃alam̃alaana anigo e pei tea lagai‐pakasa‐kiana namaripeleana anigo maga paki tea dodomi ko maga; go nalakena idolo mamaragokiana anigo maga mamau puti, go nalakena nada ni natum̃a maga, waina ku dua ra asa;

³⁷Nalakena tea wanogoe, p̃a leo, kinau aga wo piragi saisai ki tea dodomi ko maga mamau puti, waina ku maro ara, tea mamau puti waina ku dodomi ra, go tea mamau puti waina ku karaikita ra; aga wo piragi saisai ki da umai dip̃a ko daliviri, go aga wo lagai pakasa ki nam̃alam̃alaana anigo paki da, naga euga vunusi nam̃alam̃alaana mamau puti anigo.

³⁸Go aga wo pasap̃otae ko ki navasap̃otaeana waina eu pasap̃otae nagoroi laki maga asa waina eu dapiri navitawiriana, go waina eu daki nada; go aga wo dip̃akotovi ko ki nada ni namaritausuana go ki natotowo‐kasua‐ana.

³⁹Go aga wo pitua ki‐go paki nam̃elearuda, go euga wo nadi ki tokora tapu anigo ega vakitano, po dakai tokora vakilagi anigo maga; go euga wo duatilua sugoro anigo maga, po dapepavakoto vatu wia masauniana anigo maga: go euga wo doropusi ko p̃a wo m̃alam̃ala doko, p̃a wo dika ki sugoro.

⁴⁰Go euga wo piragi taua sikai ni naatam̃oli sake umai dip̃a ko, go nara euga wo nadi ko ki vatu maga, po puri sasama ko ki lova adeada maga.

⁴¹Go euga wo dap̃ara ki nasum̃a anigo maga ki nakapu, po mari navasap̃otaeana maga ako namata ni nagoroi laapa; go aga wo mari ko p̃a wo makoto ki namaripeleana, go p̃a wo da moro pitua ki navakotoviana mau.

⁴²Dapala nogoe aga wo mari namaritausuana aginau paki‐go ega wo nopu, go natotowo‐kasua‐ana aginau ega wo m̃elu dua ki‐go pano, go aga wo matadorogo doko, po da moro maeto mau.

⁴³Nalakena nigo ku da midoa ki parati ki naaleatia maga ni naveinaatara‐ana anigo mau, ma ku mari au a maeto ki‐go nalo ni naleo maga mamau puti wanogoe; nalakena tea wanogoe, p̃a leo, kinau aga wo lagati pitua ki natomariana anigo maga euga liliu paki nap̃aum̃a, Yehovah Sup̃e e noa e: go p̃a wo da mari namaripeleana sokari tea mamaragokiana anigo maga mamau puti mau.

⁴⁴P̃a leo, tea mamau puti waina eu noa naluluakia maga, euga wo noa naluluakia waia dip̃a ko, euga wo naga, Dakiusi p̃ilana, dakiusi natuna nagoroi.

⁴⁵Nigo ku pei p̃ilam̃a natuna nagoroi, waina ku mamarago ki am̃awota, go ki natum̃a maga; go ku pei tai ni taim̃a maga waina eu mamarago ki adawota go ki natuda maga: p̃ilam̃a e pei tea ni naworawora ni Heth, go tamam̃a e pei tea ni naworawora ni Amor.

⁴⁶Go taim̃a takalapa e pei Samaria, waina e doko nap̃irikiam̃a ni mawiri, nara ma natuna nagoroi maga: go taim̃a takariki, waina e doko nap̃irikiam̃a ni matua, e pei Sodom go natuna nagoroi maga.

⁴⁷Ku surata usi napua adeada maga, po mari pataka ni tea mamaragokiana adeada maga, ma ku da maro asa mau, ma dapala ku pe midoa ki nia naga e pe vei tea m̃oli, ku moro mari tea mamaragokiana maga p̃arua liu tea adeada.

⁴⁸Kinau a mauri, Yehovah Sup̃e e noa e, go taim̃a Sodom go natuna nagoroi maga eu da mari dakiusi tea waina nigo ku mari a mau, nigo go natum̃a nagoroi maga.

⁴⁹P̃a leo, namarinaleotageleana ki taim̃a Sodom e pei tea waia; naleomadagaana, navukaana ni navinaga, natokodam̃ate‐ana, eu doko asa go eu doko natuna nagoroi maga; go e da silae nam̃elearu ni tea rogokitesa go tea tika mau.

⁵⁰Go eu mari lagilagi, po mari tea mamaragokiana naraegu: nalakena tea wanogoe kinau a mari puoli ki da ragi waina a punusi a.

⁵¹Go Samaria e da mari namagovai ni namarinaleosaana anigo maga mau; ma nigo ku mari tea mamaragokiana anigo maga eu laapa liu adeada, go pae tea mamaragokiana anigo maga mamau puti waina ku mari ra, ku mari taim̃a maga eu dakiusi eu leana.

⁵²Go nigo ma, p̃a wo dum̃am̃a dapetape namaliereana anigo, nalakena ku magi taim̃a maga pitua ki navasap̃otaeana; nalakena namarinaleosaana anigo maga waina ku mari ra eu pei tea mamaragokiana warua liu tea adeada, nara eu pei tea mariana eu leana liu ko: nalakena tea wanogoe p̃a matamaliere, po dum̃am̃a dapetape namaliereana anigo, nalakena ku mari taim̃a maga eu dakiusi eu leana.

⁵³Go aga wo piragi liliua ki tea viragi‐lua‐pavakotoana adeada maga, tea viragilua‐pavakotoana maga ki Sodom go ki natuna nagoroi maga, go tea viragi‐lua‐pavakotoana maga ki Samaria go ki natuna nagoroi maga, go tea viragi‐lua‐pavakotoana anigo maga waina eu doko m̃aleoputo kakada:

⁵⁴Naga p̃a tum̃am̃a dapetape namaliereana anigo, go naga p̃a maliere nalakena tea mamau puti waina ku mari a, naga p̃a madeada pei navakavakaleana sikai.

⁵⁵Go taim̃a maga, Sodom go natuna nagoroi maga, euga wo liliu po doko dapala waina eu pea doko sala vea, go Samaria go natuna nagoroi maga euga wo liliu po doko dapala waina eu pea doko sala vea, go nigo go natum̃a nagoroi maga kuga wo liliu po doko dapala waina ku pea doko sala vea.

⁵⁶Nalakena taim̃a Sodom e da pei tea ni naluluakia sikai nawokam̃a naaleatia ni naleomadagaana anigo mau;

⁵⁷Ragi waina nasigisigileoana anigo e da pei tea lagaipakasa‐kiana mau, kite? Go ragi waina nigo ku po moro dakiusi a, ku pei tea ni navasapinoaana sikai paki Edom natuna nagoroi maga go paki tea ni m̃aladigi ki nia mamau puti, go paki Filistine natuna nagoroi maga, waina eu midoa ki p̃alo ki‐go daliviri.

⁵⁸Ku dum̃am̃a dapetape navaratiana ni namaripeleana anigo go tea mamaragokiana anigo maga, Yehovah e noa e.

⁵⁹Nalakena Yehovah Sup̃e e noa dapala nea, e naga, Kinau aga wo mari paki‐go ega vataka ni natomariana anigo maga, nigo waina ku midoa ki p̃alo ki navivisaana, doko do dapiri navasasokiana.

⁶⁰Ma kinau aga wo midoa ki parati ki navasasokiana aginau waina a mari a paki‐go ragi ni navei‐naatara‐ana anigo, go aga wo lawosoki paki‐go ki navasasokiana sikai waina ega tu du po du mau du.

⁶¹Ragi wanogoe p̃a wo midoa ki parati ki napua anigo maga, po maliere, ragi waina p̃a wo piragi soki taim̃a maga, taim̃a takalapa, go taim̃a takariki: go aga wo pitua ki da paki‐go euga vei natum̃a nagoroi maga, ma ega ta pae navasasokiana anigo maga.

⁶²Go kinau aga wo lawosoki navasasokiana aginau paki‐go; go p̃a wo atae naga kinau a pei Yehovah:

⁶³Naga p̃a wo midoa ki parati ki, po matamaliere, po da moro p̃olagati nawokam̃a mau, nalakena namaliereana anigo; ragi waina aga wo manigo midoakikorokoro tea mamau puti waina ku mari a, Yehovah Sup̃e e noa e.