Read Nguna Togoa Etafe North ESEKIEL 17 Bible Online

ESEKIEL 17 - Nguna Togoa Etafe North bible

ESEKIEL 17

¹Go navasaana ki Yehovah e umai paki nau,

²po naga, Naatam̃oli natuna, p̃a lua ki navasaana maluluakiana sikai, po pasa ki naluluakia sikai paki nasum̃a ni Israel;

³P̃a naga, Yehovah Sup̃e e noa dapala nea, e naga, Ikila warua sikai waina nalivaruna maga ero p̃arua go ero parau, go waina e pura ki nam̃auna waina eu oraorana visarasara maga, e umai paki Lebanon, po dape p̃alatu ni nakau sidar:

⁴E p̃ori kotovi lua ara ni elagi mau kakana, po dape pavakoto asa paki navanua ki tea vakokoto maga pano; po lawo ki nia natokoana sikai ki tea vakokoto maga.

⁵Go e dape napati sikai ni navanua, po lawo e doko natano wia; e lawo e nadigi ni noaisara welewelea sikai; e lawoe e dakiusi nakau willo sikai.

⁶Go e pisou, po pei vaine p̃atokotoko sikai, waina arana maga eu ulua sake pakilagi, go nakoana maga eu koakoa pakitano: e po pei vaine sikai; e sai ki arana maga, po sirisiria.

⁷Go ikila warua kerua e doko, waina nalivaruna ero p̃arua go nam̃auna eu laapa: go p̃a leo, vaine wanogoe e doa nakoana maga paki nia, po sai ki arana maga paki nia, pa dua ki naliana waina e pei tea lawoana asa, naga ega vuevue a.

⁸E pei tea lawoana doko natano wia nadigi ni noaisara welewelea sikai, naga ega sai ki arana maga, go naga ega tau ki nawana, naga ega vei vaine leom̃atakiana sikai.

⁹P̃a naga, Yehovah Sup̃e e noa dapala nea, e naga, Vaine wanogoe ega wo p̃ia, kite? Kite ikila wanogoe ega wo da paku dakati nakoana maga mau, po daekotokotovi arana maga, dapala waina nauluna vau maga euga wo kokolo ragi waina euga wo siria, kite? E da pei tea ni aru kasua kite naatam̃oli laapa naga euga vaku dakati nakoaana maga wanogoe.

¹⁰E pei tea lawoana tokora wanogoe, ma ega wo p̃ia, kite? Kite ega wo da kokolo mau, ragi waina nalagi ruatu ega sui a, kite? Ega wo kokolo tokora waina e pisou asa.

¹¹Go navasaana ki Yehovah e moro umai paki nau,

¹²po naga, P̃a noa ki nasum̃a vei p̃auluulu wanogoe, p̃a naga, Nimu ku da atae naleo maga wanogoe eu pei nasava? P̃a noa ki da, p̃a naga, Kuga leo, nawota ni Babelon e umai paki Yerusalem, po piragi lua pavakoto nawota kakana, go tea maraki kakana maga, po piragi lua ra paki Babelon pano, paki tokora waina nae e doko asa;

¹³Go e piragi lua naatam̃oli sikai ni nawora ni nawota, po mari navasasokiana sikai paki nia; po doropusi a paki etano ki navivisaana sikai, go e piragi lua pavakoto naatam̃oli vakilagi maga ni navanua:

¹⁴Dapala waina namarakiana e pe vakitano, po da mariatae dum̃ana sike a pakilagi mau, ma waina e pe vavaigoro navasasokiana aneana, e pe mariatae lawodu.

¹⁵Ma e mari p̃auluulu dip̃a e, nalakena e dip̃aki lua tea tautauana aneana maga paki Ityipt pano, naga euga tua e horse maga go naatam̃oli laapa. Nae ega wo p̃ia, kite? Naatam̃oli sikai waina e mari tea tapalana maga, ega wo da pei tea varatiana mau, kite? Ega wo dapiri navasasokiana, po pei tea vualuaana, kite?

¹⁶Kinau a mauri, Yehovah Sup̃e e noa e, ma doko tokora waina nawota e doko asa, waina e lawo ki nia e pei nawota, go waina e midoa ki p̃alo ki navivisaana aneana, go waina e dapiri navasasokiana aneana, doko tokora wanogoe ega wo mate asa m̃aleoputo ni Babelon.

¹⁷Go Faraoh nara ma naatam̃oli kasua maga ni navakalo go taua warua aneana euga wo da maneana pei nasilaeana mau doko navakalo, ragi waina euga wo nadi ki nawosiana maga ni nakelugoroana aneana pakilagi, po davagi nasum̃a kasua maga ni nap̃aakagoroana, naga euga taelua naatam̃oli laapa.

¹⁸Nalakena e midoa ki p̃alo ki navivisaana, po dapiri navasasokiana; go p̃a leo, e pitua ki nam̃elearuna, ma e mari tea laapa wanogoe; nae ega wo da pei tea vualuaana mau.

¹⁹Nalakena tea wanogoe Yehovah Sup̃e e noa dapala nea, e naga, Kinau a mauri, go navivisaana aginau waina e midoa ki p̃alo ki nia, go navasasokiana aginau waina e dapiri a, kinau aga wo liliua ki nia ega liliu paki nap̃auna.

²⁰Go aga wo p̃elesa ki kup̃ena aginau dap̃augoro e, go ega wo pei tea vuasokiana vaivai aginau, go aga wo piragi a umai paki Babelon, go aga wo pululu ki nia tokora wanogoe nalakena natapiriana aneana waina e dapiri dip̃a au asa.

²¹Go tea wialua maga ni naatam̃oli maga ni navakalo aneana euga wo dowo ki lova, go tea maga waina euga wo pei tea toropusiana doko, euga wo pei tea taperaverakiana paki sara nalagi: go kuga wo atae naga kinau, Yehovah, kinau a noa e.

²²Yehovah Sup̃e e noa dapala nea, e naga, Kinau ma, aga wo dape lua p̃alatu ni nakau sidar wanogoe, go aga wo lawo ki nia; aga wo mari kotovi nasiri sikai m̃elu ara ni elagi mau, go aga wo dum̃agu lawo ki nia nam̃asua ni tava vakilagi liu sikai:

²³Aga wo lawo ki nia nam̃asua ni tava vakilagi ni Israel; ega wo siria po dau ki nawana, go ega wo pei nakau sidar wia sikai: go manu visarasara maga mamau puti euga wo doko etano ki nia, euga wo doko melu ni arana maga.

²⁴Go nakau maga mamau puti ni vanua euga wo atae naga kinau Yehovah a piragi lua nakau vakilagi e pakitano, go nakau vakitano a sike a e pakilagi, go nakau mata a mari a e kokolo, go nakau kokolo a mari a e ulua p̃ia: kinau Yehovah a noa e, go aga wo mari a.