Read Nguna Togoa Etafe North ESEKIEL 19 Bible Online

ESEKIEL 19 - Nguna Togoa Etafe North bible

ESEKIEL 19

¹Go p̃a sike nalalagaarovaana sikai nalo ni tea maraki maga ni Israel, P̃a naga, P̃ilam̃a e pei nasava?

²E pei laion goroi sikai: e one natano sikoti laion maga, e pakale natuna maga m̃aleoputo ni laion tureai maga.

³Go e pakale natuna maga sikai kakada; e po pei laion tureai sikai: go e atae dogo takana waina ega tum̃ana kati p̃orae tea kati‐p̃oraeana aneana, go e dinomi naatam̃oli.

⁴Go nalauna maga eu dogo nalo kakana; e pei tea vuasokiana doko m̃orutano adeada: go eu piragi a pano ki tagau maga paki navanua ni Ityipt.

⁵Go ragi waina e punusi naga e leogoro, go naleogoroana aneana e pano puoli, e moro dape natuna maga tea p̃ota sikai kakada, po mari a e pei laion tureai sikai.

⁶Go e surasurata m̃aleoputo ni laion maga, go e po pei laion tureai sikai: go e atae dogo takana waina ega tum̃ana kati p̃orae tea kati‐p̃oraeana aneana, go e dinomi naatam̃oli.

⁷Go e mari sa ki nasum̃a vakilagi adeada maga, po mari natokoana adeada maga eu makaka; go navanua e pei maso maladi doko, naatatoko maga eu saram̃akoto nalakena nasaruruana ni nauruana aneana.

⁸Go nalauna maga eu mari dip̃a e ki vaivai maga dalivirigoro e; eu p̃elesa ki kup̃ena adeada dap̃augoro e; e pei tea vuasokiana doko m̃orutano adeada.

⁹Go eu solisoki a ki tea moti maga, po piragi a umai punusi nawota ni Babelon; eu doropusi a paki nasum̃a kasua sikai, dapala waina nadaleona ega wo da moro pei tea rogoana tava maga ni Israel mau.

¹⁰P̃ilam̃a e dakiusi vaine sikai waina e pei tea lawoana nadigi ni noaisara: e dau p̃ia go arana eu laapa, nalakena noaisara e sara p̃arua.

¹¹Arana kasua liu e po pei naap̃e ki tea maramara sikai; e pei tea sikeana e pakilagi liu m̃aleoputo ni ara matolu maga; navakilagiana kakana go nalaapaana ni arana maga e pei tea vunusiana.

¹²Ma e pei tea vaku‐dakatiana doko namaritausuana, e pei tea nadikiana pakitano, go nalagi ruatu e dap̃ara ki nawana: ara kasua kakana e makoto po kokolo; nakapu e gani puoli ki da.

¹³Go sala waia e pei tea lawo‐piri‐ana doko masop̃alo, doko navanua garagara go madou sikai.

¹⁴Go nakapu e m̃elu namalona po gani puoli ki arana maga go nawana, go ara kasua kakana sikai e da moro pei tea toropusiana doko asa mau naga ega vei naap̃e sikai ni navei‐nawota‐ana. Tea waia e pei nalalagaarovaana sikai, go ega wo pei tea noaana naga e pei nalalagaarovaana sikai.