Read Nguna Togoa Etafe North ESEKIEL 20 Bible Online

ESEKIEL 20 - Nguna Togoa Etafe North bible

ESEKIEL 20

¹Go e pakilina natua kelarua, atelagi kelima kakana, nakup̃a kerualima ni atelagi, naga tea matua maga ni Israel seara kakada eu rumai naga euga vusuusu ki Yehovah, go eu doko natano naraegu.

²Go navasaana ki Yehovah e umai paki nau, po naga,

³Naatam̃oli natuna, p̃a vasa paki tea matua maga ni Israel, po noa ki da, p̃a naga, Yehovah Sup̃e e noa dapala nea, e naga, Nimu ku umai naga kuga vusuusu ki nau, kite? Kinau a mauri, Yehovah Sup̃e e noa e, kinau aga wo da pei tea vusuusukiana pae mu mau.

⁴P̃a wo pasap̃otae ra, naatam̃oli natuna, p̃a wo pasap̃otae ra, kite? P̃a mari ra euga atae tea mamaragokiana maga ki tamada maga;

⁵Go p̃a noa ki da, p̃a naga, Yehovah Sup̃e e noa dapala nea, e naga, Doko naaleatia waina a matadoa Israel, po sike nam̃elearugu paki naworawora ni nasum̃a ni Yakob, po dum̃agu mari au a pei tea ataeana paki da navanua ni Ityipt, ragi waina a sike nam̃elearugu paki da, po naga, Kinau a pei Yehovah Sup̃e animu;

⁶Doko naaleatia wanogoe a sike nam̃elearugu paki da, naga aga viragi lua ra m̃elu dua ki navanua ni Ityipt umai paki navanua sikai waina a madeada matadoa e, navanua sikai waina e sara ki milk go ki honi, waina e pei nasamasamaana warua liu ni navanua maga mamau puti:

⁷Go a noa ki da, a naga, Kuga nadi ki lua tea mamaragokiana maga ni namatamu maga, sara naata kakamu, go kuga ta dum̃amu mari mu kuga vei tea mamaragokiana ki idolo maga ni Ityipt mau: kinau a pei Yehovah Sup̃e animu.

⁸Ma eu mari p̃auluulu dip̃a au, go eu karai daki dorogo paki nau; eu da nadi ki lua tea mamaragokiana maga ni namatada maga mau, go eu da doropusi idolo maga ni Ityipt mau: go kinau a noa ki da naga aga wo daki lua namaritausuana aginau paki da, naga aga wo pakavuro namaetoana aginau dip̃a ra m̃aleoputo ni navanua ni Ityipt:

⁹Ma a mari a nalakena nagisagu, naga ega ta pei tea mariana ega vei tea m̃oli namata ni nalauna maga mau, waina eu doko m̃aleoputo kakada, nalakena a noa ki da namata ni nalauna maga wanogoe naga aga viragi lua narei aginau m̃elu dua ki navanua ni Ityipt umai.

¹⁰Nalakena tea wanogoe a piragi lua ra m̃elu dua ki navanua ni Ityipt umai paki masop̃alo.

¹¹Go a dua ra natawonakiana aginau maga, po pisei ki da navasap̃otaeana aginau maga, waina e one naatam̃oli one naga ega mari pataka da, waina e pe masauna naga e pe wo mauri.

¹²Go a moro dua ra sabbath aginau maga, naga ega vei navaivaiana sikai namawota kakagu go kakada, naga euga atae naga kinau a pei Yehovah, go naga a dapugoro ra.

¹³Ma nasum̃a ni Israel e mari p̃auluulu dip̃a au masop̃alo: eu da surata pae natawonakiana aginau maga mau, go eu dip̃adoa navasap̃otaeana aginau maga, waina e one naatam̃oli one naga ega mari ra, waina e pe masauna naga e pe wo mauri; go eu mari sabbath aginau maga eu pei tea m̃oli: go a noa ki da naga aga taki lua namaritausuana aginau paki da doko masop̃alo, po mari puoli ki da.

¹⁴Ma a mari a nalakena nagisagu, naga ega ta pei tea mariana ega vei tea m̃oli namata ni nalauna maga mau, waina a piragi lua ra umai doko namatada.

¹⁵Go a sike nam̃elearugu paki da masop̃alo, naga aga ta piragi ra umai paki navanua waina a dua ra asa mau, navanua waina e sara ki milk go ki honi, waina e pei nasamasamaana warua liu ni navanua maga mamau puti;

¹⁶Nalakena eu dip̃adoa navasap̃otaeana aginau maga, po da surata pae natawonakiana aginau maga mau, go eu mari sabbath aginau maga eu pei tea m̃oli: nalakena nap̃op̃oda e dausi idolo adeada maga.

¹⁷Ma namatagu e mari malemale ra, go a da mari puoli ki da mau, kite mari punue puti ra masop̃alo mau.

¹⁸Go a noa ki natuda maga masop̃alo, a naga, Kuga ta surata pae natawonakiana maga ki tamamu maga mau, kite pavaigoro navasap̃otaeana adeada maga mau, kite dum̃amu mari mu kuga vei tea mamaragokiana ki idolo adeada maga mau:

¹⁹Kinau a pei Yehovah Sup̃e animu; kuga surata pae natawonakiana aginau maga, po pavaigoro navasap̃otaeana aginau maga, po mari pataka da:

²⁰Go kuga vavaigoro sabbath aginau maga euga tapu; go euga wo pei navaivaiana sikai namawota kakagu go kakamu, naga kuga atae naga kinau a pei Yehovah Sup̃e animu.

²¹Ma natuda maga eu mari p̃auluulu dip̃a au; eu da surata pae natawonakiana aginau maga mau, kite pavaigoro navasap̃otaeana aginau maga mau, naga euga mari pataka da, waina e one naatam̃oli one naga ega mari a, waina e pe masauna naga e pe wo mauri; eu mari sabbath aginau maga eu pei tea m̃oli: go kinau a noa ki da naga aga taki lua namaritausuana aginau paki da, naga aga vakavuro namaetoana aginau dip̃a ra doko masop̃alo.

²²Ma a dosa liliua ki nam̃elearugu, po mari a nalakena nagisagu, naga ega ta pei tea mariana ega vei tea m̃oli namata ni nalauna maga mau, waina a piragi lua ra umai doko namatada.

²³Go a sike nam̃elearugu paki da masop̃alo, naga aga taperavera ki da usuraki nalauna maga, po sapura ki da m̃aleoputo ni navanua maga;

²⁴Nalakena eu da mari navasap̃otaeana aginau maga mau, ma eu dip̃adoa natawonakiana aginau maga, go eu mari sabbath aginau maga eu pei tea m̃oli, go namatada maga eu leo doko idolo maga ki tamada maga.

²⁵Go a dua ra natawonakiana maga waina eu da p̃ia mau, go navasap̃otaeana maga waina euga ta pap̃ai namauriana asa mau;

²⁶Go a mari ra eu pei tea mamaragokiana ki navituaana adeada maga, nalakena a mari ra eu pitua ki navituaana tap̃arakiana maga ni natuda takalapa maga mamau puti, naga aga mari ra euga vei maso maladi, naga euga atae naga kinau a pei Yehovah.

²⁷Nalakena tea wanogoe naatam̃oli natuna, p̃a vasa paki nasum̃a ni Israel, po noa ki da, p̃a naga, Yehovah Sup̃e e noa dapala nea, e naga, Pae tea wanogoe tamamu maga eu moro pasa sa ki nau asa, nalakena eu mari malauweluki paki nau.

²⁸Nalakena ragi waina a piragi lua ra umai paki navanua, waina a pivisa po noa naga aga tua ra asa, ragi wanogoe eu punusi tava vakilagi maga, go nakau mamalakesa maga, go eu pitua ki naviriana adeada maga tokora wanogoe, go tokora wanogoe eu pitua ki navituaana adeada maga asa, waina eu mari au a maeto asa; go tokora wanogoe eu moro mari tea ni nap̃o wia adeada maga asa, go tokora wanogoe eu daki lua navituaana takiana adeada maga asa.

²⁹Go a noa ki da, a naga, Tokora vakilagi waina ku paki asa pano nagisana e pei nasava? Nalakena tea wanogoe nagisana e pei tea sosoana ki Bamah pa pa paki naaleatia waia.

³⁰Nalakena tea wanogoe p̃a noa ki nasum̃a ni Israel, p̃a naga, Yehovah Sup̃e e noa dapala nea, e naga, Nimu ku do dum̃amu mari mu ku pei tea mamaragokiana, dapala waina tamamu maga eu pea mari a, kite? Go ku do maripele dausi tea mamaragokiana adeada maga, kite?

³¹Go ragi waina ku pitua ki navituaana animu maga, po dap̃ara ki natumu maga eu pei naviriana maga, ku do dum̃amu mari mu ku pei tea mamaragokiana ki idolo animu maga mamau puti pa pa paki naaleatia waia. Go kinau aga wo pei tea vusuusukiana animu, nasum̃a ni Israel O, kite? Kinau a mauri, Yehovah Sup̃e e noa e, aga wo da pei tea vusuusukiana animu mau:

³²Go tea waina e doko namidodoana animu ega wo da pakilina mau; nalakena ku noa naga, Tuga mari ega takiusi nalauna p̃ota maga, ega takiusi naworawora maga ni navanua maga, naga tuga lotu ki nakau go ki vatu.

³³Kinau a mauri, Yehovah Sup̃e e noa e, go kinau aga wo pei nawota dap̃au mu ki nam̃elearu kasua sikai, go ki aru saikiana sikai, go ki namaritausuana takiana:

³⁴Go aga wo piragi lua mu m̃elu dua ki narei maga, go aga wo piragi saisai ki mu m̃elu dua ki navanua maga waina ku pei tea taperaverakiana usuraki ara, ki nam̃elearu kasua sikai, go ki aru saikiana sikai, go ki namaritausuana takiana:

³⁵Go aga wo piragi lua mu umai paki masop̃alo ki narei maga, go tokora wanogoe aga wo mari navasap̃otaeana paki mu narae paki narae.

³⁶Dapala waina a pasap̃otae tamamu maga masop̃alo ni navanua ni Ityipt, dapala nogoe aga wo moro pasap̃otae mu, Yehovah Sup̃e e noa e.

³⁷Go aga wo mari mu kuga surata etano ki tiko, go aga wo suasua ki mu naga kuga vano pae naveveana.

³⁸Go aga wo mari p̃otae m̃elu dua ki mu tea vei p̃auluulu maga, go tea maga waina eu dapiri dip̃a au; aga wo piragi lua ra m̃elu dua ki navanua waina eu m̃enaki atatoko asa, ma euga wo da sili paki navanua ni Israel mau: go kuga wo atae naga kinau a pei Yehovah.

³⁹Go nimu nasum̃a ni Israel O, Yehovah Sup̃e e noa dapala nea, e naga, Kuga vano, kuga magi idolo animu maga suasua, sara naata kakamu, ragi waia go pa pa pa, waina ku pe karai daki dorogo paki nau: ma kuga wo da moro mari nagisagu tapu ega vei tea m̃oli mau, ki navituaana animu maga go ki idolo animu maga.

⁴⁰Nalakena doko tava tapu aginau, doko tava ni tokora vakilagi ni Israel, Yehovah Sup̃e e noa e, doko tokora wanogoe nasum̃a mamau ni Israel, tea mamau puti kakada, euga wo maginau suasua doko navanua: tokora wanogoe aga wo piragi soki ra asa, go tokora wanogoe aga wo datagovi mu ki navituaana animu maga, go ki nawa vea maga ni takavea ni naviriana maga ni navinaga animu maga, pilake naleo tapu animu maga mamau puti.

⁴¹Aga wo piragi soki mu dapala tea ni nap̃o wia, ragi waina aga wo piragi lua mu m̃elu dua ki narei maga, po piragi saisai ki mu m̃elu dua ki navanua maga waina ku pei tea taperaverakiana doko ara; go aga wo mari natapuana aginau ega wo pei tea ataeana m̃aleoputo kakamu doko namata ni nalauna p̃ota maga.

⁴²Go kuga wo atae naga kinau a pei Yehovah, ragi waina aga wo piragi lua mu umai paki navanua ni Israel, paki navanua waina a pivisa asa naga aga tua tamamu maga asa,

⁴³Go tokora wanogoe kuga wo midoa ki parati ki napua animu maga, go natomariana animu maga mamau puti, waina ku dum̃amu mari mu ku pei tea mamaragokiana asa; go kuga wo dum̃amu mamarago ki mu namatamu, nalakena namariana sa animu maga mamau puti waina ku mari naleo sa asa.

⁴⁴Go kuga wo atae naga kinau a pei Yehovah, ragi waina aga wo mari paki mu nalakena nagisagu, ega ta pae namariana sa animu maga mau, kite pae natomariana dagele animu maga mau, nimu nasum̃a ni Israel O, Yehovah Sup̃e e noa e.

⁴⁵Go navasaana ki Yehovah e umai paki nau,

⁴⁶po naga, Naatam̃oli natuna, p̃a lawo ki naraem̃a po leo paki sauth, go p̃a rogorogo ki narogorogoana dip̃a sauth, go p̃a veanoasai dip̃a navanua ni mala ni nakau doko Sauth;

⁴⁷Go p̃a noa ki mala ni nakau ni Sauth, p̃a naga, P̃a rogo navasaana ki Yehovah; Yehovah Sup̃e e noa dapala nea, e naga, P̃a leo, aga wo dokoni nakapu sikai doko ako, go aga wo gani puoli ki sara nakau mamalakesa go ki sara nakau kokolo waina eu doko ako: mena ni nakapu soro wanogoe ega wo da pei tea vuepunueana mau, go tea mamau puti waina eu doko m̃aleoputo ni sauth pa pa liliu north, naraeda euga wo aso asa.

⁴⁸Go sara nap̃okasi euga wo punusi naga kinau, Yehovah, kinau a dokoni a: ega wo da pei tea vuepunueana mau.

⁴⁹Go a naga, Yehovah Sup̃e O, eu do noa nalo kakagu, eu naga, Nae e da pei tea vasa naluluakia maga mau, kite?