Read Nguna Togoa Etafe North ESEKIEL 21 Bible Online

ESEKIEL 21 - Nguna Togoa Etafe North bible

ESEKIEL 21

¹Go navasaana ki Yehovah e umai paki nau,

²po naga, Naatam̃oli natuna, p̃a lawo ki naraem̃a po leo paki Yerusalem, go p̃a rogorogo ki narogorogoana dip̃a tokora tapu adeada, go p̃a veanoasai dip̃a navanua ni Israel;

³Go p̃a noa ki navanua ni Israel, p̃a naga, Yehovah e noa dapala nea, e naga, P̃a leo, kinau a dum̃agu lawo ki nau dip̃a ko, go aga wo sai lua lova aginau m̃elu dua ki nala kakana, go aga wo daelua m̃elu dua ki‐go tea leana go tea sigisigileo.

⁴Nalakena aga wo daelua m̃elu dua ki‐go tea leana go tea sigisigileo, nalakena tea wanogoe lova aginau ega wo m̃elu dua ki nala kakana po dave pano dip̃a sara nap̃okasi pae sauth pa pa liliu north:

⁵Go sara nap̃okasi euga wo atae naga kinau, Yehovah, kinau a sai lua lova aginau m̃elu dua ki nala kakana; ega wo da moro liliu paki asa mau.

⁶Nalakena tea wanogoe p̃a matamaliere, nigo naatam̃oli natuna O; p̃a matamaliere ki p̃op̃o maworawora go ki narogokitesaana warua doko namatada maga.

⁷Go ega wo doko, ragi waina euga noa ki‐go, euga naga, Ekasana ku matamaliere? P̃a noa ki da, p̃a naga, Nalakena narogorogoana maga, nalakena e do umai: go nap̃op̃o ni tea mamau puti ega wo sara, go nam̃elearuda maga euga wo manainai, go sara naatada euga wo sirinopu, go nap̃atuada maga euga wo sara dakiusi noai: p̃a leo, e do umai, go ega wo pei tea vakavuroana, Yehovah Sup̃e e noa e.

⁸Go navasaana ki Yehovah e umai paki nau,

⁹po naga, Naatam̃oli natuna p̃a veanoasai, po naga, Yehovah e noa dapala nea, e naga, P̃a naga, lova sikai, lova sikai, e pei tea vakaliana, go e lidalida:

¹⁰E pei tea vakaliana raki naatugiana sikai; e pei tea vakasakiana naga ega vilavila dakiusi navila: go nigida tuga wo mari katakata, kite? Tiko ki natugu ega wo dip̃akotovi sara nakau.

¹¹Go e pei tea vituakiana naga ega vei tea vakasakiana, naga ega vei tea vuatiana: lova e pei tea vakaliana, io, e pei tea vakasakiana, naga ega vei tea vituakiana paki nam̃elearu ni tea atuatu.

¹²P̃a kuapioso po lalagaarova, naatam̃oli natuna: nalakena e pei tea sailuaana dip̃a narei aginau, e pei tea sailuaana dip̃a tea maraki maga mamau puti ni Israel: namatakuana maga nalakena lova euga wo doko narei aginau: nalakena tea wanogoe p̃a tapagi natap̃oraem̃a.

¹³Nalakena e pei namaridogoana sikai; go tiko waina e do dip̃akotovi e pe vano puoli, nasava e pe wo pakilina? Yehovah Sup̃e e noa e.

¹⁴Nalakena tea wanogoe naatam̃oli natuna O, p̃a veanoasai, p̃a tapap̃osap̃osa; go lova ega atugi sala kerua, go sala ketolu, lova waina e pei tea sailuaana dip̃a tea maga waina euga vei tea maripunueana; e pei lova waina ega wo atugi p̃arua, waina e dalivirigoro ra.

¹⁵A po lawo ki namatap̃ago ni lova e doko namata‐pua adeada maga mamau puti, naga nap̃op̃oda ega sara, go naga natapilagonaana adeada maga euga wo p̃arua: e pei tea mariana e pilavila dakiusi navila, e pei tea saikiana naga ega atuatu.

¹⁶P̃a vei tea sikai maau asa, po paki taleva ni matua; p̃a tum̃am̃a dutua ki‐go, po paki taleva ni mawiri; p̃a vaki tokora waina naraem̃a e pei tea lawokiana asa.

¹⁷Go kinau ma, aga wo dapap̃osawosa, go aga wo pakavuro namaritausuana aginau: kinau Yehovah a noa e.

¹⁸Go navasaana ki Yehovah e moro umai paki nau,

¹⁹po naga, Naatam̃oli natuna, p̃a mari dawona ki napua dua waina lova ki nawota ni Babelon ega vae ara umai; eroga wo dua m̃elu navanua sikai maau: go p̃a mari navaivaiana sikai, p̃a mari a nap̃au ni napua paki natokoana.

²⁰P̃a mari dawona ki napua sikai agi lova naga ega vae asa paki Rabbah ki Ammon natuna maga, go paki Yudah doko Yerusalem waina e pei tea p̃aakagoroana.

²¹Nalakena nawota ni Babelon e lawodu napua dawasira, doko nap̃au ni napua dua wanogoe, naga ega mari nakikitaana: e durua ki nalua maga, e pusuusu ki terafim, e leo paki nap̃alau ni nap̃elekevatu.

²²Gole paki Yerusalem e dowo paki nam̃elearuna ni matua, naga ega sike lawo ki tea maraki maga, naga ega vitua ki navasaana raki naatugiana, naga ega sike nadaleo ni nararasaana, naga ega lawo ki nakau lawo‐p̃orae maga dip̃a namata‐pua kakana maga, naga ega nadi ki natauakiana maga dip̃a e, naga ega tavagi nasum̃a kasua maga ni nakelugoroana.

²³Go ega wo madeada pei nakikitaana p̃alo sikai namatada; eu pivisa navivisaana maga: ma ega wo mari namarinaleotageleana adeada ega vei tea midoaki‐paratikiana, naga euga vei tea vuasokiana.

²⁴Nalakena tea wanogoe Yehovah Sup̃e e noa dapala nea, e naga, Nalakena ku mari namarinaleotageleana animu e pei tea midoaki‐paratikiana, nalakena natapiriana animu maga eu pei tea mari‐pakasa‐kiana, dapala waina namarinaleosaana animu maga ni natomariana animu maga eu dokolina; nalakena ku pei tea midoaki‐parati‐kiana ara, kuga wo pei tea varatiana.

²⁵Go nigo, tea maraki ni Israel O, tea sigisigileo warua, naaleatia anigo e po umai, e pei ragi edaku maau ni navasap̃otaeko‐ana;

²⁶Yehovah Sup̃e e noa dapala nea, e naga, Euga wo dape lua tap̃au vivisiana anigo, po sawo lua tagotop̃au anigo: ega wo da moro pataka sikai doko mau: tea vakitano ega wo pei tea tapeana pakilagi, go tea vakilagi ega wo pei tea viragiana pakitano.

²⁷Kinau aga wo dap̃olosiwo ki nia, aga wo dap̃olosiwo ki nia, aga wo dap̃olosiwo ki nia: tea wanogoe ega wo da moro doko mau, pa pa nae waina e pei tea aneana, ega wo umai; go aga wo dua e asa.

²⁸Go nigo, naatam̃oli natuna, p̃a veanoasai, po naga, Yehovah Sup̃e e noa dapala nea, e naga, Nalo ni Ammon natuna maga, go nalo ni navasapinoaana adeada, lova sikai, lova sikai e pei tea sailuaana raki naatugiana; e pei tea vakasakiana raki namarisakiana, naga ega vilavila dakiusi navila:

²⁹Naga ega vei tea toropusiana paki nanoa ni tea sigisigileo sa maga, waina naaleatia adeada e po umai, naaleatia ni navaratiana edaku mau adeada, ragi waina nara euga wo manimu punusi navunusiana p̃alo maga, ragi waina euga wo manimu kikita ki nasorosoroana maga.

³⁰P̃a mari a ega liliu paki nala kakana. Aga wo pasap̃otae ko doko tokora waina ku pei tea mari‐dawona‐kiana asa, doko navanua atatoko anigo.

³¹Go aga wo daki lua namaetoana aginau paki‐go; aga wo sui ko ki nakapu ni namaritausuana aginau: go aga wo pitua ki‐go paki nam̃elearu ni naatam̃oli sigisigileo maga, waina eu atae p̃otae namari‐puoli‐kiana.

³²P̃a wo pei navinaga agi nakapu vavaga; nadam̃a ega wo doko m̃aleoputo ni navanua; p̃a wo da moro pei tea midoakiana mau: nalakena kinau Yehovah a noa e.