Read Nguna Togoa Etafe North ESEKIEL 22 Bible Online

ESEKIEL 22 - Nguna Togoa Etafe North bible

ESEKIEL 22

¹Go navasaana ki Yehovah e moro umai paki nau,

²po naga, Go nigo, naatam̃oli natuna, p̃a wo pasap̃otae, p̃a wo pasap̃otae natokoana ni nada, kite? Go p̃a mari a ega tum̃ana atae tea mamaragokiana kakana maga mamau puti.

³Go p̃a naga, Yehovah Sup̃e e noa dapala nea: Natokoana sikai waina e do daki nada m̃aleoputo kakana naga ragi aneana ega umai, go waina e do mari idolo maga naga ega tum̃ana pei tea mamaragokiana pae ara!

⁴Ku po pei tea tap̃aro nalo ni nada waina ku daki nia, go ku po pei tea mamaragokiana nalo ni idolo maga waina ku mari ra; go ku dum̃am̃a mari naaleatia anigo e po umai paki m̃aladigi, ragi ni nanopuana ni natau anigo maga eu po umai: nalakena tea wanogoe kinau a mari ko ku pei navasap̃inoaana sikai ki nalauna maga, go navasasaudoaana sikai ki navanua maga mamau puti.

⁵Tea maga waina eu doko m̃aladigi ki‐go, go tea maga waina eu doko uvea ki‐go, euga wo muru ki saudoa ki‐go, nigo tea dododaoana, waina ku pura ki navinovinoiana.

⁶P̃a leo, tea maraki maga ni Israel waina eu doko ako, sara naata kakada pae namarimatuaana adeada, eu dum̃ada lawo ki da naga euga daki nada.

⁷Tamada maga go p̃ilada maga eu pei tea midoaki‐p̃alo‐kiana doko ako; nam̃enaki atatoko waina e doko m̃aleoputo kakam̃a e pei tea riesokiana: eu mari dagele paki namatapesu go paki nagoroi malepu waina eu doko ako doko.

⁸Ku midoa ki p̃alo ki naleo tapu aginau maga, go ku mari sabbath aginau maga eu pei tea m̃oli.

⁹Naatam̃oli vasa pinoa maga waina eu daki nada eu doko ako: go doko ako eu ganikani tava vakilagi maga: doko m̃aleoputo kakam̃a eu mari namaripeleana.

¹⁰Doko ako eu lagai pakasa ki nam̃alam̃alaana ki tamada maga: doko ako eu mari nagoroi waina e da dautau nalakena e doko p̃aova, e pei tea dododaoana.

¹¹Go tea sikai e mari nawosiana mamaragokiana paki nagoroi ki tea ni m̃aladigi ki nia; go tea p̃ota sikai e mari nawosiana sa paki sulina po mari a e loa asa; go tea p̃ota sikai doko ako e moro mari gorena, natu ni tamana, e pei tea dododaoana.

¹²Doko ako eu dape navago naga euga taki nada; ku dape narogoviana go nataluaana, go ku dape pavakoto tea ki tea ni m̃aladigi ki‐go maga, go ku malio ki nau, Yehovah Sup̃e e noa e.

¹³Nalakena tea wanogoe p̃a leo, kinau a dapap̃osawosa nalo ni nataluaana anigo waina ku dalua e ki namarisoreana, go nalo ni nada waina e doko m̃aleoputo kakam̃a.

¹⁴Nap̃op̃om̃a e mariatae du, kite nam̃elearum̃a maga ero mariatae kasua, naaleatia maga waina aga wo mari dip̃a ko, kite? Kinau, Yehovah, a noa e, go aga wo mari a.

¹⁵Go aga wo daperavera ki‐go m̃aleoputo ni nalauna maga, po sapura ki‐go usuraki navanua maga; go aga wo mari puoli ki tea mamaragokiana anigo m̃elu dua ki‐go pano.

¹⁶Go aga wo pei tea dododaoana pae ako doko namata ni nalauna maga; go p̃a wo atae naga kinau a pei Yehovah.

¹⁷Go navasaana ki Yehovah e umai paki nau,

¹⁸po naga, Naatam̃oli natuna, nasum̃a ni Israel e po pei nasam̃a namatagu: silver go brass go tin go airon go led eu mamau puti pei nasam̃a doko m̃aleoputo ni upu ni nakapu.

¹⁹Nalakena tea wanogoe Yehovah Sup̃e e noa dapala nea, e naga, Nalakena ku po mamau puti pei nasam̃a, nalakena tea wanogoe p̃a leo, kinau aga wo piragi saisai ki mu paki m̃aleoputo ni Yerusalem.

²⁰Dapala waina eu piragi saisai silver go brass go airon go led go tin paki m̃aleoputo ni upu ni nakapu naga euga sui nakapu doko asa, po mari a ega sara; dapala nogoe aga wo piragi saisai ki‐go doko namaetoana aginau go doko namaritausuana aginau, go aga wo doropusi ko asa, po mari ko p̃a wo sara.

²¹Aga wo piragi saisai ki‐go, po sui ko ki nakapu ni namaritausuana aginau, go kuga wo pei tea mariana kuga sara m̃aleoputo kakana.

²²Dapala waina silver e pei tea mariana e sara m̃aleoputo ni upu ni nakapu, dapala nogoe kuga wo pei tea mariana kuga sara m̃aleoputo kakana; go kuga wo atae naga kinau Yehovah, kinau a daki lua namaritausuana aginau paki‐go.

²³Go navasaana ki Yehovah e umai paki nau,

²⁴po naga, Naatam̃oli natuna, p̃a noa ki nia, p̃a naga, Ku pei navanua sikai waina e da pei tea sarueana kite vuevueana ki usa mau doko naaleatia ni namaetoana.

²⁵Tea maraki kakana maga m̃aleoputo kakana eu dakiusi laion sikai waina e do uru, doko do kati‐p̃oraworae tea kati‐p̃oraeana: eu gani dinomi naata ni naatam̃oli maga; eu dape pavakoto naleo wia tauakiana go naleo wia masauniana maga; eu mari nagoroi malepu maga eu laapa m̃aleoputo kakana.

²⁶Tea viri kakana maga eu dapiri nawotaeana aginau, go eu mari naleo tapu aginau maga eu pei tea m̃oli: eu da mari navanop̃otaana namawota ni tea waina e dapu go ni tea waina e m̃oli, go eu da pasa pisei ki naatam̃oli maga naga euga atae p̃otae tea waina e dautau go tea waina e da dautau mau, go eu dasuru ki namatada maga paki sabbath aginau maga, go kinau a pei tea mariana a pei tea m̃oli m̃aleoputo kakada.

²⁷Tea maraki kakana maga m̃aleoputo kakana eu dakiusi wulf maga waina eu kati‐p̃oraworae tea kati‐p̃oraeana; naga euga taki nada, go naga euga mari puoli ki naatam̃oli maga, naga euga veani nataluaana ki namarisoreana.

²⁸Go profeta kakana maga eu madeada puluvulu ki napulu tare, doko do madeada punusi navunusiana p̃alo maga, po do kikita ki nakikitaana maga ni nasorosoroana, doko do naga, Yehovah Sup̃e e noa dapala nogoe; ragi waina Yehovah e da pasa mau.

²⁹Narei ni navanua eu mari nariesokiana, po mari pavakoto; eu diesoki tea rogokitesa go tea tika, go eu mari dagele paki nam̃enaki‐atatoko.

³⁰Go kinau a laaga naatam̃oli sikai m̃aleoputo kakada, waina ega tavagi piri p̃aaka kakana po magi navanua lawodu malo mawora naraegu, naga aga ta mari puoli ki nia mau; ma a da pap̃ai te sikai asa mau.

³¹Nalakena tea wanogoe a daki lua namaetoana aginau paki da; a mari puoli ki da ki nakapu ni namaritausuana aginau: a liliua ki napua adeada e liliu paki nap̃auda, Yehovah Sup̃e e noa e.