Read Nguna Togoa Etafe North ESEKIEL 23 Bible Online

ESEKIEL 23 - Nguna Togoa Etafe North bible

ESEKIEL 23

¹Go navasaana ki Yehovah e moro umai paki nau,

²po naga, Naatam̃oli natuna, nagoroi dua ero doko, ero pei natu ni p̃ilada sikai maau:

³Go ero mari namasausaraana maga Ityipt; ero mari namasausaraana maga ni navei‐naatara‐ana adeada: tokora wanogoe eu dosoki nasusuda, go tokora wanogoe eu dosoki namata ni susu ni navei‐naatara‐ana adeada.

⁴Go takalapa nagisana Oholah, go taina nagisana Oholibah: ero po pei tea aginau, po dape natuda naanoai maga go natuda nagoroi maga. Go nalo ni nagisada, Oholah e pei Samaria, go Oholibah e pei Yerusalem.

⁵Go Oholah e maripele ragi waina e pei tea aginau; go e dodomi p̃arua ki tea dodomi a maga, naka ni Assiria, tea ni m̃aladigi ki nia,

⁶Waina eu pei tea sugoroana ki tea miala‐kesakesa, tea maraki maga go tea maramara maga, eu mamau puti pei natureai leom̃atakiana maga, naatam̃oli sakesaake horse maga.

⁷Go e maripele paki da, naatam̃oli wia liu maga ni Assiria tea mamau puti kakada: go e dum̃ana mari a e pei tea mamaragokiana ki idolo maga ki tea mamau puti waina e dodomi ra.

⁸E da doropusi namaripeleana aneana maga mau waina e mari ra pae naaleatia aneana maga waina e doko Ityipt; nalakena doko ragi ni navei‐naatara‐ana aneana, eu one sikoti a, go eu dosoki namata ni susu ni navei‐naatara‐ana aneana: go eu daki lua namasausauana adeada paki nia.

⁹Nalakena tea wanogoe kinau a pitua ki nia paki nam̃elearu ni tea dodomi a maga, paki nam̃elearu ni naka ni Assiria, waina e dodomi p̃arua ki da.

¹⁰Nara eu lagai pakasa ki nam̃alam̃alaana aneana: eu piragi lua pavakoto natuna naanoai maga go natuna nagoroi maga, go eu atugi a ki lova: go e po pei navasamalulua‐kiana sikai m̃aleoputo ni nagoroi maga; nalakena eu mari navasap̃otaeana maga paki nia.

¹¹Go taina Oholibah e punusi tea wanogoe, ma nae e sigisigileo p̃arua liu taina nalo ni nadodomiana aneana maga, go nalo ni namaripeleana aneana maga waina eu p̃arua liu namaripeleana maga ki taina.

¹²E dodomi p̃arua ki naka ni Assiria, tea maraki maga go tea maramara maga, tea ni m̃aladigi ki nia, waina eu pei tea sugoroana ki tea suniana leom̃atakiana liu maga, naatam̃oli sakesaake horse maga, eu mamau puti pei natureai leom̃atakiana maga.

¹³Go kinau a punusi naga e pei tea mamaragokiana; nara dua ero pae napua sikai maau.

¹⁴Go e sokari namaripeleana aneana maga eu disu po laapa; nalakena e punusi nunu ni naatam̃oli maga eu pei tea tae‐midiriana namalo ni nasum̃a, nunu maga ni naka ni Kaldea waina eu pei tea tae‐midiriana ki tea mimiala,

¹⁵Eu pei tea tasokiana ki tasoki maga namaloda, go tap̃au vivisiana maga eu doko nap̃auda, eu pei tea vunusiana eu dakiusi tea maraki maga, eu dakiusi naka ni Babelon waina eu doko Kaldea, navanua atatoko adeada.

¹⁶Go ragi waina nae e punusi ra, e m̃araverave dodomi p̃arua ki da, po dip̃aki lua tea tautauana maga paki Kaldea pano punusi ra.

¹⁷Go naka ni Babelon eu rumai punusi a doko nawewele ni nadodomiana, go eu mari a e pei tea mamaragokiana ki namaripeleana adeada, go e pei tea marisakiana pae ara, go naatana e karaikita ra.

¹⁸Dapala nogoe e dum̃ana lagai pakasa ki namaripeleana aneana maga, po dum̃ana lagai pakasa ki nam̃alam̃alaana aneana: go naatagu e karaikita e, dakiusi waina naatagu e pea karaikita taina.

¹⁹Ma e moro sokari namaripeleana aneana maga, doko do midoa ki parati ki naaleatia maga ni navei‐naatara‐ana aneana, ragi waina e maripele doko navanua ni Ityipt.

²⁰Go e dodomi p̃arua ki tea dodomi a maga, waina nap̃okasida e dapala nap̃okasi ni ass, go waina nasaraana adeada e dakiusi nasaraana ni horse maga.

²¹Dapala nogoe nigo ku midoa ki parati ki nawosiana sa ni ragi ni navei‐naatara‐ana anigo, ragi waina naka ni Ityipt eu dosoki namata ni susu ni navei‐naataraana anigo.

²²Nalakena tea wanogoe, Oholibah O, Yehovah Sup̃e e noa dapala nea, e naga, P̃a leo, aga wo surupugoni tea dodomi ko maga euga tuleana dip̃a ko, nara waina naatam̃a e karaikita ra, go aga wo mari ra euga umai dip̃a ko daliviri;

²³Naka ni Babelon, go naka ni Kaldea mamau puti, naatam̃oli maga ni Pekod, go Shoa go Koa, nara ma tea maga mamau puti ni Assiria euga mamau: natureai leom̃atakiana maga, eu mamau puti pei tea maraki maga go tea maramara maga, naatam̃oli vakilagi maga go tea rogoana maga, euga wo sakesaake horse maga.

²⁴Go euga wo umai po mari dip̃a ko ki nalikau maga ni navakalo, go ki kariot maga, go ki wakon maga, go ki nasaisaiana sikai ki narei maga; euga wo dum̃ada dutua ki da dip̃a ko daliviri ki nakokoro go ki sila go ki kalup̃au ni vatu: go aga wo dua ra navasap̃otaeana, go nara euga wo pasap̃otae ko ega vae navasap̃otaeana adeada maga.

²⁵Go aga wo lawo ki natotowo‐kasua‐ana aginau dip̃a ko, go nara euga wo marimari paki‐go doko namaritausuana; euga wo daelua nagisum̃a, go nadaligam̃a maga; go tea animu maga waina euga wo pei tea toropusiana doko, euga wo dowo ki lova: euga wo piragi lua pavakoto natum̃a naanoai maga go natum̃a nagoroi maga; go tea animu maga waina euga wo pei tea toropusiana doko, euga wo pei tea kani‐puoli‐kiana ki nakapu.

²⁶Go euga wo duatilua sugoro anigo maga, po dape lua pavakoto vatu wia ni narekeikiana anigo maga.

²⁷Dapala nogoe kinau aga wo mari nawosiana sa anigo ega wo marua ki‐go, go namaripeleana anigo waina e pei tea viragi‐lua‐ana pae navanua ni Ityipt umai: dapala waina p̃a wo da moro sike namatam̃a maga paki da mau, kite moro midoa ki parati ki Ityipt mau.

²⁸Nalakena Yehovah Sup̃e e noa dapala nea, e naga, P̃a leo, aga wo pitua ki‐go paki nam̃elearu ni tea maga waina ku pilosi ra, paki nam̃elearu ni tea maga waina ku karaikita ra:

²⁹Go nara euga wo marimari paki‐go doko navilosiana, go euga wo dape lua pavakoto nawa ni nawosimawosaana anigo, go euga wo doropusi ko p̃a wo m̃alam̃ala doko, sugoro anigo ega wo dika: go nam̃alam̃alaana ni namaripeleana anigo maga euga wo pei tea lagaipakasa‐kiana, nawosiana sa anigo go namaripeleana anigo maga euga mamau.

³⁰Tea maga wanogoe euga wo pei tea mariana paki‐go, nalakena ku maripele dausi tea ni nalauna p̃ota maga, go nalakena ku pei tea mamaragokiana ki idolo adeada maga.

³¹Ku surata usi napua ki taim̃a; nalakena tea wanogoe aga wo pitua ki lasa munu aneana paki nam̃elearum̃a.

³²Yehovah Sup̃e e noa dapala nea, e naga, P̃a wo munu kovai lasa munu ki taim̃a, waina e pakipua go e p̃arua: p̃a wo pei tea muruki‐saudoa‐kiana, po pei tea vasasaudoa‐kiana; nalakena e pura p̃arua.

³³P̃a wo pei tea vakavuroana ki namatamalokuana go narogokitesaana, ki lasa munu ni nasaram̃akotoana go navei‐maso‐maladi‐ana, ki lasa munu ki taim̃a Samaria.

³⁴P̃a wo munugi a, po dum̃ili puti a, go p̃a wo mari‐p̃oraworae a, po dum̃am̃a dova‐p̃oraworae nasusum̃a maga asa: nalakena kinau a pasa asa, Yehovah Sup̃e e noa e.

³⁵Nalakena tea wanogoe Yehovah Sup̃e e noa dapala nea, e naga, Nalakena ku malio ki nau, po nadi ki nau paki natakum̃a, nalakena tea wanogoe p̃a wo dapetape nawosiana sa anigo go namaripeleana anigo maga.

³⁶Go Yehovah e moro noa ki nau, e naga, Naatam̃oli natuna, p̃a wo pasap̃otae Oholah go Oholibah, kite? Go p̃a noakisai ra tea mamaragokiana adeada maga.

³⁷Nalakena nara ero maripele, go nada e doko nam̃elearuda maga, go ero maripele paki idolo adeada maga; go ero pitua ki natuda naanoai maga, waina ero maginau dape ra, eu pei navituaana tap̃arakiana maga naga euga vei tea kani‐puoli‐kiana.

³⁸Go ero moro mari tea waia paki nau: doko naaleatia sikai maau wanogoe ero mari tokora tapu aginau e pei tea m̃oli, go ero da pavaigoro sabbath aginau maga naga euga tapu mau.

³⁹Nalakena ragi waina ero mari punue natuda maga naga euga vei naviriana paki idolo adeada maga, naaleatia sikai maau wanogoe ero umai paki ekopu ni tokora tapu aginau po mari a e pei tea m̃oli; go p̃a leo, ero mari dapala nogoe m̃aleoputo ni nasum̃a tapu aginau.

⁴⁰Go ku moro dip̃aki lua po paraki naatam̃oli maga ni uvea umai; waina tea tautauana sikai e pei tea tip̃akiluaana pano punusi ra, go p̃a leo, eu rumai; nalakena nara, nigo ku dum̃am̃a sarue ko, po pitai namatam̃a maga ki natai, po dum̃am̃a dekei ki‐go ki naleo maga ni narekeikiana;

⁴¹Ku dasake doko nawewele wia liu sikai, go wede sikai e doko naraena, waina ku lawo ki tea ni nap̃o wia aginau asa, go ki naroro aginau.

⁴²Go nadaleo ni taua sikai ni naatam̃oli waina eu p̃arop̃aro e pei tea rogoana doko kiana: go tea matamaloku maga pae masop̃alo eu pei tea viragiana umai sikoti naatam̃oli maga ni taua ni naatam̃oli; go eu sara ki lela maga doko naru ni nagoroi dua wanogoe, po sawa ki tagotop̃au leom̃atakiana maga doko nap̃auda.

⁴³Go kinau a noa nalo ni nagoroi waina e maripele pae ragi ni tuai, a naga, Sala waia euga wo maripele paki nia, go nae ega wo maripele paki da.

⁴⁴Go eu pa punusi a, dakiusi waina eu pa punusi nagoroi masausara sikai: dapala nogoe eu pa punusi Oholah, po pa punusi Oholibah, nagoroi dua waina ero mari nawosiana sa.

⁴⁵Ma naatam̃oli leana maga euga wo pasap̃otae ra ki navasap̃otaeana waina eu pasap̃otae nagoroi maga asa waina eu maripele, go ki navasap̃otaeana waina eu pasap̃otae nagoroi maga asa waina eu daki nada; nalakena ero pei nagoroi maga waina ero maripele, go nada e doko nam̃elearuda maga.

⁴⁶Nalakena Yehovah Sup̃e e noa dapala nea, e naga, Kinau aga wo piragi taua sikai ni naatam̃oli sake umai dip̃a ra, go aga wo pitua ki da naga euga vei tea duletuleakiana po pei tea vuti‐lua‐pavakotoana.

⁴⁷Go taua ni naatam̃oli maga wanogoe ega wo nadi ra ki vatu maga, po atugi ra ki lova adeada maga; euga wo mari punue natuda naanoai maga go natuda nagoroi maga, po dap̃ara ki nasum̃a adeada maga ki nakapu.

⁴⁸Dapala nogoe kinau aga wo mari puoli ki nawosiana sa m̃elu dua ki navanua wanogoe, naga nagoroi maga mamau puti euga vei tea tapavanauana naga euga ta mari nawosiana sa dapala waina nimu koro mari a.

⁴⁹Go euga wo pitua liliua ki nawosiana sa animu ega liliu paki nap̃aumu, go koroga wo dapetape navaratiana ni nawosiana sa ni idolo animu maga: go koroga wo atae naga kinau a pei Yehovah Sup̃e.