Read Nguna Togoa Etafe North ESEKIEL 24 Bible Online

ESEKIEL 24 - Nguna Togoa Etafe North bible

ESEKIEL 24

¹Go doko natau keloveti, atelagi kerualima kakana, nakup̃a kerualima ni atelagi, navasaana ki Yehovah e umai paki nau,

²po naga, Naatam̃oli natuna, p̃a midiri nagisa ni naaleatia, ni naaleatia sikai maau waia: nawota ni Babelon e kelugoro Yerusalem naaleatia sikai maau waia.

³Go p̃a lua ki naluluakia sikai paki nasum̃a vei p̃auluulu, po noa ki da, p̃a naga, Yehovah Sup̃e e noa dapala nea, e naga, P̃a sawa ki pot ega toko nakapu, go p̃a taki noai paki asa:

⁴P̃a toropusi mateletele maga ni nap̃okasi asa, tea wia liu maga, namaona, go napauna; p̃a vakavuro e ki navatu wia lua maga.

⁵P̃a viragi lua tea wia liu ni navata ni shiip, go p̃a taua ki nakapu etano ki nia: p̃a mari a ega lota p̃ia; p̃a veni navatuna maga m̃aleoputo kakana.

⁶Nalakena tea wanogoe Yehovah Sup̃e e noa dapala nea, e naga, Ai ki natokoana ni nada, ki pot waina namadaniana kakana e doko asa, go waina namadaniana kakana e da m̃elu dua ki nia mau! P̃a tape lua e, matele go matele; gole ega ta dowo asa mau.

⁷Nalakena nadana e doko m̃aleoputo kakana; e daki nia lina vatutoko; e da daki nia paki natano, go e da donigoro e ki nam̃otam̃ota mau;

⁸Kinau a mari nada waina e daki nia e dokolina vatutoko, naga ega ta pei tea tonigoroana mau; naga ega mari namaritausuana ega sake umai naga ega mari nasikoana.

⁹Nalakena tea wanogoe Yehovah Sup̃e e noa dapala nea, e naga, Ai ki natokoana ni nada! Kinau ma aga wo mari taua ni nakapu ega warua.

¹⁰P̃a taua ki nakapu, p̃a surisuri a naga ega soro p̃arua, p̃a veni m̃ata ki nap̃okasina, po mari nasuana ega matolu, go p̃a tap̃ara ki navatuna maga.

¹¹Go p̃a sawa ki tea p̃alo ega toko nam̃elevara kakana maga, naga ega vivitinu, go brass kakana ega aso, go naga naloaana kakana ega sara nap̃alauna, naga namadaniana kakana ega mavunuvunu.

¹²Ma namadaniana warua kakana ega wo da mavunuvunu pae mena ni nakapu wanogoe mau;

¹³Kinau a maridogo mari dautau ki‐go m̃elu dua ki naloaana ni nawosiana sa anigo, ma ku karai naga p̃a vei tea mari‐dautau‐kiana m̃elu dua ki naloaana anigo. Nalakena tea wanogoe p̃a wo da pei tea maridautau‐kiana pa pa namaritausuana aginau dip̃a ko ega wo pei tea vakavuroana.

¹⁴Kinau, Yehovah, a noa e: ega wo pakilina, go kinau aga wo mari a; aga wo da dosa liliu mau, kite malemale ko mau, kite midoa ki piri a mau; euga wo pasap̃otae ko ega vataka ni napua anigo maga, go ega vataka ni natomariana anigo maga, Yehovah Sup̃e e noa e.

¹⁵Go navasaana ki Yehovah e moro umai paki nau,

¹⁶po naga, Naatam̃oli natuna, p̃a leo, a naga aga tape lua namaroana ni namatam̃a m̃elu dua ki‐go ki naatugiana sikai: ma p̃a ta susue kite dagi mau, go naririmatam̃a maga euga ta sara siwo mau.

¹⁷P̃a gi, ma ega toko nap̃alaum̃a; p̃a ta dagisi tea mate mau, p̃a vivigoro nap̃aum̃a ki tea vivigoro anigo, go p̃a vasi nam̃elevasiana anigo maga, p̃a ta kulutigoro nagolem̃a maga mau, go p̃a ta gani navinaga ki naatam̃oli maga mau.

¹⁸Dapala nogoe a pasa paki narei malip̃ogi; go doko ragi melu nagoroi aginau e mate: go matamai ki nia a mari pataka ni tea waina a pei tea tip̃akiana asa.

¹⁹Go narei eu noa ki nau, eu naga, P̃a wo da noakip̃otae gami naga naleo maga wanogoe eu maginami pei nasava, naga ku do mari tea tapalana, kite?

²⁰Go a noa ki da, a naga, Navasaana ki Yehovah e umai paki nau,

²¹po naga, P̃a vasa paki nasum̃a ni Israel, p̃a naga, Yehovah Sup̃e e noa dapala nea, e naga, Kuga leo, kinau aga wo mari tokora tapu aginau ega vei tea m̃oli, nap̃op̃ovakilagi‐ana ni nakasuaana animu, namaroana ni namatamu maga, go namasauana ni naatamu; go natumu naanoai maga go natumu nagoroi maga waina ku doropusi ra eu madoko, euga wo dowo ki lova.

²²Go nimu kuga wo mari ega tapala waina kinau a mari a: kuga wo da kulutigoro nagolemu maga mau, kite gani navinaga ki naatam̃oli maga mau.

²³Go tea vivigoro animu maga euga toko nap̃aumu, go nam̃elevasiana animu maga euga toko nam̃elemu maga: kuga wo da susue kite dagi mau; ma kuga wo mavunuvunu nalakena namarinaleotageleana animu maga, po gi dum̃amu paki mu.

²⁴Dapala nogoe Esekiel ega wo manimu pei navaivaiana sikai; ega tapala tea mamau puti waina nae e mari a, nimu ma kuga wo moro mari ega tapala nogoe: ragi waina tea wanogoe ega wo pakilina, ragi wanogoe kuga wo atae naga kinau a pei Yehovah Sup̃e.

²⁵Go nigo, naatam̃oli natuna, doko naaleatia sikai maau wanogoe, ragi waina kinau aga wo dape lua m̃elu dua ki da natuda naanoai maga go natuda nagoroi maga, nakasuaana adeada, navakilagiana go nasamasamaana adeada,

²⁶Doko naaleatia sikai maau wanogoe, tea sava pano sikai ega wo umai punusi ko po dogorogo ki narogorogoana nalo kakana.

²⁷Doko naaleatia wanogoe nawokam̃a ega wo pei tea wolagatiana, naga p̃a vasa paki tea sava pano wanogoe; p̃a wo pasa, po da moro pei pusa mau: dapala nogoe p̃a wo pei navaivaiana sikai paki da; go euga wo atae naga kinau a pei Yehovah.