Read Nguna Togoa Etafe North ESEKIEL 25 Bible Online

ESEKIEL 25 - Nguna Togoa Etafe North bible

ESEKIEL 25

¹Go navasaana ki Yehovah e umai paki nau,

²po naga, Naatam̃oli natuna, p̃a lawo ki naraem̃a ega leo paki Ammon natuna maga, go p̃a veanoasai nalo kakada:

³Go p̃a noa ki Ammon natuna maga, p̃a naga, Kuga rogo navasaana ki Yehovah Sup̃e; Yehovah Sup̃e e noa dapala nea, e naga, Nalakena ku naga, Aha, nalo ni tokora tapu aginau, ragi waina e pei tea mariana e pei tea m̃oli; go nalo ni navanua ni Israel, ragi waina e pei tea mariana e pei maso maladi; go nalo ni nasum̃a ni Yudah, ragi waina e pei tea viragi‐lua‐pavakotoana:

⁴Nalakena tea wanogoe, p̃a leo, kinau aga wo pitua ki‐go paki nam̃elearu ni tea ni nalauna p̃ota maga ni ist, naga p̃a vei tea veaniana adeada sikai, go nara euga wo sike lawo ki tap̃aup̃au adeada maga m̃aleoputo kakam̃a, po mari natokoana adeada maga doko navanua anigo; go euga wo gani nawa kakam̃a, go euga wo munu milk anigo.

⁵Go aga wo mari Rabbah ega vei napega sikai agi kamel maga, go natokoana maga ki Ammon natuna maga euga vei loga maga agi navata maga ni shiip: go kuga wo atae naga kinau a pei Yehovah.

⁶Nalakena Yehovah Sup̃e e noa dapala nea, e naga, Nalakena ku dapap̃osawosa ki nam̃elearum̃a maga, po pasi ki natuam̃a maga, po laelaea ki nakokonaana mamau ni nap̃op̃om̃a dip̃a navanua ni Israel;

⁷Nalakena tea wanogoe p̃a leo, kinau a sai ki nam̃elearugu dip̃a ko, go aga wo pitua ki‐go paki tea ni nalauna p̃ota maga, p̃a vei tea vutilua‐pavakotoana sikai; go aga wo daelua ko pa dua ki narei maga, go aga wo mari ko p̃a mavunuvunu m̃elu dua ki navanua maga: aga wo mari puoli ki‐go; go p̃a wo atae naga kinau a pei Yehovah.

⁸Yehovah Sup̃e e noa dapala nea, e naga, Nalakena Moab e naga, Kuga leo, nasum̃a ni Yudah e pataka sikai ma nalauna maga mamau puti;

⁹Nalakena tea wanogoe kuga leo, aga wo mari tava maga ni Moab euga wo dap̃olaga m̃oli one, go aga wo mari sa sa ki natokoana kakana maga waina eu doko kokoi kakana maga, nasamasamaniana ni navanua kakana, Beth‐yeshimoth, Baal‐meon, go Kiriathaim,

¹⁰Aga wo pitua ki nia paki tea ni nalauna maga ni ist, tea kokona maga ki Ammon natuna maga; dapala waina euga wo da moro pei tea midoaki‐parati‐kiana m̃aleoputo ni nalauna maga mau:

¹¹Go aga wo mari navasap̃otaeana maga paki Moab; go euga wo atae naga kinau a pei Yehovah.

¹²Yehovah Sup̃e e noa dapala nea, e naga, Nalakena Edom e mari nasikoana dip̃a nasum̃a ni Yudah, po mari naleo sa warua nalo kakana;

¹³Nalakena tea wanogoe Yehovah Sup̃e e noa dapala nea, e naga, Aga wo sai ki nam̃elearugu dip̃a Edom, go aga wo daelua pa dua ki nia naatam̃oli go nalo tuavati: go aga wo mari a ega vei maso maladi; pae Teman pa pa liliu Dedan, euga wo dowo ki lova.

¹⁴Go aga wo mari nasikoana aginau paki Edom pae nam̃elearu ni narei aginau Israel; go nara euga wo mari paki Edom ega vataka ni namaetoana aginau, go ega vataka ni namaritausuana aginau: go euga wo atae nasikoana aginau, Yehovah Sup̃e e noa e.

¹⁵Yehovah Sup̃e e noa dapala nea, e naga, Nalakena Filistine maga eu mari nasikosikoana, go eu pitua ki nasikoana pilake nakokonaana ni nap̃op̃oda doko mau doko, naga euga mari sa sa ki nia;

¹⁶Nalakena tea wanogoe Yehovah Sup̃e e noa dapala nea, e naga, Kuga leo, aga wo sai ki nam̃elearugu dip̃a Filistine maga, go aga wo daelua tea ni Kaftor, po mari puoli ki puti tea maga waina eu pei tea toropusiana doko nadigi ni natasi.

¹⁷Go aga wo mari nasikosikoana warua paki da ki navaratiana maga ni namaritausuana; go euga wo atae naga kinau a pei Yehovah, ragi waina aga wo pitua ki nasikosikoana aginau paki da.