Read Nguna Togoa Etafe North ESEKIEL 26 Bible Online

ESEKIEL 26 - Nguna Togoa Etafe North bible

ESEKIEL 26

¹Go e pakilina natau kerualima sikai tamate sikai, nakup̃a vea ni atelagi, naga navasaana ki Yehovah e umai paki nau,

²po naga, Naatam̃oli natuna, nalakena Tair e pasa saudoa ki Yerusalem, po naga, Aha, nae waina e pea pei namata‐pua ki narei maga, e po maworawora; e po pei tea roaana paki nau: aga wo pei tea vaka‐maromaro‐kiana, nalakena nae e po makaka one:

³Nalakena tea wanogoe Yehovah Sup̃e e noa dapala nea, e naga, P̃a leo, kinau a mari dip̃a ko, Tair O, go aga wo mari nalauna laapa euga wo sake umai dip̃a ko, dapala waina natasi e do mari napeao kakana maga eu sake umai.

⁴Go euga wo mari sa sa ki p̃aaka maga ni Tair, po dakai nasum̃a varau pakilagi kakana maga: go aga wo dosa lua natano kakana m̃elu dua ki nia pano, po mari a ega vei vatu m̃oli doko sikai.

⁵Ega wo pei tokora sikai waina euga wo p̃elesa ki kup̃ena maga asa m̃aleoputo ni natasi; nalakena kinau a pasa asa, Yehovah Sup̃e e noa e: go ega wo pei tea vuti‐luapavakotoana sikai agi nalauna maga.

⁶Go natuna nagoroi maga waina eu doko navanua warua euga wo pei tea atugiana ki lova: go euga wo atae naga kinau a pei Yehovah.

⁷Nalakena Yehovah Sup̃e e noa dapala nea, e naga, Kuga leo, kinau aga wo piragi umai dip̃a Tair, Nebukadnessar nawota ni Babelon, nawota ki nawota maga, ega wo pae north umai pilake horse maga, go pilake kariot maga, go pilake naatam̃oli sakesaake horse maga, go taua warua sikai, go naatam̃oli laapa.

⁸Nae ega wo atugi natum̃a nagoroi maga ki lova, nara waina eu doko navanua warua: go ega wo mari nawosiana maga ni nakelugoroana dip̃a ko, po nadi ki natauakiana sikai dip̃a ko, po sike lawo ki nakokoro dip̃a ko.

⁹Go ega wo lawo ki nakau lawo‐p̃orae aneana maga dip̃a p̃aaka anigo maga, go ega wo dakai nasum̃a varau pakilagi anigo maga ki karau aneana maga.

¹⁰Nalakena nalaapaana ni horse aneana maga, nam̃otam̃ota kakada ega wo dap̃augoro ko: p̃aaka anigo maga euga wo parivari nalakena nasaruruana ni naatam̃oli sakesaake horse maga, go nalakena wakon maga, go nalakena kariot maga, ragi waina nae ega wo sili pae namata‐pua anigo maga, dapala waina naatam̃oli maga eu sili paki natokoana waina malo mari‐p̃oraeana sikai e pei tea mariana asa.

¹¹Nam̃ele ni horse aneana maga euga wo pasi puludoa ki napua anigo maga mamau puti: ega wo atugi narei anigo ki lova, go tea lawodu maga ni nakasuaana anigo euga wo pevera paki natano.

¹²Go euga wo dape pavakoto nasogolapaana anigo, po puti lua pavakoto naleo musagiana anigo maga: euga wo dakai p̃aaka anigo maga, po mari sa sa ki nasum̃a wia masauniana maga: euga wo nadi ki vatu anigo maga, go napapa anigo, go nam̃otam̃ota anigo paki m̃aleoputo ni noai maga.

¹³Go aga wo mari nadaleo ni nalegaana anigo maga ega makoto; go nasaruruana ni harp anigo maga ega wo da moro pei tea rogoana mau.

¹⁴Go aga wo mari ko p̃a vei vatu m̃oli doko sikai: p̃a wo pei tokora sikai waina euga wo p̃elesa ki kup̃ena maga asa; p̃a wo da moro pei tea tavagiana mau: nalakena kinau Yehovah e pasa asa, Yehovah Sup̃e e noa e.

¹⁵Yehovah Sup̃e e noa dapala nea paki Tair, e naga, Naureure maga euga wo da duruuru nalakena nasaruruana ni narowoana anigo mau, ragi waina tea vei wotu maga euga wo gi, ragi waina naatugiana ega wo pei tea mariana m̃aleoputo kakam̃a, kite?

¹⁶Ragi waina tea maraki maga ni natasi euga wo siwo m̃elu dua ki malo tasake adeada maga, po doropusi sugoro kovagoro adeada maga euga toko, po sawo lua tea suniana turi‐midimidiria adeada maga: euga wo dum̃ada sugoro ra ki naruruuruana; euga wo doko natano, po duruuru pitip̃atip̃a, po saram̃akoto ako.

¹⁷Go euga wo sike nalalagaarovaana sikai nalo kakam̃a, po noa ki‐go, euga wo naga, Ai ki‐go, ku po pei tea mari‐puoli‐kiana, natokoana rogoana O, waina ku pea pei tea marimatua doko m̃aleoputo ni natasi sala vea, nigo go naatatoko kakam̃a maga, waina ku pakamatakua ki tea laapa waina eu doko ako, m̃aladigi go uvea!

¹⁸Go sala waia naureure maga eu duruuru naaleatia ni narowoana anigo; naureure maga ni natasi eu saram̃akoto nalakena namari‐puoli‐ki‐go‐ana.

¹⁹Nalakena Yehovah Sup̃e e noa dapala nea, e naga, Ragi waina aga wo mari ko p̃a vei natokoana maladi sikai, dakiusi natokoana maga waina naatam̃oli e dika ara; ragi waina aga wo mari epua ega wo muagoro ko, go noai warua maga euga wo dap̃augoro ko;

²⁰Ragi wanogoe aga wo nadi ki‐go pakitano sikoti tea maga waina eu siwo paki m̃orutano, pa punusi naatam̃oli maga ni ragi ni tuai, go aga wo mari ko p̃a wo doko p̃okasi, doko tokora maga waina eu pei maso maladi doko pae tuai tuai, doko sikoti tea maga waina eu siwo paki m̃orutano, go naatam̃oli ega wo da moro doko ako mau, p̃a wo da moro peani tokora sikai doko navanua ki tea mauri maga mau:

²¹Go aga wo mari ko p̃a vei tea mataukiana, p̃a wo puoli: euga wo laaga ako, ma euga wo da moro pap̃ai ko mau, Yehovah Sup̃e e noa e.