Read Nguna Togoa Etafe North ESEKIEL 27 Bible Online

ESEKIEL 27 - Nguna Togoa Etafe North bible

ESEKIEL 27

¹Go navasaana ki Yehovah e moro umai paki nau,

²po naga, Go nigo naatam̃oli natuna, p̃a sike nalalagaarovaana sikai nalo ni Tair;

³Go p̃a noa ki Tair, p̃a naga, Nigo O, waina ku doko nadigi ni natasi, waina ku pei tea vakokoto ki narei maga ni naureure maga, Yehovah Sup̃e e noa dapala nea, e naga, Tair O, nigo ku naga, Kinau a pei tea wialua doko narekeikiana.

⁴Kokoi kakam̃a maga eu doko m̃aleoputo ni natasi maga, tea tavagi kakam̃a maga eu mari narekei‐ki‐go‐ana e p̃ia lua.

⁵Eu davagi ko ki napapa maga ni nakau paine pae Senir: eu dape lua nakau sidar sikai pae Lebanon e pei natira kakam̃a.

⁶Eu mari nawose valuse kakam̃a maga ki nakau oak maga ni Bashan; eu mari nawelewele kakam̃a maga ki sidar waina e pei tea vulusokiana ki napati ni elefant ni naureure maga ni Kittim.

⁷Nalae kakam̃a e pei tea ni linen wia ni nawosiana ki tea turi‐midimidiria pae Ityipt doko do manigo pei manututu sikai; tea kesakesa go tea miala‐kesakesa pae naureure maga ni Elishah e pei tap̃aup̃au kakam̃a.

⁸Naatam̃oli maga ni Sidon go Arfad eu pei tea valuse anigo maga: naatam̃oli manumatua anigo maga, Tair O, waina eu doko kiam̃a, eu pei tea wowolau anigo maga.

⁹Tea matua maga ni Cebal go naatam̃oli manumatua kakana maga eu doko kiam̃a eu pei tea tuki‐p̃onoti anigo maga: rarua maga mamau puti ni natasi, go naatam̃oli kakada maga waina eu doko ara doko, eu rumai punusi ko, eu musagi naleo musagiana maga umai naga euga sosori po pakokoto.

¹⁰Naatam̃oli maga ni Persia, go ni Lud, go ni Put, eu pei tea ni taua ni navakalo anigo, eu pei naatam̃oli maga ni navakalo anigo: eu sara ki nakokoro go kalup̃au ni vatu doko ako; nara eu pisei ki nasamasamaana anigo.

¹¹Naka ni Arfad nara ma naatam̃oli maga ni navakalo kakam̃a eu doko p̃aaka kakam̃a maga daliviri, go naka ni Kamad eu doko nasum̃a varau pakilagi kakam̃a maga: eu sara ki nakokoro adeada maga p̃aaka kakam̃a maga daliviri; eu mari narekeikiana kakam̃a e p̃ia lua.

¹²Tarshish e pei tea vakokoto kakam̃a nalakena nalaapaana ni nasogolapaana visarasara kakam̃a maga; eu surupioli ki naleo musagiana kakam̃a ki silver, ki airon, ki tin, go ki led.

¹³Yavan, Tubal, go Meshek eu pei tea vakokoto kakam̃a maga: eu surupioli ki naleo musagiana kakam̃a ki naatam̃oli maga go ki lasa maga ni brass.

¹⁴Tea ni nasum̃a ni Tokarmah eu surupioli ki naleo musagiana kakam̃a ki horse maga, go ki horse maga ni navakalo, go ki mule maga.

¹⁵Naka ni Dedan eu pei tea vakokoto kakam̃a maga: naureure laapa eu pei tea vakokoto kakam̃a maga: namoriana waina nara eu dua ko asa e pei napati maga ni napati ni elefant, go eboni.

¹⁶Siria e pei tea vakokoto kakam̃a nalakena nalaapaana ni naleo visarasara maga waina ku p̃osiwosi ki da: eu surupioli ki naleo musagiana kakam̃a ki emerald maga, go ki tea miala‐kesakesa, go ki tea turi‐midimidiria, go ki linen wia, go ki nalesilesi, go ki rubi maga.

¹⁷Yudah, go navanua ni Israel, nara eu pei tea vakokoto kakam̃a maga: eu surupioli ki naleo musagiana ki whiit, go ki oliva maga go ki napuliva vea maga, go ki honi, go ki naroro, go ki naroro lolo.

¹⁸Damaseko e pei tea vakokoto kakam̃a nalakena nalaapaana ni nasogolapaana visarasara maga; eu surupioli ki naleo laapa waina ku p̃osiwosi ki da, ki waine ki Helbon, go ki wul tare.

¹⁹Dan go Yavan eu surupioli ki naleo musagiana kakam̃a ki nasei lolo: namoriana waina eu dua ko asa e pei airon lidalida, go kassia, go kalamo.

²⁰Dedan e pei tea vakokoto kakam̃a po sori dua ko nakulukulu wia waina eu sawa ki nia nam̃adu ni horse.

²¹Arabia go tea maraki maga mamau puti ni Kedar eu pei tea vakokoto maga ni nam̃elearum̃a; eu sori dua ko shiip natuna maga, go shiip anoai maga, go naninani maga.

²²Tea vakokoto maga ni Sheba go ni Raamah eu pei tea vakokoto kakam̃a maga: eu surupioli ki naleo kakam̃a maga ki tea wia lua ni tea ni nap̃o wia visarasara maga, go ki vatu wia masauniana visarasara maga, go ki kold.

²³Haran, Kanneh, go Eden, tea vakokoto maga ni Sheba, Ashur, go Kilmad, eu pei tea vakokoto kakam̃a maga.

²⁴Nara eu sori dua ko naleo wia masauniana maga, nakulukulu miala‐kesakesa, nawosiana ki tea turi‐midimidiria, go ki tea oraorana visarasara wia maga, go ki natali vausi‐soki‐kasuakiana maga.

²⁵Rarua maga ni Tarshish eu pei tea musamusa kakam̃a maga po musagi naleo vakokoto kakam̃a maga: go ku pei tea vakavuroana po pei tea samasamaniana m̃aleoputo ni natasi maga.

²⁶Tea valuse kakam̃a maga eu musagi ko paki noai warua maga: nalagi ruatu e mari‐p̃oraworae ko m̃aleoputo ni natasi maga.

²⁷Nasogolapaana kakam̃a maga, go naleo sosori kakam̃a maga, naleo musagiana kakam̃a, naatam̃oli kakam̃a maga ni natasi, go tea wowolau kakam̃a maga, tea tuki‐p̃onoti kakam̃a maga, tea vakokoto kakam̃a maga, go naatam̃oli kakam̃a maga mamau puti ni navakalo waina eu doko ako, nara ma taua mamau puti kakam̃a waina eu doko m̃aleoputo kakam̃a, euga wo diro paki epua ni natasi maga naaleatia ni namarisa‐ki‐go‐ana.

²⁸Napega kakam̃a maga euga wo parivari nalakena nadaleo ni nakuapiosoana ki tea wowolau kakam̃a maga.

²⁹Go tea maga mamau puti waina eu dape nawose, naatam̃oli maga ni natasi, go tea wowolau maga mamau puti ni natasi, euga wo doropusi rarua adeada maga po paki euta, go euga wo lawodu euta ni natasi.

³⁰Go euga wo mari nadaleoda ega vei tea rogoana ako, euga wo dagi p̃arua, po nadi ki nam̃otam̃ota paki nap̃auda, euga wo dum̃ada malulua ki da natano‐apu maga:

³¹Go euga wo dum̃ada masi nap̃auda ega m̃asua nalakena nigo, po dum̃ada dasoki ra ki nakulukulu ni sak, go euga wo dagisi ko ki natagiana kokona, doko nakokonaana ni nap̃op̃oda.

³²Go doko natagisiana adeada, euga wo sike nalalagaarovaana sikai nalo kakam̃a, po lalagaarova ako, doko do naga, Sei e doko waina e dakiusi Tair, dakiusi nae waina e pei tea mariana e punuta doko m̃aleoputo ni natasi?

³³Ragi waina naleo musagiana kakam̃a maga eu pei tea musagiana pae natasi maga, ku pakavuro nalauna laapa; ku mari nawota maga ni maramana eu pei sogolapa ki nalaapaana ni nasogolapaana kakam̃a maga go ki naleo musagiana kakam̃a maga.

³⁴Ma ragi waia natasi maga eu mari‐p̃oraworae ko ku mawora epua maga ni natasi maga, naleo musagiana kakam̃a go taua mamau ni naatam̃oli wosiwosi kakam̃a eu diro sikoti ko.

³⁵Naatatoko maga mamau puti ni naureure maga eu saram̃akoto ako, go nawota kakada maga eu m̃anaunau p̃arua, eu pinovinoi naraeda.

³⁶Tea vakokoto maga ni nalauna maga eu mari saudoa ki‐go; ku po pei tea mataukiana sikai, ku pano puoli.